بلوچی نیوز
ایرانءِ جلاّداں بلوچستانءِ جوانسالیں راجی جھدکار عبدالمالک ریکی اعدام کت
ایرانءِ سرکاری حالرسانا جار پرّینت کہ یکشنبہ 20 جون2010ءَ ماں تھرانءِ اوین بندیگجاھا جمھوری اسلامی سرکارءِ جلاّداں عبدالمالک ریکی اعدام کت.
بلوچستانءِ راجی زرمبش جوانسالیں بلوچ راجی جھدکار عبدالمالک ریکیءِ اعدام بیگءِ درگتا بلوچ راج و راجی جھدکارانءِ درداں شریدار انت، و جمھوری اسلامی ایرانءَ ایرجنت۔
بلوچستانءِ راجی زرمبش ھمے سرپد انت کہ راجی جنز پروش دیگ بیت نہ کنت۔ پمیشا ما عبدالمالک ریکیءَ راجی جنزءِ یک ھنچوشیں دلیریں راھدربرے زانیں کہ آئیا وتی جھدءِ برحق بیگءِ سرا ایمان ھست ات۔ پدا ھمے ردا بدکردیں جمھوری اسلامی رژیمءِ خلافا جھد ئی راھدربری کت۔
جاھل و مکـّاریں رژیما گوں حیلہ و لب کش گوری ملکانءِ ھورکاریا فروری 2010ءَ عبدالمالک ریکی شہ یک دریں ملکےءَ دستگیر کت. پدا یک چیریں گرابےءَ ایرانءَ برت و ھمودا بندیگ کت۔ گوں جسمانی و روحی عزاب دیگا ایرانی واکاں نہ کتگیں کارانءِ منـّگا عبدالمالک ریکی پرما إت۔ ایرانی واکانءِ جھد أت کہ آئیا دریں ملکانی کارمندے شون بہ دی انت۔ البت رژیم بے سوب بیت و شہ بنداتا بلوچ سرمچاراں جار پرّینت کہ عبدالمالک ریکیءَ پہ بلوچستانءِ راجی جنزءِ دیما برگا دگہ بازیں سرمچار رودینتگ انت۔ پمیشا زوراکیانءِ برجاہ دارگ و مردماں اعدام کنکءِ خلافا راجی و مذھبی جھد برجاہ دارگ بیت إنت۔
بلوچستانءِ راجی زرمبش عبدالمالک ریکی و آئیءِ راھدربریءِ زبھریا پہ بلوچستانءِ جنزا و جنداللہءَ یک ٹوھیں تاوانے لیکیت۔ البت راجی زرمبش سرپد انت کہ عبدالمالک ریکیءِ جھدا دیما برگ و بلوچستانءِ راجی جنزا ردوم دیگءِ مقصدا بلوچ جھدکار اوشتاتگ انت۔
شہ ھما جھدکاراں کہ بلوچستانءِ راجی جھدا برحق منّ انت بلوچستانءِ راجی زرمبشءِ لوٹ همیش انت کہ یکـّادگرءِ دردا شریدار بہ بنت و گوں یکـّادگرا ھمراہ بیگءِ راھاں در بہ گیج انت. یک المّیں راجی تپاکییے ٹھینگءِ مقصدا بلوچستانءِ راجی زرمبش ھورکاری کنگا ساڑی انت۔
جنداللہءِ دلیریں بلوچ راھدربر عبدالمالک ریکیءِ یادا بلوچستانءِ راجی زرمبش قدر کنت و آئیءِ راھدربریا لایق منـّینت۔
بلوچستانءِ راجی زرمبش
20 جون 2010
هیچ نظری موجود نیست:
ارسال یک نظر
وتی کلوا چێرا نبیس إت