ایرانی واکاں عبدالمالک ریگی درتک

ایرانی واکاں گوں گل و شادھی جار پرّینت کہ آواں جندا...ءِ بنهشت ایرکنوکین عبدالمالک ریگی مرچی –یکشنبہءِ صحبا ماں تھرانءِ اوین بندیگجاھا درتکگ۔ عبدالمالک ریگیءَ وتی سرا جتگیں 79 ایرانی میار منــّتگ اتنت و ایرانی دادگاھےءَ دو روچ ساریا آئیا درنجگ حکم داتگ ات۔

چاروک گشت کن انت کہ وھدے شہ عبدالمالک ریگیءِ پادانی چیرا زمین دیر کنگ بیتگ و گٹا بستگیں سادا آئیءِ نوکسالیں ساہ ماں سینگا مونجیتگ، گڈا سئیل چاروکیں ایرانیاں اللہ اکبر دانکءِ کوکـّار کنگا پد چاپ جتگ۔ ھنچؤشیں ندارگے ظاھر بیتگ کہ گشیگا خداءِ مزنتریں دشمنءِ ساہ سندگ بیتگ و پہ ایرانیاں جنـّتءِ دروازگ پاچ کنگ بیتگ۔

راستی ایش انت کہ ریگیءِ ساھا سندگ درگتا جتیں چاپاں ایرانیانءِ بھتاوری ھچ گيئشتر نہ کتگ۔ نے کہ شہ ریگیءِ روگا پد بلوچستانیانءِ سرا بیتگيں زوراکیانءِ خلافا چست بیتگيں بلوچ جھدکارانءِ توارا اے کارکرد ایرموش کت کنت۔ پرچاکہ چدا پیسر ایرانیاں ھمے پڑ باز برا گواز کتگ، بلے ثمر ئی نہ داتگ۔