شاباش سر وزیر رئیسانی

'بلوچ حال'ءِ تالان کتگیں خبرےءَ داتگ کہ جمعہءِ روچا بلوچستان سرکارا جار پرّینتگ کہ شہ اولی تانکہ دھمی کلاساں بلوچستانی زھگ عربی وانینگ بی انت۔

مردما کسے ستر نادوست بہ بیت، نادوستءِ جوانیں کارا شاباشی دیگ روا انت۔ پمیشا نواب اسلم رئیسانیءِ سلکاریاں یک کرّا کن ات و اے جوانیں کارا کنگءِ شاباشی ئی بہ دی ات۔

باز کس وا شادتر بیتگ اتنت، اگر نواب رئیسانیءَ بلوچی و براھوی زباناں وانینگءِ جار بہ جتین ات۔ البت عربی استمانءِ مذھبی زبان انت و بلوچ قوما شہ بے بنیں اردو زبانا دیر تر بارت۔

یکـّے شہ قومی کاراں ھمیش انت کہ اگر قوما گوں وتی لیکوا نزیک آرگ آسودگ نہ انت، گڈا آئیا شہ دشمنءِ لیکواں دیرتر بہ بر۔ اگر رئیسانیءِ جتگیں جارءِ سرا عمل بہ بیت، گڈا ایشی بلوچستانءِ مردماں شہ دشمناں دیرتر بارت انت۔

مرچییں دشمنیءِ قصواں شه گستا چارگ بہ بیت، گڈا مردم سرپد بیت إنت که اگر گوں پاکستانءِ اڈ بیگا اودءِ قومی زبان عربی کنگ بیتین ات، ھنوں پاکستانی قوم گوں یکـّادگر نزیکتر بیتگ اتنت۔ البت اردو زبانا قومانءِ ھستیں دوستیءِ سینگا پیکـّے جت و آ شہ یکـّا دگر دیر برت انت۔

پاکستانی زوراکیانءِ خلافا شھید اعظم نواب اکبر شھباز بگٹیءِ چستگیں گامگیجاں شہ یکـّے اردوءِ بائیکاٹ ات۔ آئیا سال 1990ءِ دھرا ماں پاکستانءِ پارلمنٹا اردو زبانا گپ کنگ یلہ داتگ ات۔ و وتی تقریر ئی بلوچی زبانا کتگ ات۔