پنجابءَ جنیں آدمانی سرا شہ آ دگہ پرگنگاں گیشتر ظلم بیتگ: فافن

آزاد و منصفانہ گچینکاری نٹورکءِ شنگ کتگیں رپورٹےءِ ردا پاکستانءِ پرگنگ پنجابءَ جنیں آدمانی سرا ظلم و ناروائی شہ سرجمیں پرگنگاں گیشتر بیتگ۔ رپورٹا داتگ کہ پولیسءِ گورا ثبت بیتگیں 1،063 جنیں آدمی شکایتانی نیاما 78٪ پنجابءِ بیتگ اَنت۔ ایشیءِ دیم پہ دیمیا بلوچستانءَ ثبت بیتگیں شکایت 1٪ اِنت۔

ثبت بیتگیں شکایتانی نیاما 215 جنسی زوراکیءِ شکایت اَنت۔ ایشانی 85٪ پنجابءَ بیتگ اَنت۔ جنیناں چوپگءِ 253 شکایت پنجابءَ ثبت کنگ بیتگ اَنت۔ بلوچستانءَ دو ھنچوشیں شکایت آرگ بیتگ اَنت۔ آبروءِ ناما ماں پنجاب کشگ بیتگیں سرجمیں جنیں آدم 40 بیتگ اَنت۔ 6 ماں سند پرگنگا ھمے عذرا کشگ بیتگ اَنت۔

رپورٹا سرکچ داتگ کہ پنجابءَ گیشتر شکایتانی ثبت بیگءِ یک سببے اودءِ مردمی آبادیءِ بازی و دگرے مردمانی دلیری بیت کنت۔ بلوچستان و پختونخوا پرگنگاں کمتر شکایتاں پولیسءِ گورا برگ بیگءِ سبب ھچبر ایش نہ اِنت کہ اودا جنیں آدمانی سرا زوراکی نہ بیتگ۔

حال ایکسپریس ٹربیونءِ منّتا