من پدا کایان -لچّه: داکٹر فضل خالق

منا بہ جن
منا تو لٹ کٹ بہ کن
منی تو لنکـُکاں بہ گــڈ
منی زبانا بُرّ
منی تو چمّاں در بہ کن
منا تو لنگ و کـرّ بہ کن
منی تو بـوءِ مارگءِ سماءَ بر
منا تو دؤرا کش
منا بہ کش
منی کتاباں درّ، تاک تاک بہ کن
منی تو شعراں چنڈ چنڈ بہ کن

---٭\٭/٭---

بلے سمین کہ کئیت زھیر نال إبیت
جُڑانءِ میتگا دمال إبیت
أے نمب إبیت سُراں
تیابءِ چَول إبنت پروشاں
إے ریک أرزنیں کہ بال کنت
إے آپ زمزمیں کہ گال کنت
إے کوہ شانےءَ کہ مکّ إبنت
إے گٹ و گر ھم گپ جن أنت

---٭/٭\٭---

ھمودا من پدا
وتی زمیں سرا
گـومے درا بیاں
تھا واھگانءِ جاہ کناں
مھر و دوستی مں کشاں
خیالءِ واباں درچناں
گشاں
زمینءِ وارثاں
وتی دیارءِ حاکماں
وتی مں ڈیہءِ واجھاں
مں آجواں
مں آجواں