ھنچوش کہ ماھلہ تر حال آتکگ ات کہ بلوچ حالکار جاوید نصیر رندءِ ٹپ ٹؤر و تیر آماچیں جسد شہ خضدارءَ دستا کپتگ، اے حال بازیں جاگھاں الّم کنگا رند، راستے منّگ بیگا اِنت۔ جاوید رند اِمبری 10 ستمبرءَ ماں حب شپءِ کلاک 9ءَ شہ وتی انٹرنٹءِ دکانا دستگیر کنگ بیتگ اَنت۔ ھما روچا، 6 کلاک ساریا، عبدالصمد تگرانی شہ زاھد میڈیکل سنٹرءِ دیما چاریگاں گپتگ ات۔ عبدالصمد تگرانیءِ ٹپ ٹوریں جسد پرندوشی مردمانی دستا کپتگ ات۔جاوید نصیر رند پاکستانی چاریگانی غیر انسانی کار کرد و بلوچ سیاستءِ ردیں راھبندءِ آماچ بوت۔ آئیا یک دراجیں وھدےءَ گوں روچتاک توار کار کتہ بیتگ۔ روچتاک توار کٹریں قومپرستی سیاستءِ پلانگری زیروکیں حالتاکے اِنت۔ توارءِ کشکا داراں، جاوید نصیر ھم ھمائیءِ جزباتی سیاستءِ آماچ بوت۔ آ یک وانندویں ورنایے ات۔ آئیءِ جانسلامتی پہ بلوچ قوما ضروری ات۔ ھمے قومی ضرورت دشمناں ھم مار ات۔ پمیشا آئیا کشت اش تانکہ بلوچ شہ آئیءِ ندکاری جھدا زبھر بہ بیت۔
من گوں جاوید رندءَ دو رندا ڈیک وارتگ ات۔ ھر دویں رنداں من گوں صبا دشتیاریءَ توارءِ کارگسا شتگ اتاں۔ اودا گوں آئیا ڈیک ورگا رند دلءِ تھا پہ آئیا یک جاھے جوڑ بوت۔ ھما وھدی من مار ات کہ آئیءِ ڈولیں ورنا ماں زوراکیں چاگردےءَ جان آرت نہ کن اَنت۔
بلی توریں جاوید وت شہ علم و قومی مارشتا سراگاہ اَت، وتی نیک و بدءِ واھند وت ات، بلہ آئیا و آئیءِ ڈولیں دگہ صداں نوجواناں کہ زوال کنگ بیتگ اَنت، شہ اشتاپی سیاستا در کنگ و تچکتریں راھےءَ پرّینگ تجربہ کاریں سیاستکارانی ذمواری ات۔ افسوز کہ بلوچستانءِ سیاستکار گون نندگ و سیل چارگا گچینی بلوچ سراں باھینگا اَنت۔
اگر اے سیاستءِ رندگیری برجاہ پشت کپت، گڈا آیوکیں نسلءِ مھار ناتجربہ کاریں سیاستکارانی دستا رئوت کہ قومی پجار وتی جاگھا، بلکیں وتی بنی حقانی پچگرگا چوش کہ کراچیءِ بلوچان بے واک بی اَنت۔
جاوید نصیر رند و دگہ صداں کشگ و دور دیگ بیتگیں ورنایانی بیرانی باید پہ پشت کپتگیں سیاستکاراں درسے بہ بیت و کشکے در بہ گیج اَنت۔ تانکہ نوجواناں پہ بلوچستانءِ آجوئیءِ جھدا لایقیں سیاسی کواس جوڑ بہ بی انت۔ اگر بلوچستان آزاد کنگی اِنت، گڈا شھزانتانی سالاں سالءِ پولکاریانی برورداں رستگیں راھشونیانی ھمردیا آزاد بیت کنت۔ ایشاں ابید آدگہ سرجمیں راہ قوما دیم پہ تباھیا برگءِ راہ اَنت۔
هیچ نظری موجود نیست:
ارسال یک نظر
وتی کلوا چێرا نبیس إت