مغربی و مشرقی بلوچستانءِ آزادی لوٹوکیں جھد۔ چمشانک: ولید گربنی

بحثے کہ مرچاں مغربی بلوچستانءِ بلوچ سیاسی جھدکارانی نیاما دیما رَوَگا إنت ھمیش إنت کہ مغربی بلوچستانءِ آزادیءِ گپا جنوکیں سیاسی گل 'بلوچستانءِ راجی زرمبش'ءِ سرا مشرقی بلوچاں اثر کرتگ۔ ھمے نظرءِ مردمانی گوشگ إنت کہ راجی زرمبش إیرانءِ جاوراں ڈالچار کنگا إنت۔ آوانی خیالا إیرانءِ جاور چوش نہ اَنت کہ اودا آزادیءِ گپ جنگ بہ بیت؛ ألبت، پاکستانءِ جاور پہ آزادی لوٹوکیں بلوچاں گيگ أنت۔ ھمے بحثءِ دویں سراں دیما بروک مغربی بلوچستانءِ جھدءِ پژدرا ڈالچار

کنگا أنت؛ شاید روا مہ بیت اگر بہ گوشئے شہ پژدرا ناڈاہ أنت۔

راستی إیش إنت کہ أگر مردم میر دوست محمد خانءِ 1928ءِ جنزا شموشکار إنت؛ بلہ مغربی بلوچستانءِ عبدی خان، جمعہ خان، رحیم زردکوھی، أکبر بارکزئی و دگہ جھدکارانی گل 'بلوچستان لبریشن فرنٹ'ءَ کہ ماں عراق پہ مغربی بلوچستانءِ آزادیا ٹھینگ بیتگ أت؛ مہ شموش أنت۔ ھمے ٹولیءِ جھدکار رحیم زردکوھیءَ بلوچستانءَ چھر کنگا رند إیرانءِ خلافا سلاحبندیں جنگے 'زرمبش'ءِ ناما بنا کرت و ھمے راھا وتی سر ئی ندر کرت۔ أکبر بارکزئیءَ گوں سنگتاں ماں لندن 'گریٹر بلوچستان'ءِ ناما تاکبندے کشّ إت۔ أکبر بارکزئی گوں سنگتاں أولی کس إتنت کہ 'گریٹر بلوچستان'ءِ نقشہ إش ٹھینت۔

مشرقی بلوچستانءَ آزادیءِ گپ شہ قلاتءِ زورگرگا پد إیوکا پرنس عبدالکریمءَ بنا کرت۔ وھدے آ دستگیر و بنديگ کنگ بوت، گڈا آزادیءِ جھد زمینءِ چیرا برگ بوت۔ سربُرا پہ پاکستانءِ ون یونٹءِ پروش دیگا مردم گوں بنگالیاں ھوار جھدا گولایش بوت أنت۔ پدا دومی رندا کہ آزادیءِ گپ شہ مشرقی بلوچستانءَ چست بوت آ شھید أعظم نواب أکبر شھباز بگٹیءِ شھادتا پد إنت۔ ألبت، ھمے نیاما 'گریٹر بلوچستان لبریشن آرگنایزشن' نامیں گلےءَ کہ آئیءِ راھدربری مغربی بلوچستانءِ مردمانی دستا أت، آزادیءِ گپ ئی جت۔ ھمے گلءِ مسعود سردارزئیءَ مان لندن برجم داشتگیں دیوانےءَ گوشت کہ بلوچستانءِ جیڑوانی إیوکیں حلا آوانی گل راجی آزادی تها گندیت۔ ھمے مسعود سردار زئی کہ میر عبدی خانءِ نماسگ إنت؛ مرچی 'بلوچستان لبریشن آرگنایزشن'ءِ سروک إنت۔

بلی توریں مشرقی بلوچستانءَ آزادیءِ گپ بیگا إنت، سیاسی و سلاحبندیں جھدکار آزادیءِ پلانگریا بیان دی أنت، بلہ اودا بادے مرچی چشیں سیاسی گلے نیست إنت کہ آئیءِ آیین یا پروگرامءِ توکا بلوچستانءِ آزادیءِ گپ بہ بیت۔ مغربی بلوچستانءَ چدا پیسر ھم بیتگ و أنگت ھم 'بلوچستانءِ راجی زرمبش'ءِ ناما ھچوشیں گلے ھست إنت۔

مرچی مشرقی و مغربی بلوچستان دیم پہ یکتواریا گامگیج أنت۔ أولی بر إنت کہ مشرقی بلوچستانءِ سریں جھدکار مغربی بلوچستانءِ سرا بیوکیں زوراکیاں إیرجنگا أنت کہ چدا پیسر نامداریں سردار عطاء اللہ مینگل ھم مشرقی و مغربی بلوچستانءِ یکـّیءِ تاریخی حقیقتا منـّوک نہ بیتگ۔ پمیشا إے گپ کہ مغربی بلوچستانءِ جھدکارانی دپا آزادیءِ لوٹ شہ مشرقیاں آتکگ؛ رد إنت۔ إیشیءِ بدلا چوش گوشگ شرتر إنت کہ مشرقی بلوچستانءَ راجی آزادیءِ فلسفوا ردوم دیوکیں بلوچانءِ بُنزہ مغربی بلوچستانءَ إنت۔ مرچی کہ پھک یک و یکتوار أنت کہ إیران و پاکستانءِ زورگری آسر کنگ بہ بی انت؛ إے سوبینیءِ توکا جمعہ خان، عبدی خان و دگہ بنی جھدکارانی بنا کرتگیں جنزءِ کارکردا سرگوَز کنگ روا نہ إنت۔

پمیشا بلوچ جھدکار أگر وتی واکا فیڈرلزم، سوشلزم و یا دگہ إزمےءِ ردوم دیگءِ بدلا لبریشنءِ فلسوا رندگیری بہ کن أنت، إیشیءِ ثمر پہ قومءِ عاقبتا شہ ھرچیزا گيشتر أنت۔ مردمانی ترس إنت کہ بازیں بلوچ آزادیءِ راھا تاوان بی انت، گڈا شہ آواں دستبندی إنت کہ دپترا بہ چار أنت و بہ گش أنت باریں گيشتر بلوچ آزادیءِ راھا شهید بیتگ أنت یا کمیونزم، سوسیالیزم، سلطنت طلبی، مجاھد، سنی و بلاہ بترءِ ناما زوال بیتگ أنت؟