بلوچستانءِ امریکائی دوست ھواربندءِ سروک و امریکاءَ جاھمنندیں نامداریں بلوچ حالکار احمر مستی خانءَ بلوچستانءِ سیاسی جھدکارانی باروا وتی کتگیں خبرانی سرا پشومانی درشان کتگ و شہ پھکاں پھلی ئی لوٹتگ۔
”من شہ آ مردماں پھلی لوٹاں کہ منی سیاھگ و درشانیں خبرانی سببا دلرنج بیتگ اَنت۔ نیں من سرپد بیتگاں کہ شہ کٹری سیاستءِ راھا روگا ھیراناں شودگ و نگناں لیٹینگ شرتر اِنت۔ پرچاکہ کٹری راھا روگءِ معنا مخالفاں لپاشگ اِنت کہ (قوما) تاوانبار کنت“ بلوچی نیوزءَ رستگیں کاگدےءَ احمر مستی خان نبیستگ۔
آئیا دیمترا نبیستگ ”اے خبر شہ باورا در اِنت کہ آئی اس آئیءِ سرجمیں چاریگ ایوکا مکرانءَ اَنت۔ شری سرا سھرا اِنت کہ اجرتی قاتل و لاتیں تفنگیانی دستا سیاسی مخالف کوشارینگ بیگا اَنت۔ ایش وت شر، وت قاضی و وت جلاّد اَنت۔
”نوکیں راھے کہ من گپتگ پھکانی سیتا اِنت۔ اے شہ اوپارا در اِنت کہ انسانانی زندگیاں حسابا نہ آروکیں مردمانی دستا چاریگ بیگءِ بے بنیں عذراں مردم کوشارینگ بہ بی اَنت۔ پاکستانی فوجءِ انسانکشی کار وا شہ کسا چیر نہ اَنت، بلہ یک سرمچارےءِ دستا بے سلاحیں مردمے، استادے، حجامے، گد دوچے و وت براتیں سیاسی جھدکارےءَ کشگءِ کار شہ اوپارا ڈن اِنت۔“
احمر مستی خانءَ دیمترا سرکچ داتگ: ماں مغربی ملکاں نندگ و زنڈیں بٹاک جنگا شہ گیشتر امید مارا شہ وتی راھشواں ھست۔ حالتاکاں شنگ بیتگیں لیڈرانی بے گرَزیں بیان پہ قوما نقصان اَنت۔ خاص ھنچیں وھدےءَ کہ ھچ میانملکی زنڈیں واک گوں سِتْکیں دلےءَ بلوچاں کمک نہ کنگا اِنت۔
ترانگ بہ کپ ات کہ احمر مستی خانءَ بلوچستانءِ مردمانی حقانی پادمالیءِ خلافا ماں امریکا و یورپ بازیں میانملکی دیوانا گشتانک داتگ۔ آئیءِ جوڑ کتگیں بلوچستانءِ امریکائی دوست نامیں ھواربندا ھم بلوچستانءِ آزادیءِ پلانگریا مان امریکا مراگش برجم داشتگ اَنت و وھد وھد سرا ظاھری داتگ۔
البت مکران دمگا لھتے لاتیں تفنگیانی دستا سیاسی جھدکارانی کشگ بیگءِ کارکردا بازیں دگہ سار سریں مردمانی کشا احمر مستی خان ھم وتی نظرءِ دوارچاریا مجبور کت۔ آئیا وتی نوکتریں سیاھگاں نام نھادیں سرمچار سک ڈوبارتگ اَنت۔ و دستبندی کتگ کہ وتی راھا تچک بہ کن اَنت۔
هیچ نظری موجود نیست:
ارسال یک نظر
وتی کلوا چێرا نبیس إت