امریکاءِ درملکی جاورانی وزیر ھلری کلنٹون و آئیءِ پاکستانی ھمدرور ھنا ربانیءَ ماں اسلام آباد ھواریا گوں حالکاراں تران کت۔ یکے شہ حالکاراں وھدے شہ ھلری کلنٹون جست کت کہ باریں آ گوں پاکستانی فوجءِ سروک جنرل کیانیءَ ھمخیال اِنت کہ پاکستان یک وتواکیں ملکے اِنت و عراق یا افغانستان نہ اِنت! ھلری کلنٹونءَ پسو دات کہ آ گوں جنرل کیانیءَ ھمخیال اِنت۔ البت پاکستانءَ زانگ لوٹیت کہ حقانی ٹولی و طالبان پہ آواں و افغانستانءَ زنڈیں خطرے اَنت۔ پمیشا ایشانی ولگوج کنگا پاکستانءَ گولایش بیگی اِنت۔
تبصرہ: سیاست وتی جاگھا، جنرل کیانیءِ خبرءِ نیمگا بہ رویں کہ پاکستان چوش کہ عراق و افغانستانءَ نہ اِنت۔ جنرل کیانیءِ مقصدا وا ھر کس سرپد اِنت۔ البت اگر پاکستانءِ جندا مردم بہ چاریت، گڈا نبیتگین گندیت و اشکنیت۔ ھمے نبیتگینانی حسابا وا کیانیءِ خبر ٹک اِنت۔ شہ نبیتگیں چیزاں یکے ایش اِنت کہ پاکستانءِ ریلگاڑی بے دیزلءَ راھانی نیما بند اَنت و مسافر اش پہ وتی منزلا سر سر جنان اَنت۔
روچتاک جنگءِ سایٹا شنگ بیتگیں حالےءَ داتگ کہ یک ریلگاڑیے زیگ تانی ماں سبی بے ڈیزلءَ مھتل اِنت۔ ریلگاڑی شہ کراچی درکپتگ کہ کوئٹہءَ بہ رئوت، بلے سبی اسٹیشنا ڈیزل ئی ھلّتگ اَنت۔ دیزل نہ رسگءِ سببا ریلگاڑی نہ شتگ و سواریں مسافر مجبور بیتگ اَنت کہ سر سر جنانا دیم پہ وتی منزلاں راھی بہ بی اَنت۔ حالا دیمترا داتگ کہ جیکب آباد اسٹیشنا ھم دو ریلگاڑی ڈیزل نہ رسگءِ سببا مھتل بیتگ اَنت۔ البت آوانی بھتا کار کتگ و بامگاھا اودا دیزل رسینگ بیتگ، و ریلگاڑی رھیج گپتگ اَنت۔
هیچ نظری موجود نیست:
ارسال یک نظر
وتی کلوا چێرا نبیس إت