کے شہ پھکان زوراکتر إنت؟

قصّہ ساچ: داود سالک

رجانک: کریم بلوچ -تــَهـل


چـُکـّانءِ دیوان

یک پگاهے مـوشکلـکےءَ وتی مات پول کت "منی مات کے چه پهکاں زوراک تر إنت؟
آئی ءِ ماتا کـَند إت و گشت ئی "هر کس وتی کساسا زوراک إنت"۔
موشکلکءِ خیالا آئیءِ مات گپ رپ کنگا أت۔ پمیشا گوں وت ئی گشت "من مرچی جنگلا رواں و پہ وتا زوراکیں سنگتے ودی کناں"۔

موشکلک چه وتی هونڈا دَرکپت، شت و شت تا که ژند بیت۔ آئی نشت و ڈگارءَ تِچک ئی کـَشّ إت. چم آزمانء دیما روچءِ سرا گپت أنت۔ گندیت که روچ باز پر رژن و گرم إنت. خیال ئی کت که روچ چه درستاں زوراک تر إنت۔ پر چا که سرجمیں هـَـنـد و جاهاں رژنا کنت.

چـِست بیت و گوانک ئی جت : او پر رژنیں روچ که آزماناں بـِرَشکگائے! منا یک زوراکیں سنگتے پکار إنت. باریں تو گوں منا سنگتی کنئے؟
روچ کند إت و پسّو ئی دات: راستے که منی رژن سک باز إنت و جهانءَ رژنا کنت، بلے جمبر چه من زوراک تر أنت پرچا که وهدے منی دیما اوشت أنت، منی رژنءَ دار أنت.

موشکلکا بانـُـکیں روچ موکل کت و جـَـمّرانءِ شوهازا روان بیت. گوں وتا گشت ئی که من گوں جمراں سنگت بیاں. آزمانءَ یک شینکے دیست ئی. شت و شت تاکه شینکءِ چیرا سر بیت.

جمبرءِ شینک ئی سلامے دات و گشت ئی " اَو پُر هئوریں جمبر! منا یک زوراکیں سنگتے پکار إنت. باریں تو گوں من سنگتی کنئے ؟
شینکا کند إت و گشت ئی "راستے که روچءِ دیما داراں۔ من گواراں، پر شما آپ کاراں. بلے گوات چه من زوراک تر إنت. پرچا که همائی منا هرنیمگا کـَشّیت بارت.

موشکلکا جمبر موکل کت و گوں برزیں تـَوارےءَ گوات ئی گوانک جـَت. همے که خاکءِ دنز آزمان ءَ چست بیت؛ موشکلکا زانت که همیشی گوات إنت که آتکگ. موشکلکا گوات سلام دات و گشت ئی: اَو زوراکیں گوات که تو هر نیمگا روانئے! منا یک زوراکیں سنگتے پکار إنت۔ بارین تو گوں من سنگتی کنئے؟
گوات پسو دات : راستے که من هر جاه شُت کناں، بلے کوه چه منا زوراک تر أنت. پر چا که وهدے من کوھاں سر بیاں، کوه منا دار أنت، و من جنزینت إش نہ کناں!

موشکلکا گواتءِ منت گپت و سر گپت؛ شت. یک بُرز، شَتک و تـَـلانگیں کوهے‏ءَ رَس إت. کمے کوها سر کپت و گوں بُرزیں تَوارےءَ کوه ئی سلام دات و گشت ئی: اَو برز، تیهُر و شَهزوریں کوه ! منا یک زوراکیں دوستے پکار إنت. باریں تو گوں من سنگتی کنئے؟
کوه کند إت و گشت ئی: راستے که من بُرز بالاد، سَـکّ و ڈِکـّینیاں، بلے وهدے که ڈگار وتی کوپگاں چَنڈیت، گڈا منی بالاد لـُمبیت و ڈوک شـَل أنت. ڈگار هزار سر چه من زوراکتر إنت.

موشکلک کوهءِ منـّت گپت و گشت ئی : جوان إنت، گڈا من رواں و گوں ڈگار‏ءَ سنگتی کناں. چه کوها جـَهل إیر کپت، ڈگارءَ که رَس إت. ڈگارئی گوانک جت: او پر زوریں ڈگار که کوهاں گوں کوپگاں چنڈینت کنئے! منا یک زوراکیں دوستے پکار إنت۔ بارین تو کوں من سنگتی کنئے؟
ڈگارءَ کند إت و پسوئی دات: إے راستے که من سک مزناں، بلے چه منا زوراکتریں هم سک باز إنت۔ په درور تئی جند که منا ٹــُنگ کنئے و منی أندرا پہ وتا لوگ ٹــَهینئے!

موشکلک نوکی وتی ماتءِ هبرا سرپد بیت که هرکسے وتی کارا کت کنت۔ ألبت أگر پہ جوانی فکر بہ کنت۔

Source: http://www.pahra.blogsky.com/,

Edited by http://www.balochinews.com/