دوشنبہءِ روچا ماں کراچی نندوکیں ھزاراں بلوچ ماں دگاں دراتک أنت و پیش إش داشت کہ مھاجر ٹِرورزم و سرکاری 'ٹارگٹ کلنک'ءَ أنگت آ پرؤش نہ داتگ أنت۔
لیاریءِ نندوکیں ھر عمرءِ جنین و مردیں آدم یک لشکرےءِ دروشما شہ لیاری دیم پہ شھرءِ دلگاھا ھستیں پرئس کلبءِ دیما شت أنت۔ مھاجر ٹِرورسٹ گل 'متحدہ قومی موومنٹ' و پاکستانءِ تھی جاورانءِ وزیر رحمان ملکءِ خلافا تھل و ترندیں دانک بلوچانءِ لشکرا ماں راھا کوکـّارکناں کت أنت۔
لشکرءِ چکـّا پولیسا أرس ریچی گئس ھم دئور دات۔ ألبت بلوچ شنگ شانگ نہ بیت أنت و گوں دلیری پرئس کلبءِ دیما رس إتنت۔ اودا سروکاں تران کت و گوں تھلتریں گالاں ٹرورسٹ مھاجر و ٹرورسٹ رحمان ملک إش إیرجت۔
ٹرورسٹیں متحدہ قومی موومنٹءِ واھند ألطاف حسین و رحمان ملکءِ بُتاں سوچگءِ کشا مچّیءِ سروکاں لوٹ کت کہ رحمان ملک رسگا شہ وتی اُگدھا دیر کنگ بہ بیت۔
کراچیءِ بلوچانءِ کوشءِ خلافا ماں پاکستانی سئنٹ ھم چست إیر بیت۔ سنئٹءِ تھا بلوچستانءِ نمایندگی کنوکیں داکٹر مالک بلوچ و إسماعیل بلیدائیءَ دیوان تھروز کت و شہ اودا درکپت أنت۔
ماں بلوچستانءِ أواریں ھنداں بی إس او –پجّارءِ باسک و منـّوکاں ظاھری دات۔
روچتاک إنتخابءَ شنگ بیتگيں حالےءَ داتگ کہ 11 جنوریءَ مستونگ، قلات، خضدار، نال، حب، گوادر، تربت، پنجگور، نوشکی، دالبندین، سبی، بھاگ، ڈیرہ مرادجمالی، ڈیرہ أللہ یار، اوستہ محمد، صحبت پور و دگہ ھنداں بی إس او –پجّارءِ سرجم کتگیں مردماں بلوچانءِ سرا بیوکیں زوراکی إیرجت أنت۔
بی بی سیءِ داتگیں حالےءَ گيئش کتگ کہ زھرگپتگیں مردماں بلوچستانءِ کارگاھی ھند 'حب' ءِ دمک و دگ پہ روگ آیگا بند کتگ إنت۔ إیشیءِ سببا ھزاراں مردم وتی کارءَ رَوَگا بے سوب بیتگ أنت۔
زانگ ضروری إنت کہ بلوچستانءِ شھر 'حب' شہ کراچی نزیک إنت، پمیشا اودا بازیں کارگاہ جوڑ کنگ بیتگ أنت۔ و آوانءِ تھا کارکنوکیں سرجمیں مردم ماں کراچی جاہ منندیں مھاجر أنت۔
هیچ نظری موجود نیست:
ارسال یک نظر
وتی کلوا چێرا نبیس إت