زرمبش دستبندی کنت کہ امریکاءِ سفارتءِ دیما بیوکیں تظاھراتءَ بھر زیر ات

بلوچ استمانءِ سرا زوراکی برجاہ اَنت۔ شہ بنداتی آسراتی چوش کہ وانگ جاہ و استاد، درمان و دکتر، کار و روزگار، آب و برق، و دگراں زبھری وتی جاگہ ھست انت؛ پاکستان و ایرانی واک بلوچ جھدکاراں یکّوئی کُشگ و چگل دیگا اَنت۔ اے ملکاں شیرک کنوک دنیاءِ زنڈیں واک اَنت۔

خاص امریکاءِ برجاھیں کمک پاکستانءَ نہ ایوکا زندگ دارگا اِنت، ایشیءِ کشا پاکستان زوراک تر بیان اِنت و ھمے توانائیءَ پاکستان بلوچستانءِ سیاسی زرمبشءِ پروش دیگا کارمرز کنگا اِنت۔

آدگہ دیما ایرانی زوراکی بازیں میانملکی گل و ٹولیاں دنیاءِ واکانی دیما پاشک کتگ اَنت، بلہ ایرانءِ خلافا تانگہ ترندیں گامے چست کنگ نہ بیتگ۔

ھمے جاورانی نیمگا امریکا و دنیاءِ دلگوشا ترّینگءِ مقصدا ماں ناروےءِ بنجاھی شھر اسلوءَ امریکاءِ سفارتءِ دیما بلوچستانءِ راجی زرمبش تظاھراتےءَ سرکشی کنگا اِنت۔ ما شہ سرجمیں بلوچ، بلوچانی دوستواہ و انسانی حقانی پانکجناں دسبندی کنیں کہ تظاھراتا بھر بہ زیر اَنت۔

تظاھراتءِ رمس و وھد

رمس: شنبہ 8 اکتوبر 2011

وھد: کلاک 15 تانکہ 16

شمئے راھچار

بلوچستانءِ راجی زرمبش ۔ناروے