گالگدارے گوں بانک ھلری کلنٹون

گدارکنوک: نک شفرین ۔اے بی سی نیوز

20 اکتوبر کابل ۔افغانستان

جست: من اے دمگءِ ملک پاکستان و افغانستانءَ سئے سال اِنت کارایاں۔ مرچی گوں حالکاراں شمئے تران من اشکت۔ شما شہ پاکستانءَ چے لوٹوک ات؟ پاکستان گشیت کہ آ حقانی ٹولیءِ خلافا فوجی گام چست نہ کنت۔ تو گشگ لوٹئے کہ شما وت آوانی خلافا چست بی ات؟

بانک کلنٹون: بہ چار نک، سئے پڑ اَنت کہ ما واھوکیں پاکستان ھوارکاری بہ کنت۔ و ھنچوش کہ مرچی ماھلّہ تر من گشت، مئے خیالا مارا جنگ برجاہ دارگ لوٹیت، مارا گپ و دیوان بنا کنگ لوٹ اَنت و مارا تعمیرات کنگی اَنت۔ باریں آ مئے و افغانستانءِ کمکا نام گپتگیں سئیں پڑاں چے کت کن اَنت!

اولا جنگءِ برجاہ دارگا مارا باز کمک کت کن اَنت۔ ایشیا کس منکر بیت نہ کنت کہ پاکستانءَ پناہ جاہ ھست اَنت و ھنچیں جاگہ ھست اَنت کہ اودا مردم افغان، امریکائی و دگرانی سرا بیڑ برگا وتا ساڑی کن اَنت۔

ھمودا پاکستانیانی سرا بیڑ برگءِ بندوبست ھم بی اَنت۔ گوستگیں 10 سالاں سی ھزار پاکستانی مردم ٹرورسٹانی بیڑاں کشگ بیتگ اَنت۔ اے ھنچوشیں پڑے اِنت کہ ما پھکانی نیاما ھوارکاری بہ بیت۔ ھمے پناہ جاہ تنْک بیت کن اَنت۔ پاکستانءَ گوستگیں دو و نیم سالاں پاکستانی طالبانءِ خلافا فوج کارمرز کتگ؛ گوں اے کارا مارا دل اڈی رستگ۔

پاکستان کمک بہ کنت تانکہ سیمسرا گوازینت کت مہ کن اَنت۔ وھدے کہ ما آواں شوھازیگیں، آوانی درگیجگا پاکستان مارا کمک بہ کنت۔ شورشیانی رشتگاں شہ فوج و چاریگاں بہ سندیت۔ پرچاکہ ما زانیں لھتے کس ھست اَنت کہ آواں پیشوکی ڈاہ کن اَنت۔ بزاں جنگءِ پڑا پاکستان باز کمک کت کنت۔

گپ و دیوان کنگءِ پڑا آواں تچکا گشگ لوٹیت کہ افغانی طالب و طالبانی ھوارکار چوش کہ حقانی ٹولی گوں افغان سرکارا پہ جیڑہءِ ٹھینگا دیوان بہ کن اَنت۔ بہ گش اَنت کہ پہ اے مقصدا بیوکیں گپانی ردا آ مئے ھمکوپگ اَنت۔

چدا پد کئیت تعمیرءِ پڑ۔ دمگءِ جوڑ کنگا آ مئے کشا ھوار بہ بی اَنت۔ ھما چیزاں کہ ما نومبرءِ ماھا ۔اسنبل کانفرنسا درشان کنگییں۔ پدا دسمبرءَ ماں ۔بونءَ آ مئے کشا بہ اوشت اَنت و شون بہ دی اَنت کہ معیشتی ھواردستیا آ دنیاءِ بھرے اَنت۔ آواں سرپد بیگ لوٹیت کہ پہ ردوما ایمنی ضروری اِنت۔

منی خیالا انشپی یا باندا کہ من اودا بیاں، مئے نیاما پہ چست ایرا باز ھست اِنت۔

جست: حقانی ٹولیا شہ ھزار کساں گیش امریکائی و تپاکیءِ مردم کشتگ اَنت۔ پرچا امریکا گوں آواں نندیت گپ کنت؟

بانک کلنٹون: پدردیں گپ ایش اِنت کہ تو گوں وتی سنگتاں دیوان کنگا ایمنی آرت نہ کنئے۔ گوں ھما مردماں کہ تانکہ حدّےءَ ما پتّیں ٹیبل سرا نندگءِ ضرورت نہ اِنت۔ ما پیسری جیڑواں ھمے کار کتگ۔ مئے خیالا نیں وھد رستگ کہ گپ بندات کنگ بہ بیت۔ ایشیءِ معنا چوش نہ اَنت کہ ما جنگ نہ کنیں۔ آ ھر دویں کاراں کنگا اَنت، ما ھم کنیں۔

طالبان و حقانی ٹولیءِ ھنچیں تک بیت کن اَنت کہ گوں آواں صحل کنگ گراں بہ بیت۔ ھنچوشیں راھے کہ پہ ما و افغانستانءَ منّگی بہ بیت، آ مہ منّ اَنتی۔ البت تانکہ ما مہ تُکّشیں، زانت نہ کنیں۔ مئے جھدءِ یک بھرے ھمیش اِنت کہ وتی وسا کاربندیں بہ چاریں باریں اے ٹولیانی سروک تانکہ چے حدّا امن آرگ و تپاکیءِ برجاہ دارگءِ مقصدا پہ دلیں گپ کنگا واھوک اَنت۔

جست: مشرقی افغانستانءَ امریکائی فوجی گش اَنت کہ شہ پاکستانی فوجی بنجلانی کشا آوانی سرا تیرگواری کنگ بیتگ۔ چوش ھم گشتگ اش کہ شہ پاکستانی فوجی بنجلاں تچکا تیرگواری ھم بیتگ۔ باریں پاکستانی فوج گوں امریکائی فوجا دوست اِنت؟

 

بانک کلنٹون: ھو، منا اے حال رستگ اَنت۔ منا بژنیگ اش کتگ۔ المّا پاکستان ھم گشیت کہ شہ سیمسرءِ آدگہ نیمگا آوانی سرا تیرگواری کنگ بیتگ۔ من زاناں شہ پاکستانی بنجلاں تیرگواری بیتگ و شہ افغانیاں ھم بیت۔ شہ ایشاں چنچو پہ زانت بیگا اَنت، چنچو یکّادگرا بیمتراپ دیگءِ مقصدا بی اَنت یا شورشیانی پلانگری و خلافا بیتگ اَنت؛ ما ایشاں ٹھینگا دستگٹیں۔

من سرپداں کہ جنرل النءَ پاکستانءِ جنرل کیانیءِ دیما اے خبر پدّر کتگ کہ چے بیگا اِنت، و سبب ھست اَنت کہ ما بہ زانیں ایش شہ دویں نیمگاں بیگا اِنت۔ ایشانی بند کنگ ضروری اِنت۔ پمیشا مارا ایشیءِ بُنزولا چارگ لوٹیت۔ ابید شہ اے ردیاں، مئے جیڑہ باز اَنت۔ جنگانی تھا وتیگانی دستا مردم تیر ور اَنت و لھتے جاگھاں مردم رد حساب جن اَنت۔

منی خیالا ایش شہ اوپارا در نہ اَنت۔ ھماکہ شہ واکا در اَنت و اوپار کنگ نہ بی اَنت، پناہ جاہ اَنت۔ من لوٹاں بہ گشاں کہ افغانی پولیس و سیمسری فوج کہ سیمسرءِ اے دیم و آدیما تیرگواری کن اَنت گوں آ خبرا کہ پاکستانءِ خاکا کسے جاگہ بہ کنت فرق ھست۔ ماں پاکستان ٹولیانی بنجاھانی جوڑ بیگ و شہ اودا مئے فوجءِ سرا بیڑ آرگءِ کاراں راھشونی کنگ؛ امریکا و افغانستانءِ فوجیاں کشگءِ کارکرد ڈالچار نہ بی اَنت۔

جست: تو چونکا پاکستان فوجءِ سرا بروسہ کت کنئے وھدے کہ آواں اجازت داتگ اَنت یا شہ گوستگیں 10 یا گیشتر وھدا زان اَنت کہ اودا پناہ جاہ ھست اَنت؟

بانک کلنٹون: بہ چار شہ منی اگدہءِ زیرگا ساری پاکستان وا طالبانی دیما ھم نہ دارگ بیتگ۔ منا یاد اِنت کہ من آوانی سرا ٹلفون جتگ ات، پرچاکہ آ جاگھاں پہ طالباں یلہ دیان اتنت۔ منی خیالا شریں راھبندے نہ ات۔ نیں آ طالبانی خلافا پاد آتک اَنت و شہ آواں جاگہ اش پچگراں کت اَنت۔

شورشیانی بنجاھاں روگا پاکستانءِ لھتے ترس ھست اِنت، ایشاں مئے فوجی منصوبہ بند سرکچ ور اَنت۔ مارا مغزانی ھم پتی پکار اِنت۔ اے سرپد بیگ ضروری اِنت کہ خطر تھنا سیمسرا نہ اِنت، پہ آوانی ملکءِ تھا ھم ھست اِنت۔ و اگر بدتر بیگا اشت اش، گڈا آوانی چکا ھم کپیت۔

ما ھمے تکاں کارا دستگٹیں۔ گوں من جوائنٹ چیفسءِ سروک جنرل دمپسی، سی آئی اےءِ داریکٹر پٹروس کہ پیسرا جنرل پٹروس بیتگ، و دگہ سرکاری کارمند ھمراہ اَنت۔ ما لوٹیں اے خبرا بہ گیشینیں باریں آ گوں ما ھوارکاری کن اَنت یا نہ۔ پرچاکہ مئے گامگیچ گوں آوانی ھوارکاری کنگ یا نہ کنگءِ ارادوا بندوک بی اَنت۔

جست: ترا آوانی خبر باور بی اَنت؟

بانک کلنٹون: منی خیالا اے خبر ھمودا رئوت کہ کار شہ گپاں شرتر ظاھر بنت۔ من لوٹاں بہ گشاں کہ اگر ما کارے دیست، گڈا مارا بارو کنگ لوٹ اَنت۔ اے گپا گیش بہ کناں کہ القایدہءِ لھتے باسک و ھوارکاریں ٹرورسٹانی باروا ما شہ آواں لھتے لوٹ و دسبندی کتہ بیتگ و ھمے ردا ٹروریزمءِ خلافا ھواریا کاریں کتگ۔

جست: البت حقانی ٹولیءِ خلاف نہ کتگ؟

بانک کلنٹون: حقانی ٹولیءِ خلافا انا۔ ھنوگیں چست ایرانی مقصد ھمیش اِنت کہ دیمترا بہ کنزیں۔ پہ یکادگرا ضرورییں ھوارکاریءِ پڑا پراہ تر بہ کنیں۔

جست: منی خیالا، منی وھد کٹّگا اِنت، گڈی جستا کناں۔ پہ یک امریکی چاروکےءَ کہ ھنی امریکاءَ نشتگ گوں وتی ٹکسانی ڈالراں تانکہ چنچوک وھد پاکستانی سرکار و پاکستانی فوجا کمک بہ کنت۔ ھما پاکستانی فوجا کہ افغانستانءِ سرا بیڑ بروکاں کمک کنگا بیتگ یا کما شہ کمتر زانتگ اش کہ بیڑ بروکانی بنجاہ پاکستانءَ اَنت؟

بانک کلنٹون: من ایشیا یک مزنیں جستے منّاں۔ پرچاکہ پہ ھر ملکےءَ مئے فوجی و شھروندی کمک گوں ھمیشی بندوک اَنت کہ دردواریں جاھے بہ روت۔ مئے مقصد و ارشتانی ھمدپیا بہ بیت۔ تانکہ باز وھدا ھنچوش بیتگ۔ ھر رند کہ من گوں پاکستانیاں ڈیک وارتگ، آواں منا ترانگ داتگ کہ پہ آواں خیراتی کمک جھل و برز بیتگ اَنت۔ آوانی خیالا باز براں کہ ایمنی اش نگیگیں جاورانی دیمپان بیتگ، ما یلہ داتگ اَنت۔

اے رشتگ یک چپ چوٹینے اِنت۔ پمیشا ما و مئے مارشتاں ڈاہ بیگ لوٹیت کہ چونکا چارگ بیگایں۔ ھمے وڑا آواں مارگ لوٹیت کہ چے وڑا چارگ بیگا اَنت۔ ما دویں ملکانی مردم یکا دگرءِ سرا زھرا پُر اَنت۔ پدا ھم من گشاں کہ ھوارکاری باز شرتر اِنت۔ ھوارکاری پاکستانءِ سیتا اِنت و امریکا ھم فایدہ کنت۔ البت ایش یک راھے اِنت کہ پاکستانی ئی گچیں بہ کن اَنت۔ المّا آوانی گچین کتگیں راھا ما ھم گندیں۔

جست: اگر منا موہ بہ دیئے، من زاناں منی وھد ھلّتگ، بس اے گڈی جست۔ ایوکا شہ سیمسرا شورشیانی گوَزگءِ گپ نہ اِنت، باریں افغانستانءَ امریکاءِ فوجیاں کشوکیں بمبانی کالا ھم شہ پاکستان آیگا اَنت؟ اگر ھنچوش اِنت، ایشانی باروا شما شہ آواں چے لوٹ کنگی ات؟

بانک کلنٹون: منی خیالا لھتے کالا آرگ بیگا اَنت۔ improvised explosive devices منزنیں حسابے شہ پاکستان آرگ بیگا اَنت۔ جولائیءَ وھدے من پاکستانءَ شتاں ھمے باروا من گوں آواں باز گپ جت۔ آواں سرپدی نیست کہ فرٹیلائزرءَ ھواریں یک امونیم نایٹریٹ نامیں درمانے بمبانی تھا باز کارمرز بیگا اِنت۔ شہ اوکھوما بمبتراکا رند ما پہ ایشیءِ حسابا دارگا باز جھد کتگ۔ ما ایشیءِ دمبداریا ‘ٹگ‘ ھم رواج داتگ۔

ایش پہ پاکستانءَ نوکیں گپے ات۔ ھنی ما زور پردییں کہ ترنتریں گام چست بہ کن اَنت۔

جست کنوک: باز مھربانی

بانک کلنٹون: تئی ھم مھربانی، گوں تو گپ کنگا باز وش بیتاں۔

انگریزی گالگدار امریکاءِ سٹیٹ دپارٹمنٹءِ سایٹا 20 اکتوبرءَ شنگ بیتگ۔