یعقوب و دگہ صداں کساں شھید کنگءِ سرا بےتوار و ھردسالیں إبراھیمءِ بندیگیا کِمار نہ کنوکیں سنی ملا إسماعیلزھی تھرانی گجرانءِ کشگ بیگا لاپسوچیگ إنت۔
زاھدان جاھمنندیں سنی ملا عبدالحمید إسماعیلزھیءَ ماں تھران دو گجراں پاھو دیگءِ سرا وتی دلپدردی درشان کت۔ آئیا گشت کہ مردماں درنجگ جیڑواں حل نہ کنت۔ إے گپ آئیا 29 جنوریءَ جمعہءِ نمازءِ درگتا درشان کت أنت۔
آئیا گشت: مردمانءِ زورا شاھی نظامءِ بدلا جمھوری إسلامی جاہ کپت؛ سلاح زورا إنـّا۔ دنیاءِ ھچ نظام سلاحءِ زورا دارگ نہ بیتگ. پمیشا جھموری إسلامیءِ برجاہ دارگا مردمانءِ رضا پکار إنت۔
ماں بی بی سی شنگ بیتگیں حالا دیمترا شہ ملا عبدالحمید إسماعیلزھی نقل قول کنگ بیتگ کہ پہ مردمانءِ راضی کنگا ذموار راھے دربگيج أنت۔ پرچاکہ ھنوگیں إسلامی نظام گوں یک ٹولییےءَ دارگ بیت نہ کنت۔
گٹــّوس کنگ و درنجگ بیتگیں مردمانءِ باروا ملاءَ گشت: مئے ملک شہ ھما ملکان إنت کہ اودا باز مردم درنجگ بیگا أنت۔ پدا بلوچستان پرگنگا درنجگ بیتگيں مردمانءِ حساب شہ دگہ پرگِنگاں أنگت گيئشتر إنت۔ مردماں درنجگ جیڑواں نہ ٹھینیت؛ آواں گيئشتر کنت۔ پمیشا من گوں نیکیں واھگےءَ دسبندی کناں کہ ھمے مسئلہءِ سرا دلگوش گوَر کنگ بہ بیت۔
بی بی سی و دگہ جاگھاں بیتگیں تبصروانءِ ردا ماں تھراں دوکساں درنجگءِ باورا ملاءَ تچکا ھچ نہ گشتگ، بلے شہ محمد علی زمانی و آرش رحمانی پورءِ درنجگ بیگا دو روچ رند وتی گشتانکءِ تھا إے باورا خبر کنگءِ مقصد ھمے کارکردا إیرجنگ بیتگ۔
آ دگہ دیما تھرانءِ شیعہ عالمےءَ ماں وتی جمعوی گشتانکا سرکاری واکانءِ منـّت گپتگ أنت کہ آواں نامگپتگیں دوئیں کس درتکگ أنت۔ أحمد جنـّتی نامیں شیعہ عالما دیمترا واھگ کتگ کہ ھمے کشکءِ رندگیری کنوکیں آدگہ مردم ھم درنجگ بہ بنت۔
ھما وھدی کہ بلوچ درنجگ بیتگ أنت و بی أنت، گڈا ھمے بلوچستانی ملا عبدالحمید إسماعیلزھی گشیگا دپبند کنگ بیتگ و یـکـّوئی بے توار إنت۔ ألبت تھرانیانءِ باروا دلپدردی درشان کنگءِ وھدا دارگ نہ بیگا إنت۔ إے پیئشدارگا إنت کہ ملا صاحب 'شاہءِ جندا شہ گيئشتر شاہءِ وفادار إنت'۔
ساریا شنگ بیتگیں حالانءِ ردا وھدیکہ یعقوب مھرنھاد دستگیر و گجرانءِ لٹانءِ دیمپان کنگ بیتگ أت، گڈا آئی وارس ملا إسماعیلزھیءِ گوَرا شتہ بیتگ أنت و شہ آئیا دستبندی إش کتگ که شہ وتی نیمگا پہ إے ورناءِ رکـّینگا بہ تـُکشیت۔ ملا إسماعیلزھیءَ درّائینتگ: یعقوبءِ سرا جتگیں ڈوبہ باز مزنین أنت، پمیشا آئی ھچ کت نہ کنت۔
مرچی ھمے شھید یعقوبءِ ھردسالیں برات إبراھیم بندیگ إنت۔ إبراھیمءِ إیوکیں میار پہ وتی براتءِ رکـّینگا تچ تاچ کنگ إنت۔ ضروری إنت کہ ملا إسماعیلزھی و دگه واجھکار پہ ھمیشیءِ ڈولیں بے میارانءِ رکـّینگا گيئشتر تکانسر بہ بنت؛ شہ إیش کہ ھما تھرانیانءِ باروا بژنیگ بہ بنت کہ آوانءِ وتی نزیکیں تـُشے أرس ریچگءِ بدلا شادھی کنگا أنت۔
ملا عبدالحمید بہ زانت کہ تھرانیانءِ جیڑوا بلوچانءِ سرا دئور دیگءِ بَروَرد پہ بلوچاں أبید شہ لٹ کٹ و کشتار دگہ ھچ نہ بیتگ أنت و دیمترا ھم نہ بنت۔ ھمے ردی 1979ءِ إنقلابءِ درگتا ماں کمیونسٹ گل چؤش کہ بام إستار، حزب تودہ؛ أکثریت و أقلیتاں ھؤریں بلوچاں کت۔ عاقبتا بازیں گچینی بلوچ دستگیر و درنجگ بیت أنت۔
هیچ نظری موجود نیست:
ارسال یک نظر
وتی کلوا چێرا نبیس إت