اگر شما نہ زانتگ، سھیگ بہ بی ات کہ بلوچستانءِ مردم ھوشمندیا دنیاءَ دومی مقاما اَنت

ایرانءِ نندارینتگیں شیعہ ملاءِ ردا بلوچستانءِ مردم شہ افغاناں رند دنیاءِ ھوشمندتریں مردم اَنت۔ اے خبر ملا سلیمانیءَ شہ یونیسکو نقل کتگ و گشتگ۔ ملاءَ ضرورت مارتگ کہ شہ بلوچستانءِ مردمانی ھوشمندیا سوب کنگ بہ بیت۔

بلوچانی باروا یونیسکوءِ شوھاز کاری و پدا اے ملاءِ بیانءِ ردا چارگ بہ بیت، گڈا مردم زانت کہ بلوچستانءِ پدمنتگیءِ سبب بلوچانی جند نہ اَنت؛ ایران و پاکستانءِ زوراکیں سرکار بلوچ و بلوچستانءِ پدمنتگیءِ بُنی سبب اَنت۔

ملا عباسعلی سلیمانیءَ دیمترا اے راستی ھم منّتگ کہ بلوچستانءِ شری ڈالچار کنگ بیتگ اَنت۔ بلہ شرارت و شپوکی گوں اے قوما لچّینگ بیتگ اَنت۔ ”ضروری اِنت کہ ایرانی واک دمگءِ توانمندی، ھنر و اخلاقءِ باروا ملک و درملکاں سرپدی بہ دی اَنت۔ پرچاکہ بلوچستانءِ اصلی دروشم ھمیش اَنت“ ملا سلیمانیءَ سوج داتگ۔

ملاءَ دیمترا ملائی رواج ساڑاتگ و گشتگ: انقلابءِ اولسرا بازیں مردماں ھمے گشت ات کہ ملکءِ دارگ ملائی کارے نہ اِنت۔ ھمنچوک اش ھم گشتگ ات کہ ملایانی آیگا برق ھم بند کنگ بی اَنت۔ البت مردمانی ھمے خبر رد ثابت بوت و مرچی ھر میتگےءَ کہ شہ 20 لوگا گیشتر ھست، برق رسینگ بیتگ۔

حال زرمبش داٹ نیٹءِ منّتا