پاکستانءِ شمالی ھندان ملکءِ پنچمی صوبہ جوڑ کنگ منظور

بی بی سیء ردا پاکستانءِ شمالی ھند کہ چدا پیسر تچکا إسلام آبادءِ دستا بیتگ أنت، نیں 'گلگت و بلتستان' نامیں پَرگِنگے جؤڑ إبنت۔ گلگتءِ مردمانءِ دیریگیں واھگ بیتگ کہ آوانءِ سرڈگارءِ گستائیں مقام منـّگ بہ بیت۔ إے فیصلہ پاکستانی وزیران کتگ و ضروری إنت کہ إیشیءِ پلانگریا أسمبلیءِ باسک ھم بہ زیر أنت۔

ترانگ بہ کپ إت کہ ماں لندن نواز شریف، بے نظیر بٹو و دگہ مشرف مخالف سیاسی سروکاں دیوان کتگ أت۔ اودا 'میثاقءِ جمھوریت' نامیں قرارے بندگ بیتگ أت۔ یکـّے شہ قراربندءِ لوٹاں پاکستانءِ شمالی ھنداں گوں پٹان صوبوا ھؤر کنگ أت۔

إیشیا أبید بازیں سیاسی ٹولی پاکستانءَ أنگت کسانتریں ٹکـّراں بھر کنگا واھوک أنت۔ آوانءِ خیالا إے ڈؤل کنگا ملک إیمنتر و مردم خـُرسُند تر إبنت۔ سرائیکیانءِ دیریگیں واھگے إنت کہ آوانءِ ھند شہ پنجاب جدا کنگ و سرائیکستانءِ ناما جدائیں پرگنگے جؤڑ کنگ بہ بنت۔

.

گلگت و بلتستانءِ مردمی آبادی کم یا گيئش دو میلیون إنت و چاریں سِریکاں زمین ئی 72 ھزار کلومیٹر إنت۔ سیمسر ئی گوں أفغانستان و چینءَ ڈ ُکـیت۔ جنوبی نیمگا کشمیر و مغربی نیمگا پاکستانءِ پرگنگ 'سرحد' إنت۔
Source: www.balochinews.com