بی اس او –آزادءَ ھؤریں آئی اس آئیءِ ایجنٹ؛ روچ گون دست چیر دیگ نه بیت!

بی اس او –آزادءِ آئی اس آئیءِ باسکیں ترجمانءِ یک بیانے تالان بیتگ کہ ایشیءِ واھگ بلوچستانءِ سیاستا تباہ کنگءِ نیمگا زیت تر برگ انت۔ چدا پیسر ھم ھمے سرکاری پگار وارانی کارکرداں مزنیں سیتے بلوچاں نہ داتگ۔ ابید شہ 70 شاگردانی جوناں۔ ھمے ھفتادیں اگر پہ وانگا بہ اشتین انتش، باندا بلوچ قوما 70 کوّاس دستا کپتگ ات کہ قوم و بلوچستانءِ خدمت اش کتگ ات۔

ھمے بیان کہ بی اس اوءِ ترجمانءِ ناما شنگ کنگ بیتگ پیئشداریت کہ روچءَ گوں دست چیر دیگءِ جھد کنگ بیتگ۔ المـّا ناممکنیں گپے انت۔ بی اس اوءِ ترجمانیں آئی اس آئیءِ اے ایجنٹ بنگلادیشءِ سرا زھر گپتگ کہ پرچا غوث بخش بزنجو اش داد داتگ۔

بنگلا دیشءَ وتی آزادیءِ روچءِ درگتا جی ام سید، میر غوث بخش بزنجو، اندرا گاندی و دگہ صداں کساں داد دیگءِ جار جتگ ات۔ اے داد پہ بنگلادیشءِ آزادیا آوانی سیاسی پلانگریءِ سببا دیگ بیتگ انت۔

گوں میر بزنجوءِ زھگاں آئی اس آئیءِ ایجنٹانی دلرنجی مرچی ھمنچو دیما برگ بیگا انت کہ بی اس او –آزادءِ سرپدیں باسکانی چم ھم بستگ انت۔ و پہ آواں ظاھر نہ انت کہ اے وڑیں بیان آوانی جندا و بلوچستانءِ سیاستا تباہ کن انت۔

قومدوستءِ ناما کار کنوکیں پاکستانی اے ایجنٹ سرپد بہ بنت کہ روچ گوں دست چیر دیگ نہ بیت۔ ایوکا بنگلادیش نہ انت کہ غوث بخش بزنجوءِ گرانقدریں جھد ئی منـّتگ۔ چدا پیسر دنیاءِ دگہ بازیں ھنداں بلوچستان و انسانیتءِ خدمتءِ پجّارءَ غوث بخش بزنجو ستا دیگ بیتگ۔

الـمّا وتی آزادیءِ 39 سالاں رند اے داداں دیگ آوانی دراجکشیں پولکاریءِ برورد انت۔ بنگلادیشی سرکارا آئی اس آئیءِ اے پگار وارءِ سوجانی ضرورت نہ انت۔

بی اس او –آزادءِ مخلصیں باسکانی ذمواری انت کہ آئی اس آئیءِ ایجنٹاں شہ وتی رما در بہ کن انت۔ اگر چؤش اش نہ کت، گڈا ایشانی کِشتگيں دشمنیءِ روتگ سالاں سال بلوچ و بلوچستانءَ چؤش کہ مِیشو (وَروک)ءَ توک ور کنت۔

ترانگ بہ کپ ات کہ ھمے وڑیں ایجنٹاں چدا پیسر گوں وتی بے بنیں بیاناں بلوچ نشنل فرنٹءِ سیاسی ٹولی گوں یکـّا دگرا میڑینت انت۔ یکـّےءَ دروغیں بیانے تالان کت کہ خیربیار مری نشنل فرنٹ میانملکی نمایندہ انت۔ شہ اے خبرا نشنل فرنٹءِ ھچ باسکیں ٹولی سھیگ نہ ات، نے کہ میر خیربیار مری وت سھیگ ات۔

بی یو سیءَ شنگ بیتگیں اردو بیانا بہ چار ات۔