گاریں بلوچانی حال میانملکی کانفرنسا درشان کنگ بیت انت

گار کنگ بیتگیں مردمانی میاں استمانی کانفرنسے ماں لندن سرجم بیت۔ اے کانفرنسا بلوچ جھدکاراں بھر زرت و بلوچستانءِ گاریں جھدکارانی باروا دیوان سرپد کت۔ سئے روچی کانفرنسءِ گڈي روچا بھر زیروک یک لشکرےءِ درؤشما شہ 'ماربل آرچ' تا ملکءِ سروزیرءِ ماڑیءِ دیما دانک کوکار جنانا شـُت انت۔

ایشاں بلوچستانءِ سرا بیوکیں زوراکیانی دیمءِ دارگا شہ میانملکی گل و قوماں کمکءِ لوٹ کت۔ آواں لوٹ ات کہ پاکستان و ایرانءِ پشت پناھیا جھانءِ ملک انگار بہ کن انت۔ کانفرنسءِ برجم داروک 'آئی سی اے ڈی' نامیں گلے ات و بلوچ گاریں مردمانی پلانگریا جھد کنوکیں بلوچاں واجہ فیض بلوچءِ سروکیا ایشانی ھمراھداری کت۔

بلوچاں ابید شہ 27 ملک آتکگیں گاریں مردمانی پلانگری زیروکاں ماں کانفرنس بھر زرت۔ ایشاں وتی وتی ملکانی گار بیتگیں مردمانی حال دیوانءِ دیما درشان کت انت۔ پدا شہ انسانی حقانی پانکجنوکیں میانملکی گلاں پہ گاریں مردمانی آزاد کنائینگا جھد کنگءِ لوٹ اش کت۔

یکـّے شہ مزنتریں راستیاں کہ درشان کنگ بیت، ایش ات کہ زوراکی کنوکیں لیڈر وھدے شہ وتی ملکاں ولگوج کنگ بی انت، گڈا تچانیا ماں مغربی ملکاں پناہ زیر انت و مغربی ملک آوان پناہ دی انت۔ گپ جنوکاں لوٹ کت کہ مغربی ملک زوراکی کنوکیں لیڈراں پناہ مہ دی انت۔