ایرانی سرکارءِ مخالف ٹولی پہ کرسیءِ دستگرگا سک تکانسر اَنت۔ شہ ایرانءِ انقلابا پد فارساں یکّوںی جھد کتگ کہ ملکءِ واکداریا شہ ملایاں پچگر اَنت۔ بلہ ملا ھماوانی وتیگ اَنت و سرپد بیتگ اَنت کہ چے وڑا وتی سیاسی مخالفاں ولگوج و برباد بہ کن اَنت۔ البت، امریکائی واکانی عراق و پدا افغانستانءَ روگا رند پشت کپتگیں ایرانی سرکار مخالف ٹولیانی ناامیدیں واھگاں پدا چورْک جتگ۔ امید کنگا اَنت کہ امریکا آوانی حالتءِ سرا ھم رحم وارت و ایرانی ملا سرکارا ھم شھماتے جنت؛ شہ واکداریءِ کرسیا دیر کنت۔
اولا ماں عراق و پدا افغانستانءَ لٹ ورگا رند یورپ و امریکاءَ نوکیں راھبندے چکاسگ بنا کتگ۔ ماں لیبیا اے راھبندءِ سوبینیا پد دلگوش دیم پہ سوریا بیت اِنت و بشار اسدءَ قدافیءِ رندا راھی کنگءِ مقصدا سوریا ۔نو فلائی زون جوڑ کنگ و مردم سلاحبند کنگ بیت کن اَنت۔ ایرانءِ سرکار مخالف ٹولی ھم سرپد اِنت کہ نیں مغربی ملک وتی مردمانی کوشارینگا ساڑی نہ اَنت، بلہ سیریں ملکانی مردماں پہ وام سلاح دیگا اوشتاتگ اَنت۔ اے سلاحاں کارمرز کنگا مردم پکار اِنت۔
ھمے ردا فارساں چم جتگ اَنت کہ ایرانءِ نندوکیں قومی و مذھبی اقلیت آوانی فوجءِ سپاھی جوڑ بی اَنت و مغربیانی داتگیں وامی تفنگانی تیراں ملایانی سینگا سارت کن اَنت۔ اے کارا کنگا پد فارس وت بروتاں تاب دیانا تھراں پارلمنٹا نند اَنت و پٹاک جن اَنت۔ اقلیتاں کارمرز کنگءِ گپ تھنکا سرکار مخالفیں فارسانی واھگ نہ اِنت، واکداریں ملایاں ھم ھمے بیم دلا ھست اِنت کہ اقلیت آوانی خلافا کارمرز کنگ بی اَنت۔ البوابہ نامیں یک عرب حالجاھےءِ ردا ملا ماں وتی اِھوتیں دیواناں یکّوئی ھمے ترسا درشان کنگا اَنت۔
بلّی توریں بلوچ، عرب، کرد و جنوبی آذربائیجانءِ ترکانی آزادیءِ جھد رُشت کنگا اِنت؛ اے قوماں پہ ایرانءِ دموکراسیا سلاحبند بیگ و جنگا گولائیش بیگءِ ھچ واھگ نیست اِنت۔ عبدالمالک ریگی و آئیءِ براتانی ماں دریں ملکاں دستگیر بیگ و ایرانءِ دستا دیگ بیگءِ کارکردا بلوچانی ھوش سار کت اَنت کہ آواں چپ چاگردا دوستواہ نیست اِنت۔ وھدے کہ دوست نیست، گڈا پرچا بلوچ پہ درامداں وتا دلسیاہ بہ کن اَنت۔ شر تر اِنت وتی واکا پشت بہ گیج اَنت پہ ھما روچا کہ ملایانی دیرکنگا رند آیوکیں فارس سرکار بلوچانی سرا وتی شاؤنسٹی زوراکیاں بنا بہ کنت۔ پرچاکہ شہ ملایاں رند آیوکیں فارس ھم پہ بلوچاں بینگ و شیرءِ جو جھلاد نہ کن اَنت۔
هیچ نظری موجود نیست:
ارسال یک نظر
وتی کلوا چێرا نبیس إت