نشنل پارٹیءِ بنجاھی سروک داکٹر مالک و کارگشاد طاھر بزنجو گشت کہ پَرگِنگ بلوچستانءِ سیاسی سرکار بے واک إنت، أصلی واکدار چیریں دست أنت. بلوچستانءِ جاورانءِ خراب کنگ ھمے چیریں دستانءِ کارکرد إنت۔دوئیں سیاسی راھشوناں ماں کوئٹہ پریس کلب وتی گپانءِ تھا پدّر کت کہ ھر وھد پہ جاورانءِ گھتر کنگا سیاسی دیمروی کہ بیت، گڈا چاریگ دستمانجیا بنگیج کن أنت۔
آواں مثال دات کہ چاریگانءِ دستمانجیءِ نوکتریں کارکرد گوَستگیں روچا مستوگ بازارا اُستمانءِ دستا گرگ بیتگیں أصغر و أفضل نامیں درامد أنت۔ إیشاں بلوچی پچ پؤشِتــه بیتگ و ماسٹر حاجی صالح محمدءِ سرا شہ کورٹا درکپگءِ درگتا روچ رحمانا تیرگواری إش کتگ۔ ھمے تیرگواریءِ سببا ماسٹر صالح محمد سکّ ٹپـّی بیتگ۔
اُستمانءِ دستگیر کتگیں إے دوئیں کس أیبٹ آباد -پنجابءِ جاھمنند بیتگ أنت و شہ إیشاں یکـّےءِ کیسّگا چاریگانءِ کارٹے دستا کپتگ۔ إیشی ثابت کنگا إنت کہ چیریں دست بلوچ و بلوچستانءَ بدنام کنگ لوٹ أنت۔
داکٹر مالک چاریگان کارکرد إیرجت أنت و گيئش کت کہ نشنل پارٹی ٹارگٹ کلنگءِ خلافا إنت۔
طاھر بزنجو درّائینت "إسلام آبادءِ پالیسی أڈ کنوک سیاسی راھبندےءَ بلوچستانءِ جیڑواں ٹھینگا واھوک نہ أنت۔ کشگ، دستگیر کنگ، لٹ کٹ و بلوچستانءِ مردمانءِ دلاں ترس دئور دیگءِ راھبندے إسلام آباد دیما برگا إنت۔ پہ زور مردماں إیرموش کنگءِ کارکرد جاوراں خرابتر کنان إنت۔
ماں حالکاری دیوانا جار پرّینگ بوت کہ نشنل پارٹیءَ یک سئے ماھی منصوبہ بندییے کتگ۔ گلءِ سرجمیں جھلی تک سوج دیگ بیتگ أنت کہ سئے ماھی منصوبہءِ سرا کار بنا بہ کن أنت۔
Source: www.balochinews.com
هیچ نظری موجود نیست:
ارسال یک نظر
وتی کلوا چێرا نبیس إت