وانگ دربرگا گولایشیں بلوچ ورنایانی گل بی اس او ۔پجارءِ گوانکوا گشتگ بلوچستانءَ بلوچ وانگ دربروکاں پہ زانت شہ وانگا دیر تھلانک دیگءِ پندل سازی کنگ بیتگ۔ اے وڑا بلوچاں شہ علما زبھر کنگ و آوانی زربار و منڈیاں آوار جنگءِ کارا آسان کنگ لوٹ اَنت۔
بی اس اوءِ گوانکوءِ بیانا دیمتر پاشک کتگ کہ انفارمیش ٹکنالوجی زانتجاہ ۔کوںٹہءَ وانوکاں زیرگءِ راھبند بلوچانی خلافا فرقگزاری راھبندے اِنت۔ نوکیں وانوکانی ناماں ثبت کنوکیں تکءِ سروک و لھتے دگہ پروفیسراں سالے بیتگ کہ ھمے بلوچ دشمنی راھنبد اش رواج داتگ۔
بیانءِ ردا زانتجاھا یکے پاکستان میرٹ و دگرے بلوچستان میرٹءِ عذراں وانگا واھوکیں بلوچانی راہ اش بستگ اَنت۔ بلوچ دشمناں آنلائن چکاسے رواج داتگ کہ اودا وتی پسندءِ مردماں سوبین و بلوچاں بے سوب شون دیگا اَنت۔ ھمے راھبندا ھزار کس زیرگ بیتگ اَنت۔ ھزارینانی نیاما بلوچانی حساب 50 کس اِنت۔ ھمے پنجاھیں بلوچ ھم نزوریں تکاں زیرگ بیتگ اَنت۔
بی اس او ۔پجارءِ گوانکوا دیمترا گشتگ کہ چیردستیں چانسلر و چیردستیں رجسٹرار لھتے مردمانی ناماں لب زیرگا رند ثبت کنگا اَنت۔
بیانا سرکچ داتگ: بلوچستان زانتجاہ بلوچستانءِ وتی مڈیانی زراں برجاہ اِنت۔ پمیشا اے بلوچ دشمنیں راھبندا رندگیری کنگ ھچبر منّگ بیت نہ کنت۔ فرقگزاریں فکرءِ واھندیں انتظامیوا ما بلوچ دشمنیں راھا روگا نہ اِلّیں۔ اگر وانگ دربرگا واھوکیں بلوچ زیرگ مہ بی اَنت، ما دگہ بلوچ ٹولیانی ھواریا زانتجاہءِ خلافا جنزے بندات کنیں۔
گڈسرا لوٹ کنگ بیتگ کہ بلوچ دشمنیں چیردستیں چانسلر شہ کارا کشگ بہ بیت، پاکستان میرٹءِ ناما وانوک زیرگ مہ بی اَنت، بلوچستان میرٹءِ راھبند مٹینگ بہ بیت و دمگی میرٹ رواج دیگ بہ بیت۔
هیچ نظری موجود نیست:
ارسال یک نظر
وتی کلوا چێرا نبیس إت