آسکانی برادراں باھینت، لیاری برادراں لیب برت

قدرتءِ داتگین صلاحیتانی نیاما یکے فٹبالءِ لئیب اِنت کہ بلوچانی میراث جوڑ بوتگ

آل سندھ بلوچستان اَدا شیر محمد فٹبال ٹورنامنٹءِ درگتا مروچی تھارو لین گارڈن پاک بلوچ گراؤنڈءَ لیاری برادرز ءُ آسکانی برادرزءِ نیاما فائنل میچ بوتگ۔ فائنل میچ لیاری برادرزءَ چہ یک گولےءَ برت۔ فائنل میچ ءَ دویں گوازی کنوکیں ٹیماں باز وش گوازی کتگ ءُ چاروک سک باز وش بوتگ انت۔ چاروکانی مزنیں حسابے گراؤنڈءَ آتکگ ءُ گوازی کنوک اش سک باز دلبڈی داتگ اَنت۔

فائنل میچ ءِ ھاسیں مھمان ایم پی اے سندھ اسمبلی نجمہ سعید چاولہ بوتگ۔ نجمہ سعید چاؤلہءَ گوں میڈیاءَ تران کناں گشتگ کہ مارا ھمنچوں فنڈ رسیت ما کوشست کنیں کہ جوانیں جاھاں آ فنڈ خرچ کنگ بہ بی اَنت ءُ تھارو لائنءِ گراؤنڈ ءِ دیمرویءَ کار کنگءِ مقصدا ما پیسرا ھم گام چست کتگ ءُ دیمترا ھم کنیں۔ آئیا گشتگ کہ اے وڑیں یونٹ جوڑ کنگ باز جوانیں کار اَنت ءُ ادا مردمانی کار ستا کرز انت۔

ٹورنامنٹءِ سروک مولابخش بلوچءَ گشتگ کہ ما ھر سال اے ٹورنامنٹءَ چلائینیں، تانکہ ورنا شریں معاشرہءِ نیمگا بہ روانت۔ آئیا گشتگ کہ چہ اے دمگاں باز مزنیں مزنیں گوازی کنوک پیدا بوتگ انت کہ آھاں پاکستانءِ ٹیما گوازی کتگ۔

لیاری برادرزءِ کپتانءَ گشتگ ”چہ باز وھدا مئے کوشش بوتگ کہ مئے ٹیم فائنلءَ برسیت ءُ مروچی منی واھگ پیلو بوتگ۔ پہ ایشی ما باز وشیں۔ دیمترا ھم ما جوانیں گوازیں کنیں۔ ٹورنامنٹ نواز لاسی، منصور بلوچ، شکور بلوچ، شکیل بلوچ، ایاز، نوید بلوچ ءُ دگراں آرگنائز کتہ بیتگ۔ وش نیوز