پاکستانءِ جوڑ بیگا 62 سالانی پرگوَزگا رند انگت ملکءِ تھا جمھوری راھبندءِ رواج دیگا ملکءِ سیاستکار سوبین نہ بیتگ اَنت۔ شہ سال 2002ءَ دیم پہ انگو فوج و سیاستکارانی ھواردستیءِ برکتا انگت اعلانیہ فوجی رواج پاکستانءَ لاگو نہ بیتگ۔ ملکءِ سیاستکارانی کاری راھبند ھم سر ظاھرا بدل بیتگ۔ نوکیں راھبندءِ ھمردیا پھکیں سیاسی گل جھدا اَنت کہ گوں یکادگرا انچو گِر چیل مہ بی اَنت کہ فوجی رواج لاگو کنگءِ نیمونے فوجا بہ رسیت۔
پاکستانءَ بران برانا لاگو بیتگیں فوجی رواجءِ سببا سرجمیں سیاستکار تاوانبار بیتگ اَنت۔ فوجی رواجءِ اولی شکار مدام ھما سیاستکار بیتگ اَنت کہ سرکار اش دستا بیتگ۔ گوں سرکارءِ واھندیں سیاستکارانی شکار بیگا مخالفاں گل کتہ بیتگ۔ البت، وھدے ھمے مخالفاں رندترا واکداری کہ دست گپتگ، ھما فوجی رواجءِ شکار بیتگ اَنت۔
گندگا گوّستگیں 10 سالانی نیاما پھکیں سیاستکاراں مارتگ کہ باریگ پہ باریگ فوجءِ شکار بیگا شہ شرتر اِنت کہ باریگ پہ باریگ سرکارءِ واھند بہ بی اَنت و پہ فوجءِ دلگوش کنگا آئیا چوش کہ کچکےءَ ھڈ دیما بہ دی اَنت۔ توریں بلّی ھڈ گرانبھائیں بہ بی اَنت۔ پدا ھم آوانی خیالا شہ فوجی رواجءِ لاگو بیگا شر تر اِنت۔ ھمے ردا سیاست کاراں وتی گوشاں کرپاس مان کتگ، تانکہ بنی آدمانی دروشما فوجءِ دیما داتگیں ھڈانی دوستواھانی گوانک و چیھال گوشاں مہ کپ اَنت۔
پاکستانءِ تاریخی پشتدرا گندگا رند میانملکی واک ھم پاکستانی سیاستکارانی نوکیں پندلا ھوار بیگا شرتر زانگا اَنت۔ پرچاکہ فوجی رواجءِ دھاں سالانی برورد دنیاءِ دیما میانملکی ٹرورزمءِ دروشما ظاھر اَنت۔ شہ ھمیشی بیزاریا رند درملکی واک پاکستانی سیاستکارانی پندلءِ بھرے مارگ بیگا اَنت۔ انچو سالانی پرگوَزگا رند انگت جوانیں بروردے دیما نہ آتکگ، بلہ دنیاءِ خیالا پاکستانءِ ڈولیں اٹمی واکےءِ دیما پاکستانی سیاستکارانی جند شرتر داشت کنت۔
فوجا دگہ نیمگاں دلگوش کنگءِ پندلا دراجکشیں ثمرے بیت یا نہ، کس زانت نہ کنت۔ البت، بزگیں استمان روچ در روچ فوجءِ جنترا دروشگ بیگا اِنت۔ شہ بلوچستانءَ بہ گر تانکہ خیبر پھتونخوا و کراچیءَ ھنچائیں مردم وتی زندگی تھا قیامتءِ بدیں جاوراں گندگا اَنت۔ ھمے گپاں پاکستانی سیاستکار وت ھم پہ نادلکشّی منّگا اَنت۔ آوانی ردا گوستگیں 10 سالاں 35 ھزار مردم ٹرورسٹاں کشتگ اَنت۔ اے ھما ٹرورسٹ اَنت کہ 1979ءَ دیم پہ انگو پاکستانی فوجا جوڑ کتہ بیتگ اَنت۔ نیں ھمے فوج پرمایگ بیتگ کہ بہ کشیت اش۔ قول یک طالبان کماندارےءَ کہ گوستگیں سئے شنبہءَ بی بی سیءِ مراگشےءَ آتکگ ات، ھر کس وتی کِشتگیں نھالا گوَج کِش و آپ خاک کنت۔ فوج وتی رودینتگیں نھالاں نہ کوشیت۔ ھمیشانی ناما ھنچونائیں مردمانی ڈلگ و ریچگا چک پد نہ بیگا اِنت۔
پہ فوجءِ دلگوش کنگا مرچی افغانستان و بلوچستانءِ جیڑہ مزنیں عذر اَنت۔ افغانستانءَ امریکاءِ ترس و ڈوبارگانی سببا فوج فاٹا و دگہ دمگانی پٹانانی قتل عامءَ دِرِکّیت۔ آ دگہ دیما بلوچانی وتواکیءِ جھدا مارگ و بلوچانی مارشتانی قدرا کنگءِ بدلا نایاپتیں جواناں گچین کنگ و برگا اِنت۔ دستگیریں بلوچ ورنا بکشوشگانی ڈولا دِر دِر کنگا رند تیر جنگ، کشگ بیگا اَنت۔ کشگ بیتگیں بلوچ ورنایانی جسد شہ دگانی کرّا و تلپیں پڑاں یکّوئی چست کنگ بیگا اَنت۔ بنی آدمانی کشگ و دور دیگءِ باروا میانملکی واک ھمے امیدا بے توار اِنت کہ باندات پاکستانءَ جمھوری رواج ریشگ جنت و شہ آئیا پد کسےءِ انسانی حق پادمال نہ بی اَنت۔ ھمے بانداتءِ ودارا کس نہ زانت چنچو بے میارانی خون ھوشام بیت۔
هیچ نظری موجود نیست:
ارسال یک نظر
وتی کلوا چێرا نبیس إت