سالءِ گوَستگیں روچانءِ نزوریانءِ سرا پشومانیا درشان کنگءِ روچ

سالءِ گوَستگیں روچانءِ نزوریانءِ سرا پشومانیا درشان کنگءِ روچ مرچی إنت
تبصرہ: ولید گربنی

ماں برطانیا بیوکیں شہ یک پولکاریےءَ سرپدی رستگ کہ 29 دسامبر سالءِ ھما روچ إنت کہ مردم وتی نزوری و سلکاریانءِ سرا پشومانیءِ مارشتانءِ آماچ إبنت۔

ھر کس وتی دلا گشیت کہ آئیا إے کار مہ کتین أت، فلاں سودا مہ جتین أت، آ چیز مہ زرتین أت و فلان وراک مہ واتین أت۔ لھتے کس وتی کمکاریءِ سرا أفسوز کن أنت و دگہ لھتے وتی باز خرچی سرا پشومان إبنت.

.
'ٹلیگراف'‏ءَ شنگ بیتگيں پولکاریا بھر زیروکیں 2،000 مردمانءِ صدا چل کساں گشتگ کہ شہ کرسمس چار روچ رند و شہ نوکیں سالا چار روچ ساریا بیگءِ وھد ھما إنت کہ آ وتی سرا وت أفسوزیگ إبنت۔

شاید پمیشا ھمے روچا میلیونانءِ حسابا مردم فیصلہ کن أنت کہ آیوکیں سالا آ بازیں کاراں نہ کن أنت۔ چؤش کہ شراب کمتر بہ ور أنت، سگریٹ مہ کش أنت، چرپناکیں وراک مہ ور أنت و پہ ورزشا ورزشگاھا بہ رو أنت۔

ھنچؤشیں وھدے کہ برطانیا و دنیاءِ دگہ جاھکپتگیں قومانءِ مردم وتی جانسلامتیءِ باروا فیصلہ کن أنت، پدمنتگیں بلوچ قوما ضرورت إنت کہ وتی ناتپاکی سرا پشومان بہ بیت۔

ناسرپدی، کم علمی، بےعملی و یکـّا دگرءِ خلافا کـُلکـُچَگءِ بدلا گوں عِلما سلاحبند تپاکی و ھؤرکاریءِ پڑا دئور کنگءِ ضرورت إنت۔ ھمے پڑا یکـّا دگرا اوپار کناں 'سازمان یافتہ' پیئشکنزاں بیگ پکار إنت۔

سوب گوں سازمان یافتھیں تپاکیا إنت۔ وتی جاھا ھر یکـّےءِ شیر بیگءِ رستری راهبند بے سیت إنت۔