گوستگیں روچاں واجہ داکٹر عبدالمالک بلوچ لندنءِ ترتابا آتکگ ات۔ گون آئی شہ بلوچی نیوزءِ نیمگا من گدارے کت و شہ آئی بلوچستانءِ جاورانی باورا لھتے گچینی جست کت انت۔ اے گالگدار شمئے دیما انت۔ ولید گربنی
بلوچی نیوز: واجہ داکٹر عبدالمالک بلوچ من شمارا شہ بلوچی نیوزءِ نیمگا وش آتک کناں. باز وشی بیگا انت کہ مرچی گوں شما ھمدیواناں. امید انت کہ شہ شما بلوچستانءِ نوکیں جاور و نشنل پارٹیءِ جھدءِ تک و پھناتانی باروا وانوکاں سرپدی بہ رسیت۔ پرچاکہ قومءِ ضرورت انت کہ آ وتی Institutions ءِ باروا، وتی سیاسی سروک و جھدکارانی باروا زانتکار بہ بنت۔
شہ شما دستبندی انت کہ اولسرا مارا سرپدی بہ دی ات کہ نشنل پارٹیءِ بنھشت کجا فلسفہءِ سرا ایر انت!
داکٹر عبدالمالک بلوچ: من شہ ھرچیزا ساری عرضے کناں کہ نشنل پارٹیءِ سرجمیں کارکن –من لیڈر اش نہ گشاں، کارکن اش گشاں –آ درست ھما فکرءِ پدریچ انت کہ یوسف عزیز مگسیءَ بنگیج کتگ ات۔
بلوچ بدقسمتی ایش انت کہ دومی عظیم جنگا پد غلامیں قوم آزاد بیت انت، بلے بلوچ آزادیں قومے ات کہ غلام بیت۔ اے غلامی ھما وھدی یوسف عزیز مگسیءَ گوں سنگتاں مار ات و ایشیءِ خلافا جھد اش بندات کت۔ آ جھدءِ بنزہ بلوچ و بلوچ سرزمین -بلوچستان ات۔
اے جنز کہ دیما آتک، گڈا بلوچستانءِ سردار و نواب سازشانی توکا کپت انت۔ آواں ھنچیں جاور ودی کت انت کہ بلوچ گلزمین شہ آوانی دستا درکپت۔ تاریخءِ توکا اے گپ گيشتگ کہ بلوچستانsub-continent ءِ بھرے نہ بیتگ۔ نیکہ Middle East'ءِ بھرے بیتگ۔ مڈل ایسٹ و سب کونٹننٹءِ نیاما بلوچستان یک 'Tri-junction' ات۔ پدردیں گپ ایش انت کہ آ وھدییں زوراک –خاص برطانیاءِ دیما بلوچستانءِ حیثیتءِ منـّینگا بلوچ سوبین نہ بیت انت۔
آدگہ دیما بچارئے، دومی عظیم جنگءِ درگتا پنجابءَ پہ برطانیاءَ مزنیں قربانی داتگ ات؛ 390،000 فوجی ئی برطانیاءَ داتگ ات۔ ایشیءِ دیم پہ دیمیا بہ چارئے بمبئیءَ کہ ھندوستانءِ مزنیں شھرے ات، شہ اودا بس 11،000 کس برطانیاءِ فوجا گون اتنت۔
پمیشا من سرپد بیاں کہ پاکستانءِ جوڑ کنگا دو قومی 'تیوری'ءَ گوں ھچ سیادی نیست انت۔ ایشیا جوڑ کنگءِ مقصد یکے ھمیش ات کہ پنجابی فوجیانی خدمتءِ داد دیگ بہ بیت و دومی ھندوستانءِ سوشلسٹ جنز کہ آئیءِ راھشونی نھرو گون سنگتان کنگا ات؛ دارگ بہ بیت۔ برطانیا ھمے مارگا ات کہ اگر ھندوستان تقسیم مہ بیت، گڈا دیمترا گوں سوویت یونینءَ نزیکتر بیت۔
گوں اے ملکءِ جوڑ کنگا ما فی سبیل اللہ قربان بیتیں۔ ھمے قربان بیگءِ خلافا آ زمانگءِ بلوچ لیڈراں مزاحمت کت۔ ایشیءِ داستان قلات دارالعوامءِ تاریخءَ مان انت۔
بلوچی نیوز: انچو جزابیں نامانی توکا شما وتی گلءِ نام 'نشنل پارٹی' پرچا ایرکتگ؟
داکٹر عبدالمالک بلوچ: ھنچوش ساریا گشگ بیت، بلوچستانءِ قربان بیگا رند آزمانگءِ بلوچ لیڈر میر غوث بخش بزنجو، ملک فیض محمد، آغا عبدالکریم و عبدالرحیم خواجہ خیلءَ 'resist' کت۔ قلات نشنل پارٹی ھمے جھدءِ پدریچ ات۔ بلوچءِ اولی سلاحبندیں جنگءِ تاریخ وا ھست انت، من پدا گشگ ئی نہ لوٹاں۔
دیمترا بلوچ –خاص میر صاحب گوں سنگتاں -سرپد بیت انت کہ اے ناھاریں زوراور تنھا گوں آواں دارگ نہ بیت انت۔ بھتر ھمیش انت کہ دُرستاں یکجاه بہ کن انت۔ آئیءِ توکا مظلومیں پھتون بہ بنت یا آ دگہ قوم گون بنت۔ ھمے ردا درست یکجاہ بیت انت و 1957ءَ ایشاں نشنل پارٹی جوڑ کت۔ قومانی برابریءِ حق، آزادیں درملکی پالیسی و سکیولر دموکراسی ایشیءِ بنی لوٹ اتنت۔ رندترا کہ پاشانی آتک، گڈا 'عوامی' گال ھؤر کنگ و نشنل عوامی پارٹیءِ جوڑ بیت۔
آ زمانگا ھر کس کہ چینءِ پلانگری زیروکے بیتگ آئی 'عوامی' بیتگ و روسءِ پلانگری زیروک 'نشنل' بیتگ انت۔
نیں ھما سنگت کہ نشنل پارٹیءِ نامءِ سرا ابکـّہ انت، آوانی دیما عرض انت کہ نشنل پارٹی ھما پارٹی انت کہ 1957ءَ جوڑ کنگ بیت۔
بلوچی نیوز: قومانی جھد دیما رو انت و نوکیں فلسفہ و نام زیرگ بی انت، شما چونکا پشتا چھر کتگ و کوھنیں نام و فلسفوےءِ رندگیری کنگا ات؟
داکٹر عبدالمالک بلوچ: وھدے کہ حیدر آباد سازش کئس جوڑ کنگ بیت، بلوچ لیڈر دستگیر و بندیگ کنگ بیت انت۔ نشنل عوامی پارٹیءِ سرا بندش جنگ بیت، گڈا گوں نشنل عوامی پارٹی و بی اس اوءَ ھمراھیں ما نوجواناں مار ات کہ پہ 'state building'ءَ ضروری 'انسٹی ٹیوشنے' پہ بلوچاں پشت نہ کپتگ۔
'فوکو'ءَ وتی state building کتابءِ تھا داتگ کہ پہ اے مقصدا بنی ضرورت سیاسی گلےءِ بیگ انت۔ تاں ھما وھدی سیاسی گلے مہ بیت قوم دیما شت نہ کنت۔ اے ردا 1979ءَ ما 'بلوچستان لبرئشن موومنٹ' جؤڑ کت۔ بی ال امءَ ھمے لیکت کہ جمھوریت بلوچءِ دردءِ دوا نہ انت و سلاحبندیں جنگ بہ بیت۔ پمیشا سلاحبندیں جنگءِ پلانگریا ما چیرکائی جھد کت۔ گوں میر غوث بخش بزنجوءَ ما ھمخیال نہ اتیں۔
جاور ھنچؤش اتنت کہ افغان انقلاب آتکگ ات، ایرانی انقلاب آتکگ ات و روس ھم تمرد ات۔ البت ما باز دیمرئی کت نہ کت۔
1987ءَ ما سرجمیں سنگتاں ماں بولان دمگءِ کوھنیں 'مچ'ءَ یک کوھےءِ توکا مزنیں دیوانے کت۔ سرجمیں جاور چست ایر کت انت۔ آسرگری ھمے بیت کہ جمھوری وڑا جھد دیما برگ بہ بیت و پہ اے مقصدا ظاھریں سیاسی گلے جوڑ کنگ بہ بیت۔ اے ردا 24 دسمبر 1987ءَ ما 'بی ان وائی ام' جوڑ کت۔ چدا پد بیتگیں جھموری جھد مردمانی دیما انت۔
بلوچی نیوز: شما گشت کہ 1979ءَ بی ال ام جوڑ کت و پدا 87ءَ بی ان وائی ام جوڑ بیت۔ بزان شہ سلاحبندیں جھدا شما جمھوری جھد گچین کت۔ ھمے پالیسیءِ بدل کنگءِ باروا کمّے گيئشتر سرکچ دات کنئے؟
داکٹر عبدالمالک بلوچ: بی ال امءَ بلوچستانءِ آزادی لوٹ ات وا بس۔ ما وتی وس کاربست، بلے ماراتیں کہ جھد دیما نہ روگا ات و عوام ھمراہ نہ بیگا ات۔ انقلابےءِ آرگ بہ بیت یا دگہ بدلییے؛ آروک ئی عوام انت۔ تاں عوام گون مہ بیت تو سوبین ئی کت نہ کنئے۔
پدا میانملکی جاور ھما وڑا کہ ما ورنائیا دیستگ اتنت، ماراتیں کہ آ وڑ نہ انت۔ مثال ما 1970ءِ دھرا ھمے لیکتگ ات کہ روس مئے پشتءِ پناہ انت، نزیکا روگا پد دیستیں کہ چؤش نہ ات؛ بلوچستانءِ آزادیا روس کمک نہ کنت۔ افغانستان ھم گوں بلوچاں ستک نہ ات۔ آئیا یک کارڈےءِ حسابا بلوچستان کارمرز کتگ و کنت ئی، بلے بلوچءِ ھمراہ نہ انت۔
وھدے مار اتیں کہ عوام گوں ما ھمراہ نہ ات و میانملکی کمک مارا رسگا نہ ات، گڈا پہ وتی عوامءِ منظم کنگا ابید شہ سرظاھریں سیاستا پہ وت دگہ راھے ما نہ دیست۔
بلوچی نیوز: شہ ھما وھدییں سنگتاں چنچو کس مرچی گوں نشنل پارٹی ھمراہ انت؟
داکٹر عبدالمالک بلوچ: بلوچ چاگردءِ توکا نشنل پارٹی ایوکیں سیاسی گل انت کہ آئی کارکن و راھشون یک سیاسی جھدےءِ پیداوار انت۔ من نہ گشاں کہ آدگہ گلاں چشیں مردم مان نیست انت، بلے نشنل پارٹیءِ کمان کوھنیں جھدکارانی دستا انت۔
بلوچی نیوز: شما 1988ءَ بی ان وائی ام و لھتے شخصیتانی اتحادے 'بلوچستان نشنل الائنس'ءِ ناما جوڑ کت۔ گشگ ھمیش بیت کہ سیاسی 'الائنس' مختلفیں گلانی نیاما بی انت۔ چونکا شما وتی گل گوں شخصیتاں ھؤر کت؟
داکٹر عبدالمالک: 1973 تانکہ 88ءَ یک دراجکشیں فوجی رواجے دھر ات۔ وھدے 88ءِ گچینکاریءِ جار پرّینگ بیت، ما لوٹ ات کہ پاکستان و دنیاءَ ھمے شون بہ دییں کہ بلوچستان انگت قومدوستانی دستا انت۔
ما نواب اکبر بگٹی و سردار عطاءاللہ مینگل ھمراہ کت انت و میر غوث بخشءَ ھم زیرگءِ باز جھد کت، بلے آئی ھمراہ نہ بیت۔ گچینکاریا ما قومدوستاں باج برت۔
ھنچونائیا چار ھستی شہ بلوچ سیاستا جدا کنگ نہ بی انت۔ آواں تو شخص بہ گش، پارٹی بہ گش؛ ھرچے بہ گش اش۔ میر غوث بخش بزنجو بہ بیت، نواب اکبر شھباز بگٹی بہ بیت، سردار عطاءاللہ مینگل بہ بیت یا نواب خیربخش مری؛ ایشاں بلوچ سیاستءِ توکا یک مقامے ھست انت۔
مئے بے بھتی ات کہ میر صاحب گوں ما ھمراہ نہ بیت، اگر آئی گون بیتین ات، گڈا مئے position انگت شرتر بیتگ ات۔ البت ما پیشدارگا سوبین بیتیں کہ بلوچستانءَ قومدوستانی پلانگری زیروگ گیئشتر انت۔
بلوچی نیوز: میر صاحبءِ ھؤر نہ بیگءِ سبب چے اتنت؟
داکٹر عبدالمالک بلوچ: اول میر صاحبءِ ھؤر نہ بیگءِ سبب شاید آئی وتی تجربہ اتنت۔ آ ھمے سرپد بیتگ ات کہ سردار و نوابانی ھمراھیا سیاست کت نہ کنت۔
مئے دستبندیءِ پدا آئیا پسّہ دات "من اے تجربہ کتگ، شمارا شوق انت؛ وتی شوقا پیلو کن ات"۔
دومی منی وتی اندازہ ایش انت کہ میر صاحبءِ چپ چاکردا لھتے دانشور و ھنچیں مردم ھست اتنت کہ میر صاحب اش باور کنائینت کہ آئی وت یک زنڈیں طاقتے ات۔ آوانی دیما ما بچک اتیں، جاک و واک مارا ھست ات، بلے ووٹ گپتیں نہ کتگ ات۔
بلوچی نیوز: میر صاحبءِ کپگا و شمئے سوبینیا پد شمئے مارشت چے وڑا اتنت؟
داکٹر عبدالمالک بلوچ: ما ساریا میر صاحبءَ گشتگ ات کہ واجہ تو بہ کپئے ما پشومان بیین و ما بہ کپیں ھم پشومان بیین۔
گچینکاریا رند میر صاحب 'سرکٹ ھاؤس'ءَ آتکگ ات، گڈا من و اکرم آئی کِرّا شتیں و شہ واجھا پھلـّی لوٹ اتیں۔ پسّہ ئی دات "ابـّا آ گپا یلہ دی ات"۔
شہ بیرانیا ساری آئیءِ گالگدارے 'جنگ' روچتاکا شنگ بیتگ ات کہ آودا آئیا گشتگ ات "منی سیاستءِ وارث ھما انت کہ گچینکاریءَ منی دیما سوبین بیتگ انت"۔
بلوچی نیوز: رندتری گچینکاریءَ شما کپ ات و میر صاحبءِ پی ان پی کہ آئیءِ زھگانی دستا ات سوبین بیت۔ ایشی باورا شمئے خیال چے انت؟
داکٹر عبدالمالک بلوچ: میر صاحبءِ کپگا پد مئے کیچءِ بازیں مردمانی خیالا شرّیں کارے نہ بیت۔ بزان 'sympathy'ءِ ووٹاں آ سوبین بیت انت۔ البت ووٹءِ حسابا مئے 'گِراف' بُرز تر ات۔
دگہ خبرے ایش انت کہ ھر کس پاکستانی پارلمنٹا رئوت آئی مردمانی ڈوبارگانی دیما بیت انت۔ پرچاکہ مردمانی واھگ پورہ کنگ نہ بنت۔
بلوچی نیوز: ادا شما یک راستییے ظاھر کت کہ پاکستانی پارلمنٹءَ ھر کس رئوت آئی بد رد کنگ بیت انت، پرچاکہ ھچ کت نہ کنت! ایشیءِ سبب چے انت؟
داکٹر عبدالمالک بلوچ: سبب ایش انت کہ پاکستان بنیادی طورا جمھوری ملکے نہ انت؛ یک security ملکے۔ اودءِ establishment کہ آئی توکا گيئشتر فوج انت، آ بالا دست انت، آ طاقتور انت و اے ملکا جمھوری ملکے جوڑ کنگا نہ اِلـّیت۔ مئے مشکلات ایش انت کہ مئے عوام منظم نہ انت۔ گپ ایش نہ انت کہ مارا پارلمنٹءِ شوق انت۔ ما گشیں بلکیں پارلمنٹءِ راھا ما وتی مردماں منظم کنگا سوبین بییں۔
اگر تو ووٹاں بھر نہ زیرئے، گڈا تو یک دانشوری پارٹییے بیت کنئے، بلے عوام گوں تو ھمراہ نہ بیت انت۔ ھرچے کہ ما ھنـّی کنگائیں ایشی بلوچ عواما سیاسی و شعوری بنیادا منظم کنگءِ توجیلے انت۔ تاں آ بہ زانت کہ بلوچے انت، بلوچستان آئیءِ سرڈگار و بلوچءِ میراث انت۔ تانگہ بلوچءِ اکثریتا اے مارشت نیست انت۔
بلوچی نیوز: شمئے جند بہ بیت یا بازینے شہ شمئے ھمراھاں بلوچ سیاستءِ توکا وتی عمر اش گوازینتگ۔ قول بلوچاں مید اسیپت کتگ انت۔ تانگه شمارا چے رستگ؟
داکٹر عبدالمالک بلوچ: مئے مثال ھما جنیں آدمے انت کہ چلـّہ بیگا بیت۔ آئیا یکـّیں وھدا سک باز در پر بیت و سک شاد ھم بیت۔ درد چک بیگءِ عملئے و وشی چک مات بیگئے۔
مئے یک نیمگےءَ بلوچ مردمانی واھگ انت۔ دومی نیمگا قومی مشکلات انت۔ اگر ما اے 'process'ءَ یلہ بہ کنیں، گڈا اسٹبلشمنٹ وتی لھتے دلال کاری نندارینیت و آئیا وتی حقا بارت۔ اگر من ھمراہ بہ بیاں و ووٹاں سوبییں بیاں، گڈا مردمانی درداں درمان کت نہ کناں۔
پدا هم ھمے 'پروسس' ترا یک منزلےءَ سرکت کنت۔ ترا چپانٹے دیما جنت و دیمترا تھلانک ھم دات۔ بلکیں ھمے داتگیں تھلانکءِ برکتا تو بلوچ عوامءَ سرپد کنگا سوبین بیتئے۔ آ بہ زانت کہ یک قومے انت، یک سرزمینے ھست انتی و بلاھیں مڈیانی واھند انت و پہ وتی مڈیانی پھازگا چست بہ بیت۔
اودا کہ مارا رستگیں کامیابیانی جست انت؛ منی عرض انت کہ وھدے 1979ءَ ضیاء الحقءِ خلافا ما موومنٹے بندات کت، گڈا بی اس اوءِ 400 جھدکارانی وارنٹ شنگ کنگ بیت انت۔ آ وھدی پہ وتی رکـّينگا مارا ٹپـّگءِ جاگہ نیست ات۔ مرچی ما کامیاب بیتگیں کہ ھر شھر و میتگا نشنل پارٹیءِ یونٹے جوڑ بہ کنیں۔
من بلاھیں خبر نہ کناں، 'نیپ'ءِ لیڈر پہ من قابل احترام انت؛ بلے مشرقی بلوچستانءِ ھما ھنداں کہ نیپءَ شت نہ کتگ، نشنل پارٹی شتگ۔ بارکھانءَ نیپءَ پیشرفت نہ کت، بلے مرچی کھیتران نہ گشیت کہ آ پختونے انت؛ آ وتا بلوچ منـّیت۔
مرچی اگر 'scientifically' پاکستانءَ پارٹی بہ بنت، گڈا آ دو پارٹی انت۔ یکے جماعت اسلامی انت کہ کٹرانی پارٹی انت۔ دومی نشنل پارٹی انت کہ بلوچ قومءِ پانکجنیا کنگا انت۔ قومدوستے، سیکیولرے، ترقی و جمھوریت پسندیں پارٹییے انت۔ ایشیا تنظیمی ادارہ دیما برگا انت۔ آدگراں فرد انت کہ راھشونی کنگا انت۔
منی پیميں مردمے، کچلولءِ پمیں مردمے کہ آ سرکار مخالف ٹولیءِ پارلمنانی لیڈر جوڑ بیت، ایشی وت مزنیں دیمروییے انت۔
خاران بہ بیت، نوشکی و دالبندیں بہ بنت یا نصیر آباد و جعفر آباد شہ اودا نظریاتی بلوچ گوں نشنل پارٹی ھمراہ انت۔ من نہ گشاں کہ بلوچءِ اکثریت گون انت۔ ھما وھدی کہ اکثریت ھمراہ بہ بنت، گڈا نشنل پارٹیءِ گپ دگر بی انت۔ من ھمے زاناں کہ اے انسٹی ٹیوشن پہ بلوچاں شرتریں امید انت۔
بلوچی نیوز: نشنل پارٹیءَ شخصیتانی مقام چی انت؟
داکٹر عبدالمالک بلوچ: منی خیالا نشنل پارٹیءِ تھا شخصیتاں بہ حیثیت شخصیت ھچ مقام نیست انت۔ نشنل پارٹیءِ توکا مزنتریں شخصیت سردار ثناءاللہ ات۔ وھدے آئیا نشنل پارٹی یلہ دات، صرف سئے مردم گوں آئیا شت انت۔ نشنل پارٹیءَ گـَرَز نہ بیت۔ من کہ پارٹیءِ سروکاں اگر ھمے بہ لیکاں کہ شہ پارٹی درکپاں، گڈا ورکر گوں من کا انت؛ رد انت۔ ھچ کس گوں من ھمراہ نہ بیت۔ پمیشا من سرپد بیاں ایشی بلوچستانءِ توکا اولی سیاسی 'achievement' انت۔ البت انگت بالغ نہ انت و پہ ایشیءِ رودینگا جھد بیگا انت۔
بلوچی نیوز: نشنل پارٹیءِ توکا باسکیں جھدکارانی حیثیت چی انت؟
داکٹر عبدالمالک بلوچ: پارٹیءَ جوڑ کنگءِ وھدا سئے بُنی اصول ما ایر کتگ انت۔ 1. پارٹیءِ فیصلہ مشترکہ بہ بنت۔ 2. پارٹیءِ راھدربری مشترکہ بہ بیت۔ 3. تنقید و خود تنقیدی (کِچّہ چـِنگ و کچہ چنگ بیگ)ءِ اجازت بہ بیت۔ اے حسابا پارٹیءِ اصلی واھند باسکیں جھدکار انت۔
بلوچی نیوز: نشنل پارٹیءِ مخالفت باز بیگا انت، سبب چے انت؟
داکٹر عبدالمالک بلوچ: ھما سنگت کہ نشنل پارٹیءَ کچّہ چن انت، منی خیالا جھلانکیا نہ چارگا انت کہ نشنل پارٹیءِ 'محور' بلوچ و بلوچستان انت۔ اے بیت کنت کہ یکـّےءِ کاری راھبند دگہ وڑےءَ بنت و دگہ گلے 'ایشوے'ءَ وتی وڑا چاریت۔
مارا میار لڈ ّ انت کہ 'نشنل پارٹی' پاکستانی پارٹییے۔ من ھمے سرپد بیاں کہ پاکستانءِ 'والی' و وارث باز ھست انت۔ نشنل پارٹی پاکستانی پارٹییے نہ انت، نیکہ بیت کنت و مئے دلا چشیں واھگے ھم نیست انت۔ نشنل پارٹی بلوچ قومءِ پانکجنیا کنت و مئے واھگ انت کہ گيئشتریں بلوچانی پارٹی بہ بیت۔
بلوچی نیوز: پسرترا شما انسٹی ٹیوشنءِ گپ جت، ماں یک چاگردےءَ سیاسی انسٹی ٹیوشنے بیگ سرجمیں ضرورتاں پیلو کت نہ انت۔ ایشیءِ کشا دگہ تکاں ھم منظمیں جھد لازم انت۔ چؤش لبزانک انت، صحت انت، تعلیم انت و دگہ بازیں۔ اے ردا شما پہ مئے وانوکاں چمشانکے دات کن ات؟
داکٹر عبدالمالک بلوچ: ھنـّی سرجم و محکمیں انسٹی ٹیوشن ھچ نیست۔ سیاستءِ پڑا کموک کار بیتگ۔ بلے معاشی انسٹی ٹیوشن بیگ لوٹ انت، تعلیمی انسٹی ٹیوشن لازم انت، دودمانی ادارہ بہ بنت یا سماجءِ دگہ تکانی؛ پھک ضروری انت۔ منی سرپدیءِ ردا بلوچستانءَ ایشانی ضرورت پیلو کنگ نہ بیتگ۔
پہ درور ٹرائبلزم پہ بلوچ معاشروا یک مزنیں جنجالے۔ بلـّی توریں بازیں قبیلواں پہ بلوچ قوما گرانیں قربانی داتگ، بلے ضرورت انت کہ آ قبیلہ وتا مکمل بلوچ جوڑ بہ کن انت۔ نشنلزمءِ کونڈیں تعریف گوں وتی وطن و وتی مردماں دوستی انت۔ اگر کسےءَ وتی وطن دوست بہ بیت و گوں وتی مردماں دوستی بہ بیت، گڈا دنیاءِ کجا یک کنڈےءَ جاھمنند انت و زندءِ کجا یک تکا مھارت ئی بہ بیت، وتی تکا انسٹی ٹیوشنےءِ ردوم دیگا گوں بہ بیت۔ ضرورت نہ انت کہ پھک سیاستا گون بہ بنت۔
مرچی ما سئے بلاھیں قومانی نیاما یک بزگیں قومے ھستیں۔ شہ ایشاں کجا یکءِ وار تچک بہ بیت، آ بلوچءَ وتی چپانٹاں جنت۔ پہ بلوچءَ ضروری انت کہ وتا ھنچوش زوراک بہ کنت کہ آ ایشانی چپانٹاں سگ ات بہ کنت و بدلا چپانٹے جت اش بہ کنت۔
بلوچی نیوز: اگر مردم بلوچستانءَ بہ چاریت، گڈا شمئے دروشما و ھما سردارانی کہ شما نام گپت انت جھد ھست انت۔ پدا ھم مارگ بیگا انت کہ multi-dimension جھد نہ بیتگ۔ بزاں ابید شہ سیاستءَ آ دگہ پڑاں جھدے نہ بیتگ۔ المـّا آدگہ پڑاں جھد نہ بیگ شما ھمیشانی نزوری بیتگ انت۔ لبزانکی پڑ انت، دودمانی دیمرویءِ پڑ انت، میڈیا انت و صحتءِ پڑ انت؛ پہ قومءِ شریں عاقبتےءَ اے تکاں جھد ھژدری انت۔ نین نشنل پارٹی اے ردا چے کنگا انت؟
داکٹر عبدالمالک بلوچ: بدقسمتی انت کہ اے پڑاں مارا کامیابی نہ بیتگ۔ چدا پیسر مئے قومی پالیسی واضح نہ بیتگ انت۔
من نواب صاحبءِ گورا شتگ اتاں و آئیا گشتاں کہ نواب صاحب مئے گورا قومی پالیسی نیست انت۔ ما ھرچے کنگائیں کل سر کن و پرکن انت۔ ما شما اقتدارءَ آیگا پد ایشیا ٹرانسفر کنیں، آئیا جاھے نندارینیں و آدگرا کارے دئیں وا بس۔ چؤشیں پالیسی کہ قومی پالیسی گشگ بہ بیت مئے گورا نیست۔ ھنچیں قومی پالیسی کہ ما بہ گشیں کہ شہ آئیا جھل روگی نہ انت۔ ھمے وڑا حکومت سالے یا دو سالا کٹـّیت، ما چماں پچ کنیں گندیں ما ھچ نہ کت۔
ھنون نشنل پارٹیءَ اے نزوری مارتگ انت۔ نیں ما جانسلامتیءِ پالیسی ٹھینتگ۔ یک گروپے ما جوڑ کتگ کہ تعلیمی پالیسی جوڑ کنگا انت۔ ما معدنءِ پالیسی جوڑ کنگا گولائیشیں و اگریکلچر پالیسی اڈ بیگا انت۔
مئے مزنتریں جیڑہ 'human resources'ءِ کمی انت۔ ما بلوچءَ ساڑی کنگا تچ تاچ کنگائیں تاں آیوکیں وھداں جاورانی مقابلوا کت بہ کنت۔ ھنـّی مقابلہ کنگا نہ انت۔ البت من دلپروش نہ آں۔ پرچاکہ اگر من پشتا چماں شانک بہ دیاں، گڈا بیست سال یا دہ سال ساریا ماں تربت 4 وانندویں جنیں آدم بیتگ انت۔ مرچی ھر لوگا چار یا پنچ وانندویں جنیں آدم ھست انت۔
پدا ھم ماھریں مردمانی نہ بیگ مارگ بیگا انت۔ مثال معدن انت۔ ایشی بلوچستانءِ لاپ انت۔ اگر پارٹی ریکوڈک یا سندکءِ سرا سمینارے کنگ بہ لوٹیت، گڈا مارا اے تکا کوّاسیں مردمے دستا نہ کپیت۔ ما جھد کنگائیں کہ آیوکیں دئورا اے جیڑہ بہ ٹھیت۔
ایشیا ابید ما 'میر غوث بخش بزنجو فاؤنڈئشن' جوڑ کت۔ مئے ملکا زلزلہ بیت، ڈکـّال بی انت، سیلاب و دگہ قدرتی نگیگی کاینت۔ ام کیو ام و جماعت اسلامی شہ کراچی لانک بند انت پہ مردمانی کمکا کا انت۔ مئے دل لوٹیت، پدا ھم ھچ کت نہ کنیں۔ ھمے تکا لوٹیں چیزے کنگ بہ بیت۔
خبرا گونڈ کناں گشاں کہ بلوچستانءِ سرجمیں ضرورتاں نشنل پارٹی چارگا انت و جیڑواں ٹھینگءِ راھاں درگیجگا دستگٹ انت۔
بلوچی نیوز: شہ ایشاں گستا یک جیڑوے بلوچستانءِ تھا طالبانءِ وڑیں مذھبی کٹرانی ردوم انت۔ المـّا پہ بلوچ قوما نقصان انت۔ باریں پہ ایشانی دارگا نشنل پارٹیءِ گورا پالیسییے ھست انت؟
داکٹر عبدالمالک بلوچ: منی نزّا ساریا نشنلزمءَ 'phantasm،ءِ دیم داشتگ۔ المـّا ھنـّی بلوچستانءَ نوکیں جاوراں سر چست کتگ۔ مئے گورا یک نیمگےءَ سنـّی ازم یا وھابیت انت کہ سعودیءِ سرکشـّیا ردوم کنگا انت و دومی شیعہ ازم انت کہ پشتءِ پناہ ئی ایران انت۔ اے ھر دواں مئے چاگردا اثر کتگ۔ لشکر جنگوی بہ بیت یا دگہ لشکرے بہ بیت، ایشانی توکا تو مرچی بلوچ باسک گندئے۔ زی بلوچ گون نہ بیتگ۔ اے ردوما دارگ ھژدری انت۔ پمیشا آدگرانی وڑا ایشیا ھم من یک مزنیں مشکلے منـّاں۔
ھنچونائیا پاکستانءِ چاریگی بنجاھانی مزنتریں جھد ھمیش انت کہ بلوچ سوسائٹیءَ 'talibanisation'ءِ نیمگا بہ بارت۔ آئیءِ واھگ انت کہ بلوچ قومی پجّار بدلینگ و مسلمان قوم بہ بیت۔ مئے جھد انت کہ ایشیءِ دیما بہ داریں۔ پرچاکہ اگر بلوچ چاگرد 'طالبنائزئشن'ءِ آماچ بیت، گڈا شہ بلوچیتا درکپیت۔
ما ھمنچو گيئشتر سیکولر بہ بییں، دموکراٹ و پروگریسو بہ بییں پہ ما شرتر انت۔ اے وڑا گوں میانملکی واھگاں ما ھمگرنچ بییں۔
بلوچی نیوز: باز کس گش انت کہ افغان ملا قومپرست انت۔ بلوچ ملا پرچا قومپرست نہ بنت؟
داکٹر عبدالمالک بلوچ: واجہ! منی خیالا ملا ملا انت۔ بلوچ ملایانی نیاما تو ملا عرض محمدءَ و دگہ یک یا دو کساں کش دگہ ھچ کسا قومپرستی جھد نہ کتگ۔ جے یو آئی بہ بیت یا جماعت اسلامی ھر دوانی جھد انت کہ بلوچ قومدوست نزور بہ بنت و آ زوراک بہ بنت تاں گوں اسٹبلشمنٹءَ دے گر بہ کن انت۔ جنوبی افریکاءِ Desmond Tutu بلوچءِ ملا بیت نہ کنت۔
ملا گوں تو نندیت، تئی تبا گپ جنت، بلے تئی درد وار نہ بیت۔ من ترا ملا عبدالحقءِ مثالا دیاں۔ آئی پہ من یک لایق احترامے ملایے بیتگ۔ من گوں آئی نشتہ بحث کتگ۔ بلے آئی جماعت اسلامیءِ کٹریں منـّوکے ات۔ جماعت اسلامیءِ دیما نشنلزم زھرءِ قاتل انت۔
بلوچی نیوز: شہ افغانستانءَ پھتونانی بے حساب بلوچستانءَ آیگ و اودا جاھمنند بیگ پہ بلوچانی ڈموگرافک وجودا زنڈیں خطرے انت۔ ایشیءِ دیم چونکا دارگ بیت کنت؟
داکٹر عبدالمالک بلوچ: نشنل پارٹی ھمے سرپد انت کہ افغان پہ بلوچ قوما یک مزنتیں خطرے انت۔ ھما افغان ملتءِ تصّور کہ افغانانی مغزا ھست انت تاں ' Durand line'ءَ نہ انت؛ گوادرءَ انت۔
یک سیاسی جھدکارےءِ حسابا من سرپداں کہ شہ افغان کمیونسٹاں بہ گر تاں ظاھر شاہ و داؤد خان یا مرچییں کرزئیءَ پھکانی چم گوادرءَ سکّ انت۔ اے حسابا بلوچ قوم گوں مزنیں خطرےءَ دیم پہ دیم انت۔
راستے ما ھم سور انقلابءِ شادھیا گوں بیتگیں، چاپیں جتگ و سھبتیں گپتگ؛ بلے رندا مئے چم پچ بیت انت. ما مار ات کہ ایشی اژدھائیے بلوچ قوما پــِلِـکـّیت۔
بلوچی نیوز: ھنـّی نشنل پارٹیءِ شما دو سریں جھدکار پاکستانی سنئٹءَ نشتگ ات۔ شمئے خیالا اودا بلوچستانءِ سرا گپ کنگ یا بلوچ سرحالا چست کنگءِ دیمپان چے انت؟
داکٹر عبدالمالک: کسے مرچی سنئٹءِ رکارڈءَ اگر بہ چاریت، گڈا سرپد بیت انت کہ ما مدام بلوچستانءِ جیڑہ دیما آرتگ انت۔ ما بلوچستانءِ ھر جیڑہءِ سرا خبر کتگ۔ نواب بگٹیءِ شھادت بہ بیت، غلام محمدءَ جنگ بہ بیت یا دگہ جیڑہ ما مدام دیما آرتگ انت۔ مئے سرپدی ھمیش انت کہ اے اداروانی توکا روگ ضروری انت۔
بلوچ گش انت مکسک اگر نہ کشیت، بلے دلا بد انت۔ ما دوئیں مردم اگر پنجابءَ نہ کشیں، بلے آوانی دلا بد کت کنیں۔ بار بار بلوچستانءِ سرحالاں دیما آرگءِ سببا جاھے نہ جاھے تئی خبر دیما رئوت؛ میڈیا انت یا دگہ جاھے تئی خبر دیمترا برگ بیت انت۔
اگر ما اے ادارواں مہ رویں، مارا توارے نہ بیت انت۔ سنئٹءَ من پرے مقصدا نہ شتگاں کہ بلوچءِ حقاں پچگراں۔ پرچاکہ من زاناں بلوچءِ حق چؤش زیت نہ رس انت۔ بلے اے یک اداروے کہ جماعت اسلامیءِ دستا دیگ ئی روا نہ انت۔
انٹر نشنل فورم یا میانملکی کمیونٹی چاریت کہ پارلمنٹءَ تئی نمایندگی چی انت! اگر اودا نشنلسٹءِ نمایندگی ھچ مہ بیت، گڈا ھمے لیکیت کہ مردم گوں نشنلسٹاں ھمراہ نہ انت۔ آئی گوں ملایاں نندیت و جیڑوانی سرا گپ کنت۔ گوں جاگیرداراں گپ کنت، سردار، نواب و فیوڈلاں گوں نندیت۔
تھنا من نھاں، مئے ھر سنگتے کہ سنئٹءَ شتگ یا قومی اسمبلیءَ شتگ آئیا اودا بلوچءِ گپ جتگ۔ سنٹءِ توکا وا مرچی 60٪ بحث بلوچستانءِ سرا بیگا انت۔ پنجابءِ لھتے سنئٹر گش انت کہ ادا ابید شہ بلوچستانءَ دگہ گپ نہ بیت۔ من آواں گشاں کہ بلوچستانءَ issues ھست انت۔ ھر روچ یکـّے کشگ بیت و ھر روچ یک جھدکارےءِ جسد کئیت؛ تو چے کنئے!
اے حساب ما سرپد بییں کہ سنئٹ بہ بیت، قومی اسمبلی و پرگِنگی اسمبلی بہ بنت یا دمگی فورم ایشانی توکا روگ و بلوچءِ حقا کارمز کنگی انت۔
بلوچی نیوز: شما مثال دات کہ میانملکی کمیونٹی پارلمنٹانی توکا نشنلسٹانی نمایندگیا چاریت و حساب جنت۔ البت باز کس ایشیءِ چپ ھمے مار انت کہ شمئے وڑیں مردم بلوچستانءِ آزادیءِ جنزءِ دیما آڑ انت!
داکٹر عبدالمالک بلوچ: مئے نظر ھمیش انت کہ ھر بلوچے کہ پہ قوما دردے داریت، آ ھر کارے کت کنت؛ شر انت۔ شہ بنداتا تاں مرچی سلاحبندیں جنگولانی ما مخالفت نہ کتگ، نے کہ کنیں۔ گوں آواں مئے اختلاف نظر دو انت۔
یکـّے ایش کہ مرچی بلوچ قومی وجودءِ جنگ انت۔ آزادی انگت باز دیر انت۔ دومی 'multi-dimension' جھدءِ ضرور انت۔ الـّما توپک یک زوراوریں راھے، بلے اگر ما بہ لیگیں کہ تنھا ھمیشی جیڑوانی حل انت، منی خیالا رد انت۔
پہ ما ھر بلوچ جھدکار احترامءِ لایق انت۔ آ تفنگییے بہ بیت، آئیا قلم گوں بہ بیت، دانکے کوکـّار بہ کنت، کاربارے کنت یا میانملکی فورمانی توکا بلوچانی نمایندگیا کنت۔ اے درست بلوچ قومی جھدءِ بھر انت۔ یکـّے گيئشتر، دگرے کمتر گوں جھدا ھمراہ انت۔
ھما سنگت کہ آ مارا آڑ لیک انت، ما آواں احترام کنیں۔ ایش آوانی نظر انت۔ البت آواں چارگ لوٹیت کہ ما شہ یک تجربوےءَ گوَستگیں۔ ھنوگیں نتیجہ شہ یک تجربوےءَ گوزگا پد ما گپتگ۔ من شہ دلا گشاں کہ ھمے سنگت پنچ سال یا دہ سالا پد سرپد بی انت کہ مارا بلوچ قومءِ درد پر بیتگ و مئے جھد گوں ضرورتاں ھمرد بیتگ۔
اگر ما بہ گشیں کہ مارا گوں یونیورسٹیاں کار نیست، گڈا مئے جھد چونکا دیما رئوت! یک جاھلیں قومے چونکا وتی قومی جنزا دیما برت کنت؟
گش انت کہ دئومی عالمی جنگا پد 'چرچل'ءَ وتی مخالف گشتگ اتنت "بیا ات یک خبرےءِ سرا تپاک بییں کہ وت ماں وتا اگر کشت کؤش بہ بییں، بلے یونیورسٹیانی سرا حملہ نہ کنیں"۔
اگر بلوچستانءِ یورنیورسٹی و کالج بند بہ بنت، اسکول بند بہ بنت، گڈا بلوچ قومی جھد دیمروی نہ کنت۔ انقلاب یک شعوری عملے انت۔ ایشیا سرپدیں مردم کار انت۔ گوں جاھلاں انقلاب آرگ نہ بیت انت۔ اگر جاھلاں آرت بہ کتین ات، گڈا بلوچستاں دیری آزاد ات۔
شہ آ سنگتاں منی دستبندی انت کہ بلوچءِ پتّرا پراہ بہ کن انت تاں آئیءِ سرا ھر تکءِ جھدکار نشت بہ کنت۔ ملایانی 'پھلءِ سلات' مہ بیت کہ شہ زحمءَ تیزتر و شہ میدءَ بارگتر انت۔
مرچی اگر لندنءَ نندوکیں بلوچ وتی قومءِ سرا بیوکیں زوراکیءِ خلافا احتجاج کنت، ایشی سرجمیں دنیاءَ جکسیت۔ من بہ گشان ئی کہ آئیءِ احتجاج دردا نہ وارت، باید تفنگءَ بڈا بہ کنت و تربتءِ کوھا بہ رئوت! بلکیں آئی تفنگءَ بڈا کت نہ کنت۔ یک شاعرے شعرے پر بندیت ھمے شعر قوما ڈاہ کنت۔ مرچی مبارک قاضی، بشیر بیدار، عطا شاد و غلامحسین شوھازءِ شعر بلوچاں 'inspire' کن انت۔ اگر من بہ گشان اش کہ شاعریءَ یلہ بہ دی انت و گوں من نعرہ بہ جن انت یا اسمبلیءَ بیا انت اگر نہ، بئے نہ انت! اے ناروا بیت انت۔ شعر بیت، نعرہ و تفنگءِ توار؛ درست کہ یکجاہ بیت انت، گڈا قوم وتی منزلا زیت تر سر بیت انت۔ مقصد ایش انت کہ بلوچ قومی جھدءِ پڑ ھمنچو شاھگانتر بہ بیت، منزل نزیکتر بیت انت۔
بلوچی نیوز: ھنّی بلوچستانءِ قومی جھدءِ اواریں تکاں جھد کنوکیں سیاستکارانی نیاما غلط فھمییے جاہ کپتگ۔ پہ ایشیءِ دیر کنگا چے توجیل بیت کنت؟
داکٹر عبدالمالک بلوچ: ایشی بلوچءِ بے بھتی انت۔ مردم بہ چاریت کہ ایشی اولی جنگ نہ انت۔ ایشی پنچمی جنگ انت۔ چدا پیسر 1970ءَ دھرا جنگ بیتگ۔ حیدرآباد سازش کئس بلوچانی خلافا اڈ کنگ بیت۔ ایشیا شہ تفنگاں انگت گیئشتر بلوچءِ نام جکسینت۔
من گشاں نواب اکبر بگٹیءَ انگِر کنگءِ وھدا اگر ما 200،000 مردماں یکجاہ کنگا سوبین بہ بیتینیں، نواب اکبر بگٹیءَ جنگءِ ھمت فوجا نہ کتگ ات۔ هنی مئے جلوساں گيئشا شہ گيئشتر دو ھزار مردم انت یا سئے ھزار انت۔ دو ھزار و سئے ھزاراں آئی ھچ حسابا نیاریت۔ پمیشا مئے نظرا تناوھدی کہ عوام منظم نہ انت، ھچ نیکیں واھگ پیلو نہ بیت انت۔ اصلی واکدار عوام انت۔
ما 'گاندی' و 'ماؤ'ءِ لانگ مارچاں بہ چاریں! گاندیءَ گوں پنجاہ مردماں وتی مارچ بندات کت، منزل سربیگءِ وھدا پنچصد ھزار بیت انت۔
مرچی Missing persons’ issue انت. بلوچءِ خلافا سرکارءِ مزنیں سازشے انت۔ ماں ایشیا ایر جنیں۔ ما گندیں بیگواہ کتگیں مردمانی مات و گھار احتجاجءَ نند انت۔ ایشیءِ بدلا اگر ھزاراں بلوچ مات و گھار بہ نشتین انت، گڈا دومی بلوچءِ چست کنگا چاریگ ترستگ اتنت۔
پمیشا من گشاں کہ سلاحبندیں جھد و جمھوری جھد کنوک یکـّادگرءِ دیما مہ اوشت انت۔ مارا ھر دواں ھمگرنچ کنگءِ ضرورت انت۔ اے ردا ما کوتاھی نہ کتگ۔ آ سنگتانی باور ھمیش انت کہ ھر کس جمھوری جھد کنت، جلسہ و جلوس کنت آوانی خلافا انت۔
وھدے نواب اکبربگٹی جنگ بیت یا غلام محمد بلوچ شھید کنگ بیت، آوانی خلافا سرجم کتگیں مچّیاں دنیا ڈاہ دات۔ بلے رندا ھر جھدکارے کہ جنگ بیتگ آوانی خلافا جلسہ و جلوس نہ بیگا انت۔ سعید کرد ھم جھدءِ بھرے ات۔ آئیا ھم قربانی داتگ ات۔ آ ھم ماتےءِ چک ات و بلوچءِ درد ئي پر ات۔ آئیا جنگءِ خلافا پرچا مچّی نہ بیت؟ سبب ھمیش انت کہ رندا ما ' conflict'ءَ شتیں۔ اگر کنفلکٹءَ مہ شتینیں ما ھر نوجوانءِ شھادتا ھما وڑا توار چست کتگ ات کہ نواب اکبر بگٹی، غلام محمد و لالا منیرءِ شھادتا کتگ ات۔
بلوچی نیوز: شما موبلائزیشنءِ خبر کت۔ پیسرترا نشنل پارٹیءِ یونٹانی ٹھینگءِ گپ جت۔ پدّریں گپے انت کہ بلوچستانءِ بازیں ھنداں عوامی سیاست کنگ انگت مشکل انت۔ پرچاکہ بازیں بلوچ سردار و نواب نشنلسٹ نہ انت۔ آ مخالفت سگّ ات نہ کن انت۔ آیندہ چنچو دیرا شمئے خیالا شما اے وڑیں ھنداں پچین دیوان کنگا سوبین بی ات؟
داکٹر عبدالمالک بلوچ: ابید شہ ڈیرہ بگٹیءَ ما بازیں ھنداں پچیں دیوان برجاہ داشتگ انت۔ جھل مگسیءَ 62 سالاں پد ما اولی دیوان کتگ۔ ما وتی چیرمین سفرخان شھیدءِ پرس ما داشتگ۔
من سرپد بیاں اگر امریکا و برطانیا پاکستانءِ جمھوری پروسسءَ کموک کمک بہ کن انت، ما ایشیانی پرؤش دیگا سوبین بییں۔ گشگ آسان نہ انت کہ دو سالاں، سئے یا چار سالاں، بلے وھدءِ گوَزگا گوں ھؤر ما سوبین بیین۔
پہ درور خارانءَ مشھور بیتگ کہ یک ووٹے خدائے انت و دومی زرّئے انت۔ قومی اسمبلیءِ سیٹ آواں جے یو آئیءَ داتگ و پرگنگی سیٹ اش بھا کتگ۔ بلے مرچی اگر اودا گچینکاری بہ بنت نشنل پارٹی و بی ان پی گوں وتی تپاکیا آواں پرؤش دی انت۔ نوشکی و دالبندینءِ سرجمیں بازار مئے دستا انت۔ چدا پیسر نوشکی بازار ڈرگ مافیاءِ دستا بیتگ۔ ھمے پیما پیسری لوکل باڈی ووٹاں مستونگءَ ما ایوکا باج برتگ ات۔ اے رندی وا ما بائیکاٹ کت۔
اگر پاکستانءَ rigged election بہ بنت، آ مارا نہ الّ انت، بلے آزادیں ووٹاں ما آواں المّا پرؤش دیییں۔ اگر فوج تئی دیما بہ داریت تو تربتءَ ھم کپئے۔ اودا ما ووٹ کپتگ پدا ھم مارا دئور ئی داتگ۔
یک راستیے نیں شرّی سرا درا انت کہ گوں dictatorial نظاما پاکستان پشت نہ کپیت۔ اگر پاکستانءِ اسٹبلشمنٹ وتی کارکرداں شر مہ کنت، آئیءِ ردیں کارکرد وت اے ملکءِ تباھیءِ سبب جؤڑ بی انت۔ تباھیءِ سبب بلوچ نہ بی انت۔ نیکہ سندی بی انت۔ اسٹبلشمنٹءِ وتی بے راھی سبب جؤڑ بی انت۔ اگر باندا پاکستانءَ فوجی رواج لاگو بہ بیت، آئی یک عزابےءِ کورچاتا کپیت۔
بلوچی نیوز: گڈسرا شہ شما جست انت کہ شما یک لیڈرےءِ حیثیتا وتی منوک، مخالف و نیامجیءِ مردماں چے کلہ دیگ لوٹ ات؟
داکٹر عبدالمالک بلوچ: من ھمے گشاں کہ ھر بلوچ گوں وتی وطن و قوماں ستک دل گون بہ بیت۔ بلوچءِ آئیڈیل قومی انسٹی ٹیوشن بہ بنت۔ آ بزان انت کہ ھیرو عوام انت، فرد نہ انت۔ ھر قومءِ ھیرو کہ فرد بیت انت، آ قوم ریجیت۔ ما بلوچ عوامءِ سرا بروسہ بہ کنیں آئیا منظم بہ کنیں و عوامءِ ھمراھیا دیما بہ رویں۔
هیچ نظری موجود نیست:
ارسال یک نظر
وتی کلوا چێرا نبیس إت