بندیگاں لٹ کٹ کنگءِ میانملکی روچءِ درگتا ناروےءِ بلوچاں ظاھری دات

داتگیں عکس بلوچی نیوز: چپی دستا احسان ارجمندی انت

بلوچ کمیونٹی ناروےءِ تالاں کتگیں حالےءَ داتگ کہ اودءِ بلوچاں 26 جونءَ ماں ناروےءِ پارلمنٹءِ دیما ظاھری داتگ۔ إے ظاھریءِ مقصد بندیگاں لٹ کٹ کنگءِ خلافا داشتگیں میانملکی روچءِ درگتا بلوچستان و دنیاءِ دگہ بھراں بندیگیں مردمانءِ نگيگیں حالاں دنیاءِ دیما ظاھر کنگ بیتگ۔

ناروےءَ نندوکیں بازیں بلوچاں ماں ظاھریا بھر زرتگ۔ بندیگاں لٹ کٹ کنگء خلافا دانک کوکـّار کنگ و لٹ کٹءِ غیر انسانی کارکردءِ دیما دارگءِ لوٹوک بیتگ انت۔ ھمے باروا یک سیاھگے هم وانگ بیتگ کہ بھر زیروکاں ستا داتگ۔

بلوچانءِ سرا بیوکیں زوارکی؛ چؤش که آواں یکـّوئی دستگیر، لٹ کٹ، بندیگ و پدا پاھو دیگءِ باروا ناوشی درشان کنگ بیتگ۔ رندا شہ ناروے سرکارا لوٹ اش کتگ کہ بلوچانءِ سرا بیوکیں ظلما ایر بہ جنت و گيئشتر زوراکیءِ دیما دارگءِ خلافا توار چست بہ کنت۔

بلوچ کمیونٹی ناروےءِ بیانا احسان ارجمندیءِ باروا ھچ گشگ نہ بیتگ۔ آوانءِ گيئشتر ذمواری ھمیش ات کہ احسان ارجمندیءِ گاری و آئیا درگيجگءِ پڑا ناروے سرکارءِ نزوری إش ڈوبارإتین أنت۔ پرچاکہ احسان ناروےءِ شھروندے إنت کہ پاکستانی چاریگاں بے میارا دستگیر و بندیگ کتگ۔ وھدے ناروے سرکار وتی ملکءِ مردمےءِ پانکا نہ جنت، گڈا بلوچستانءِ بندیگانءِ پانکا جنگءِ مزنیں واکا شہ کجا کاریت!