کراچیءَ کوھنیں ریکسر لین و گولیمارءِ بلوچاں مرچی ھم کارجاہ بند کتگ أنت و پہ گاڑیانءِ روگ و آیگا دگ بند أنت۔ زییں روچا ھندی بلوچ مردمانءِ سرا متحدہ قومی موومنٹءِ سلاحبندیں مردماں تیر گواری کتگ أت۔ دو پولیس و چار بلوچ تیرانءِ لگـّگا ٹپـّی بیتگ إتنت۔ ھمے درگتا پولیسا بازیں بلوچ دستگیر کتگ إتنت۔رستگیں نوکتریں حالانءِ ردا زییں روچا کہ یک نیمگے شھید أعظم نواب أکبر بگٹیءِ شھادتءِ روچ بیگءِ سببا و پدا ھندی یک پارکےءِ سرا متحدہ مافیاءِ زور دستگرگءِ خلافا بلوچاں یک لشکرے سرجم کت. لشکر دیم پہ زور گپتگیں پارکا شت۔ اودا شہ پیسرا گوں تفنگاں ساڑییں مھاجراں آوانءِ سرا تیر جت۔
تیرانءِ سببا ٹپـّییں مردمانءِ نیاما یک ھفتاد سالگیں بلوچ جنیں آدمے ھؤر إنت۔
ھمے ردا بلوچ چاگردی جھدکار و 'ٹرانس لیاری بچاؤ تحریک'ءِ سروک واجہ نادر بلوچءَ گوں روچتاک دی نئشن چیزے روچ ساریا گشتگ أت "بلوچانءِ میتگءِ تھا دھاں سال کوَھنیں پارکے ھست إنت کہ 'گٹر باگیچہ'ءِ ناما زانگ إبیت۔ ألبت سند گورنرءِ پلانگری زرتگیں سلاحبندیں مردماں إیشی پہ زؤر دست گپتگ۔ ما سرجمیں قانونی راہ چکـّاستگ أنت، بلے سیت نہ رستگ۔ پمیشا ماں 26 آگستءَ مچّی کنگءِ جار جتگ"۔
نادر بلوچءَ گشتگ أت کہ آ وتی چکـّانءِ لئیبجاھا دِگراں دات نہ کن أنت کہ بھا ئی بہ کن أنت۔ پہ إیشیءِ رکـّينگا سرجمیں دراں ٹـکــّگءِ کارا آوانءِ گل برجاہ داریت۔
بلوچ اُستمان و مھاجر مافیاءِ إے دیم پہ دیمیا کراچیءِ مھاجر میڈیا دو ٹولیانءِ جنگ ظاھر کنگا إنت۔ إیشیءِ مثال روچتاک ٹائمز رپورٹ إنت کہ اودا بلوچ میتگءِ پارکا دستگرگ و لوگ بندگءِ کارکردا روا شون دیگءِ جھد کنگ بیتگ۔ رپورٹءِ ردا 'کراچی ترقیاتی پروگرام'ءِ سببا پرؤشگ بیتگين لوگانءِ واھند ماں ھمے پارکا پہ نوکیں لوگ بندگا جاگہ دیگ بیگا أنت۔
ألبت ھندی جھدکارانءِ گشگ إنت که ھما بلوچ و دگہ غیر مھاجریں مردمانءِ لوگ کہ 'لیاری إیکپرئس وے' منصوبہءِ ردا پرؤشگ بیتگ إتنت، آ شھرءِ کش گوراں جاگہ دیگ بیتگ إنت۔ بلے سرکارا وتی مردم دیر راہ دیگا دل نہ بنت۔ پمیشا بلوچانءِ کوَھن و ضرورییں آسراتییےءَ پہ وت ماڑی أڈ کنگءِ واھگا دستگرگ جھد بیگا إنت۔Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت