شھید غلام محمد بلوچ گوں سنگت لالا منیر و شیرمحمد بلوچ 3 أپریل 2009ءَ ماں تربت شہ وکیل کچکول علیءِ کارگسا چکانپگ بیت۔ پنچ روچا پد آوانءِ جسد مرغاپ نامیں ھندےءَ گندگ بیت أنت۔ ھر کس گوں ألمّی گشت کنت کہ إیش پاکستانی چاریگاں چکانپتگ أنت، ھماواں کشتگ أنت و جسد أش مرغاپءَ رنبیتگ أنت۔
شھید غلام محمد بلوچ یک سیاسی راھشونے أت و بلوچ نشنل موومنٹءِ سروک أت۔ بلوچ نشنل موومنٹءِ پیسری نام بلوچستان نشنل موومنٹ أت و آ وھدی آئیءِ سروکیا داکٹر عبدالحئی و داکٹر عبدالمالک کنگا إتنت۔ شھید غلام محمد بلوچ ھمے گلءِ چیردستیں جھدکارے أت۔ دیمترا بلوچستان نشنل موومنٹ و حاصل بزنجوءِ نشنل دموکراٹک پارٹیءِ یکجاه بیت أنت و نشنل پارٹیءِ ناما نوکیں گلے أڈ إش کت۔
نشنل پارٹیءِ أڈ بیگا پد شھید غلام محمد بلوچءَ گوں داکٹر مالک بلوچ وتی نہ وشی ظاھر کت و بی إن إمءَ برجاہ دارگءِ فیصلہ کت۔ ھمے وڑا إے گل دیما روان بیت۔ دیمترا گلءِ نام شہ بلوچستان نشنل موومنٹ مٹـّينگ و بلوچ نشنل موومنٹ إیر کنگ بیت۔
شھید غلام محمد بلوچءَ آزادی لوٹوکیں گلانءِ پلانگری زرت و پارلمنٹءِ سیاست کنوکانءِ مخالفت کت۔ دیمترا گوں میر بالاچ و نواب أکبر بگٹیءَ نزیک بیت۔ آوانءِ سلاحبندیں جھد آئیا پچّیں دیواناں یکـّوئی ستا دات۔ و بلوچ سکـّین دات أنت کہ سلاحبندیں جنگا بھر بہ زیر أنت۔ ھمے درگتا آئی چاریگاں دستگیر کت۔ نزیک 9 ماہ بندیگ بیگا پد یلہ دیگ بیت۔ یلہ بیگا پد ھم آئیا وتی کشک نہ مٹـّینت۔ پمیشا آئیءِ خلافا بازیں کئس پاکستانی پولیسا ثبت کت أنت۔
ھمے ثبت کتگیں کئسانءِ سببا آئی براں برانا دادگاھاں توار کنگ بیت۔ اودا آئی پہ وتی دفاع کنگا یکـّوئی ظاھر بیت۔ 3 أپریل 2009ءَ ماں تربت شہ دادگاھا درکپگا رند آئی گوں سنگتاں چست کنگ بیت و پدا ھچبر چھر ئی نہ کت۔ بادے مرچی ھر سئیں راجی سر 'مرغاپءِ شھید' یاد کنگ بیگا أنت۔
هیچ نظری موجود نیست:
ارسال یک نظر
وتی کلوا چێرا نبیس إت