امریکاءِ دیما اوشتگءِ دعواداریں ایران وتی نادراھاں دوادرمان کت نہ کنت: بلوچی حال

زی ماں چاھبھار شاگردانی یک منندجاھے بن گپت۔ منند جاھا وپتگیں دو بلوچ ورنا ستک و بیران بوت اَنت۔ دگہ سئے سک ٹپی بوت اَنت۔ سئیں ٹپّیانی دوا درمان کنگا چاھبھارءِ جندا کوّاسیں داکٹر نہ بیتگ۔ پمیشا ایشاں زاھدانءَ دیم دیگءِ ارادہ اش کتگ۔ ایرانی حالجاھاں وزارت تعلیمءِ جھانشاھیءِ بٹاکے شنگ کتگ ات کہ ٹپی بالیگرابےءَ دیم پہ زاھدان راہ دیگ بیتگ اَنت۔ البت، شنگ بیتگیں راستیانی وانگا رند مردم سک افسوزیگ بیت۔

راستی چؤش اَنت کہ آ صحبا پیلوشتگیں ٹپّی تانکہ بیگاھا بے دوا درمان چاھبھارءَ کپتہ بیتگ اَنت۔ آوانی سیاداں سرجمیں در ٹُکِتگ اَنت۔ بلہ پہ آوانی برگا نہ ھلی کاپٹرے آتکگ، نہ کہ بالیگرابے بیتگ کہ دیم دیگ بہ بی اَنت۔ دوا درمانءِ وداریگیں ورنایانی سیاد پہ 100 میلیون تمن دیگا ساڑی بیتگ اَنت کہ پہ آواں بالگرد یا گرابے راہ دیگ بہ بیت، بلہ ایرانءِ وتی زرّاں ھم کار نہ کتگ۔ شہ سرجمیں دراں بے امید بیگا رند، ٹپّی کلنڈیں امبولنسانی سرا پہ 800 کیلومیٹر سفرءِ برّگا رھیج گپتگ اَنت۔

ٹپی قدرتءِ امانا بات اَنت۔