بلوچستانءِ آزادیءِ روچ ھرجاہ دارگ بوت

ماں بلوچستان و شہ بلوچستانءَ در نندوکیں بلوچاں وتی سرڈگار بلوچستانءِ آزادیءِ روچ 11 آگستءَ شادھی، مچّی و دیوان إش کت۔ ھر ھندا بلوچستانءِ بیرق ٹال کنگ بوت أنت و بلوچ وانوکانءِ سوت 'ما چکـّیں بلوچانءِ' وانگ بوت۔

پاکستانی واکان ماں بلوچستان جھد کت کہ شادھی کنوکانءِ دیما بہ گر أنت و آواں بلوچستانءِ قومی بیرقا ٹال کنگا مہ ھلّ أنت۔ ألبت بازیں کسانءِ گرگ بیگا پد ھم راھدربرانءِ لوٹءِ پدا 11 آگست کلاک 11ءَ سرجمیں بلوچستانءِ شھر و میتگاں بلوچستانءِ بیرق ٹال کنگ بوت أنت۔

رستگ و شنگ بیتگیں حالانءِ ردا ماں درملکاں ھم ھمے روچءِ درگتا دیوان برجم دارگ بیتگ أنت۔ شہ پھکاں مزنتریں مچّی ماں لندن برجم دارگ بوت۔ مڈل إیسٹءِ مزنتریں دیوان بحرین بلوچ کلبءَ برجاہ داشت۔ سویڈینءِ شھر إسٹکھولمءَ بلوچ مچّ بیت أنت و بلوچستانءِ آزادیءِ روچ إش یاد کت۔

ماں لندن برجم داشتگیں دیوانا قومی جنزءِ سروکیں راھدربر میر خیربیار مریءَ ھم بھر زرت۔ آئیءِ کشا أعلا حضرت میر سلیمان داؤد ھم گون أت۔ ھوریا دگہ سریں جھدکاراں گوں دیوانا تران کت۔

راھدربر میر خیربیار مری و راھشون أعلاحضرتءَ آزادیں بلوچستانءِ آزادیا گوں زور پچگرگءِ پاکستانی کارکرد إیر جت۔ آواں بلوچ قوم دلجمی دات کہ بلوچستانءِ آزادیا پدا دستگرگءِ روچ نزیک إنت۔

ھر دوئیں واجھکاراں یکتواریا گوں پاکستانءَ دیوان و گپ کنگ نہ منّ أت و لوٹ إش کت کہ پاکستان وتی فوجا شہ بلوچستانءَ در بہ کنت۔ أگر چؤش نہ بوت، گڈا فوج یک بیمناکیں عاقبتےءَ سر إبیت۔

أعلا حضرت میر سلیمان داؤدءَ جار پرّینت کہ 'آزاد بلوچستان کونسل' جؤڑ کنگ بیتگ۔ ألبت باسکانءِ جانسلامتیءِ سببا دیمترا آوانءِ نام ظاھر کنگ إبنت۔
Source: www.balochinews.com