اندیمیں دست

سیاھگ: عبدالوھاب، رجانک: ولید گربنی

بلوچستانءِ اواریں ھند –کوئٹہ، مستونگ و خصدارءَ ھمے ھنیگاں 13 بیگواہ کتگیں مردمانی جسدانی دستا کپگا ھندی مردم پریشانیءِ کورچاتا دئور داتگ انت۔

آزادی لوٹوکیں سیاسی مردمانی بیگوہ کنگ بیگ مشرفءِ واکداریءِ وھدا بنا بیتگ ات۔ البت آوھدی ھچ کسا نہ زانت کہ بیگواہ کنگ بیتگیں مردم کجا برگ بیتگ انت، بلّی توریں پہ آوانی آزاد کنائینگا بازیں ظاھری دیگ و شدکشـّی کنگ بیتگ اتنت۔

پی پی پیءَ کہ واکداری دست گپت، 2009ءِ اولی بھرا بگٹی ٹکّءِ 5 گاریں مردمانی جسد ماں خانوزئی و غوری ھنداں دستا کپ انت۔ پدا ماں مرغاپ سئے بلوچ راھشونانی جسد دستا کپ انت۔ ایشانی نیاما غلام محمد بلوچءِ جسد ھور ات۔ سئیں کس ماں تربت پیسری سرکار مخالفانی پارلمانی سروک کچکول علیءِ دفترا ھشت روچ ساریا چست کنگ بیتگ اتنت۔ ایشانی خلافا ثبت کتگيں کیئسانی چٹینگاں ماں دادگاھا کچکول علی ایشانی پانکجنیا کنگا بیتگ۔

گاریں مردمانی جسدانی درکپگءِ حساب ماں سال 2010 اناگتا گيئشتر بیاں بیت۔ ماھےءِ گونڈیں وھدا 13 جسد مردماں دستا رس اتنت۔

نجیب لانگو و فیض بلوچءِ جسد شہ سٹلائٹ ٹاون –کوئٹہ 24 جولائیءَ مردماں دستا کپ انت۔ پدا فاروق مینگل و اشفاق ملازئیءِ جسد 27 جولائیءَ رس اتنت۔ دگہ دو جسد مردماں شہ کوئٹہءِ نزیکا 7 آگستءَ رس اتنت۔ ایش بھار خان بنگلزئی و غلامقادر مریءِ ناما پجّا آرگ بیت انت۔ 13 آگستءَ دگہ سئے جسد پولیسا درگپت انت۔ ایش نذیر احمد، خانمحمد مینگل و زوھیب رودینیءِ جسد اتنت۔

اے مردماں کشگءِ ذمواری 'سپاہ شھداءِ بلوچستان' نامیں ٹولییےءَ وتی سرا زرتگ انت۔ اے ٹولیءِ نام گوں نجیب لانگو و فیض بلوچءِ جسدانی درکپگا اولی برا دیما آرگ بیت۔ ٹولیءِ گوانکو عبداللہ بلوچءَ گشت "ٹارگٹ کلنگءِ آماچانی دوستواھاں اے ٹولی ٹھینتگ"۔

نام گپتگیں ٹولیا مردم بیھار داتگ اتنت کہ شہ ' بی ال اے، بی آر اے، بی آر پی، بی ال اف و مینگل پارٹیا گستا بہ بنت۔ اگر نہ، گڈا آوانی سرا حملہ کنگ بیت انت۔