ھما روچا کہ من واجہ جانمحمد دشتیءِ سرا یورشءِ حال إشکت منی أولی مارشت ھمے پیما إتنت کہ گشیگا تیر واجہ دشتیءِ بدلا منی پیشانیا پیوست بوتگ أت۔ آ مارشت ھنچؤ زوراک أت کہ پہ کتروکےءَ ھما تیرءِ سؤچک و سرءِ تھا بونڈ بیگءِ یک وابی بے گـُمانییےءَ منا پَـتا إت۔چوناھیا مئے کرّ گورا ھمنکس لاش کپان أنت کہ دلاں پہ درد بیگا دم برتگ، بلے إے حالا سرجمیں بالاد چنڈینت یلہ دات۔ پرچاکہ جانمحمد دشتی نہ إیوکا یک بلوچ زانتکار و خانوادھیں مردے أت، بلکیں آ وتی دئورءِ سقراط أت۔ گوں آئی فکری جدائی بوت کنت۔ آ فکر ألـّم نہ إنت کہ ھر کسا دوست بہ بنت، بلے إے گپ دشمناں ھم منـّتگ کہ جانمحمد ھرجاگها ھست إنت؛ سنگين إنت. آئیءِ ھمے مزنیں وزن گوں وشتنیاتکاں سگگ نہ بوت۔
وانندہ و زانتکاریں مردم گوں دلیل وتی گپا دیما کاریت، وتی فکرءِ وڑا دگہ فکراں شرفدار کنت و پہ سرپد بیگا مدام درے پشت گيجیت؛ تاکہ أچ یکـّا دگرا سوب کنگءِ چمـّگ خشک مہ بیت! بلے کم زانتیں مردم گوں کشگ مخالفیں فکراں دارگ لوٹ أنت۔ آواں خیال گـوَر نہ إنت کہ دنیاءَ چنکس سقراط، عیسا، منصور و أکبر بگٹی کشتگ أنت، و کشوکانءِ نام توار بیگواہ أنت، بلے پہ راستیا مروکانءِ نام تا عاقبتا راجدپتری تاکانءِ براہ أنت۔
شگر إنت کہ جانمحمد دشتی سلامت إنت۔ خدا ئی سلامت بہ کنات۔ ألبت أگر دشمن وتی سلکاریا سوبین ھم بوتین أت، پدا هم آواں دشتی کشت نہ کرت۔ پرچا دیر إنت کہ دشتیءَ أچ یک مردےءَ گيئش یک فکر و اُمیدےءِ دروشما ھر بلوچ زھگءِ دلا جاگہ ودی کرتگ۔ آ پہ قومءِ اوبادگاں رژنءِ ڈلگیں إستارے جؤڑ بوتگ۔
ھما حالا إشکنگءِ درگتا من تاکہ دیرا وانگ بوتاں و شہ ھما پیشی مارشتا أبید دگہ ھچ خیال نہ بوت۔ رندا کہ أچ بے سمائیا درگپتاں، مار إتاں کہ منی سر أچ ھر وڑیں لیکواں خالی إنت۔ إے مارشت ھم زوراک أت و ھنچؤ گمان بوت کہ مغز نیں مدام خالی مانیت۔ گندگا کسےءَ پہ زور مغزءِ سرجمیں دریگ بستگ إتنت۔ رژنءِ زندگیں خیالانءِ جاگھا یک دراجکشـّیں دِشتی یے (نفرتے) 'دشتء لوت'ءِ وڑا ماں چم و گماناں تالان کت۔
باز دیرا رند یک خیالےءَ فکری دروشمے زرت کہ بلوچ راجءِ دژمن چنکس ناسرپد و کمزانگ أنت۔ نہ چارگا أنت کہ آواں پیشا إینکس سر ڈلتگ أنت، بلے سوب و إیمنی إش نہ رستگ۔ پدا ھم ھما وڑیں ردییے کرتگ إش کہ إیشیءِ سببا سرجمیں بلوچستان جَنبور إنت۔ زرّءِ ھوریا زوراکیءِ ترونگل، لب و تماہ کلاّں آچ نہ کشت؛ نوں تیر و آچگواری إیشیا چؤن کشت کنت؟
ھما ناسرپدی یا گنوکی کہ إے درستیں جنجالانءِ بنیاد إنت، حاکماں آئیءِ نیمگا دلگوش دیگءِ عقل و زانت هچ نیست إنت. ھنچو کہ 'روچ گون دست چير دیگ بوت نہ کنت'، بلوچ راجی جیڑہ گوں مردمانءِ کشگ و زیان کنگ، ترسینگ و جنگا خلاص نہ بیت۔ پدا آواں بہ چار إتیں کہ جانمحمد دشتی شہ بلوچستانءِ ھما مردمان إنت کہ آئی تنے وھدی باور داشتگ کہ پاکستانی حاکم ھوش و سار کن أنت، و بلوچاں وتی سرڈگارءِ سرا آسودگیا زند گوازینگءِ حقا دے أنت۔ آئی تنے وھدی ھمے فکر داشتگ کہ أگر إسلام آبادءِ جابریں حاکماں وتی ناروائی بند کرت أنت، بلوچ أنگت ھمے ملکءِ جغرافیاءِ تھا زندگ بیگا راضی إبنت۔ هنچیں وھدےءَ کہ بلوچ سیاستدان و دانشورانءِ یک مزنین بھرے إے آسرا سر بوتگ کہ گوں پاکسانءِ حاکماں گپ کنگ و إدءِ جمھوری راھبنداں حقءِ لوٹگ بے سیت و معنائین خبرے إنت؛ جانمحمد دشتیءِ خیال بوتگ بلوچ پاکستانءِ تها جمھوری وڑا وتی حقاں گپت کن أنت۔ پشت کپتگیں بھر باندا۔
Rights reserved by www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت