سمیع بلوچ مذھبی کٹرے نہ إنت کہ جانفدا بیڑ بہ بارت؛ پت

پاکستانءِ سیمسری فوجءِ دستگیر کتگیں بلوچستان زانتجاھا وانگ دربروکیں سمیع بلوچءِ پت میر ھزار خان مینگل گشت کہ آئیءِ چک غریبے إنت، پہ وتی وانگءِ خرچاں دیگا آئی دگہ جاگھاں 'ٹیوشن' دیگا بیتگ۔ ھمے مقصدا شہ زانتجاھا درکپتہ بیتگ، ٹیوشن دیگا پد وھدے چھر ئی کتگ، گڈا راھا دستگیر إش کتگ۔

روچتاک توارءِ ردا آئی سرکچ داتگ کہ شہ چکءِ گورا شورہ درکپگ و وتکش کوٹءِ قصّہ سازتگین أنت۔ إیشانءِ مقصد بلوچستانءِ جاوراں خرابتر کنگ إنت۔ دیمترا واجہ مینگل درائینت "بلی توریں سمیع مسلمانے إنت، بلے بلوچے إنت و وتکش بیڑ برگ بلوچ دودمانءِ خلافا إنت"۔

گڈسرا میر ھزار مینگل گشت کہ آ یک کماشیں شھر وندےءِ حسابا شہ واکداراں لؤٹ کنت کہ چکـّا رسگا یلہ بہ دے أنت۔ تاکہ آ وتی وانگاں پَشت مہ کپیت و آئیءِ آیندہ پہ مدامی تھار مہ بیت۔ "ألبت أگر چک یلہ دیگ نہ بیت و آئیءِ کٹم گيئشتر دلسیاہ کنگ بیت، گڈا سرکارءِ خلافا تچکیں گامگیج زیرگ إبنت"؛ میر ھزار مینگلءَ گشت۔

Source: www.balochinews.com