ھمے ھنییاں رحیم بلوچستانیءِ یک سیاھگے شنگ بیتگ أت که آزادیءِ بدلا فیڈرال رواج ئی په مغربی بلوچستانءِ مشکلانی حلاّ شرتریں رواج ظاھر کرتگ أت. چدا پیسر بلوچستانءِ راجی زرمبشءِ راھدربر عبداللہ سیاھوییءَ فدرالءِ بدلا آزادیءِ پلانگریا سیاھگے رد بند داتگ أت. ھر دویں واجھانی گپانی خلافا یا پلانگریا أگر کسےءَ گپے ھست أت؛ گوں آوانی جندا گوشگ بوت أنت. إے سیاھگءِ تھا حزب مردمءِ پیش کرتگیں مغربی بلوچستانءِ بیرقءِ باروا واجه رحیمءِ نبشتانکا آتکگیں یک نکتوےءِ نیمگا دو دانک رد بند دیگا من ضروری مارگایاں.
شه ھما روچا که بلوچستانءِ اُستمانی گلا ماں وتی ویبجاھا بیرق جتگ أت، من وتی بلاگءِ تھا آئیءِ پلانگریا براں برانا سیاھگ شنگ کرتگ و دگه جاگھاں بیرقءِ دوستدارگ بیگءِ حال یکـّوئی داتگ أنت. ھمے درگتا ماں لندن نندوکیں ھما بلوچانی عکس ھم شنگ کرتگ أنت که وتی مِیڑیاں ھمے بیرق إش ٹال کرته بیتگ. و یا إیشیءِ باروا چیزے گوشتگ إش. ماں ھما مچّی و دیواناں که آوانی سرجم کنگا زرمبشءِ جھدکارانی مزنیں دستے ھوار بیتگ ھم بیرق آرگ بیتگ و زرمبشءِ دوستاں إے درگتا بیتواری گچیں کرتگ داں بلوچءِ تپاکی تاوانبار مه بیت.
من ھمے ردا باز براں زرمبش و جبھه متحدہ بلوچستان سِکیں داتگ أنت و یا دیم په دیم دستبندی کرتگ أنت که آ ھم ھمے بیرقءِ پلانگریا به زیر أنت. عاقبتا جبھه متحدہ بلوچستان –فدرالءَ بیرق وتی ویبجاھا جت. زرمبشءِ سریں جھدکاراں ھم ماں مچّی و دیواناں ھمے بیرقءِ چيرا گشتانک دات. إیشیءِ نوکتریں مثال 11 آگست 2009ءَ بلوچستانءِ آزادیءِ symbolicروچءِ درگتا ماں لندن برجم داشتگیں دیوان إنت. ھمے دیوانءِ جارچینی زرمبشءِ سریں جھدکار واجه أسماعیل أمیریءَ گون أت و حزب مردمءِ بیرق ماں میزءِ سرا تالان أت.
ھمے دیوان به بیت یا چدا پیسر؛ ھچ کس گواھی دات نه کنت که ماں لندن نندوکیں حزب مردم بلوچستانءِ هستیں جھدکار یا جھدکاراں شه وتی نیمگا وتی بیرقا دیما برگءِ جھد کرتگ. أگر جاھے بیرق ظاھر کنگ بیتگ، گڈا ھما وھدی أت که ناصر محتشمی حزب مردمءِ پلانگریا زیرگا أت. ھمے ناصر مرچی زرمبشءَ ھوار بیتگ. یا 'بلوچ ھیومین رایٹس'ءِ غلامحسین بلوچ بیتگ که آئیا شه وتی خرچا بیرق أڈ کناینتگ، دیواناں آرتگ و ورنایانی دستا داتگ. إے سرجمیں وھدا حزب مردم بلوچستانءِ ھچ کرد نه بیتگ.
إیشی ثابت کنت که رحیم بلوچستانیءِ جند بیرقءِ دیما برگا إنچو ھدوناک نه إنت. ألبت، زرمبشی أنت که ھنی ھمے مارگا أنت که په جھدءِ دیما برگا بیرقا یک زنڈیں کردے بیت کنت. بلوچی نیوزءِ مدیرءِ حیثیتا من به بیاں یا ناصر محتشمی و غلامحسین بلوچ؛ ما پھک گوں زرمبشءَ ھمتواریں که بیرق پکار إنت. ألبت، ودی إنت که په لھتے سر ظاھریں راجپھازاں که وتی سیاستءِ سببا دوستاں دلرنج کنگا واھوک نه أنت؛ بیرق و قومءِ أھمیت شه سنگتاں شاید کمتر به بیت.
ھمے فکرانی واھند مرچی مارگا أنت که زرمبشءَ نوکیں راھے گپتگ و ھمے گچیں کرتگیں راھا ماں مردمانی نیاما گلءِ نام په وشی جَکسینتگ. ھمے برکتا بازیں مردماں وتی نیمگا جزب کنگا إنت. په بلوچ قومءِ تپاکیا زرمبشءَ حزب مردمءِ نیمگا دوستیءِ دست ھم دراج کرت و أنگت ھم گندگا دراج إنت. په قومی جھدکارانی یکجاھی و ھمدستیا باندا روچ شاید زرمبش ھمے حزب مردمی بیرقا ھم به منـيت، و حزب مردم گوں زرمبش ھوار به بیت. ألبت، حزب مردمءِ تھا لھتے مردم په زانت یا ناسرپدی زرمبشءِ شھار داتگیں دوستیءِ دستا بُرّگءِ جھدا أنت. اُمید إنت که دویں گلانی 'مخلصیں' جھدکار إے وڑیں دستاں سوبیں بیگا نه إلّ أنت.
هیچ نظری موجود نیست:
ارسال یک نظر
وتی کلوا چێرا نبیس إت