إیرانی راکٹانءِ کپگا سئے بلوچ جنیں شھید و دو کس ٹپـّی بیت أنت

إیرانی واکاں دوشی ماشکیلءِ سرا راکٹگواری کت۔ راکٹانءِ کپگءِ سببا سئے بلوچ جنیں آدم شھید بیت أنت۔ دگہ دو کس ٹپـّی بیت أنت۔

ماشکیل تحصیلءِ ناظم حاجی آغا خان ریگیءَ بی بی سیءِ حالکار سھیگ کت کہ پنچ فٹ دراج و چار إنچ زنڈیں راکٹانءِ چکـّا إیرانءِ نمبر و نشان جتگ أنت۔

پاکستانءِ سیمسری فوجی و ھندی پولیساں تنے وھدی سئے راکٹ در گپتگ أنت و پہ آدگرانءِ درگیجگا شوھازیگ أنت۔ تحصیلدار نصیر بلوچءَ گشت کہ إیرانءِ سیمسرءِ نزیکی کلــّگاں بازیں لوگ و ھندی نادراھجاہ راکٹانءِ لگـّگا پروشتگ أنت۔

پاکستانءِ سیمسرا نِندارینتگیں رستگاری واکاں گشت کہ راکٹ شہ إیرانءِ تھا و دگءِ سرا ألگچ کنگ بتیگ أنت۔ و إے خبرا ھچ شک نیست إنت کہ راکٹ دئور دیوک إیرانی واکدار بیتگ أنت۔

نصیر بلوچ دیمترا درّائینت کہ شپءِ نیما میتگءِ سرا إیرانی واکانءِ راکٹگواریءِ سبب زانگ نہ بیگا أنت۔ پرچا کہ ھچ چوشیں کپتے نہ کپتگ کہ إیرانی واکاں زھر بہ برائینیت۔

مرتگیں سئیں جنیں آدم محمد حیات ریگیءِ لوگءِ سرا راکٹ کپگءِ سببا کشگ بیتگ أنت۔ ھمے إیرانی کارکردءِ خلافا ھندی مردماں وتی کارباری بنجاہ مرچی بند کتگ أنت۔
Source: www.balochinews.com