شھید جاوید نصیر رند؛ تو ھم چَہ ما گوں وشیں دلےءَ نہ سست ئے

دلگوش: داتگیں سیاھگ ‘بام ھال‘ءَ شنگ کتگ، بلہ ندکارءِ نام نہ داتگ۔ اے سیاھگ شھید جاوید رندءِ باروا باز سرپدی دات اِنت، پمیشا راھبندءِ ھمدپ دیگا پد سیاھگا ادا شنگ کنگائیں۔ ما جھد کتگ کہ سیاھگءِ بزانت ھچ مہ ٹگلیت۔ پدا ھم اگر جاھے پہ نہ زانتی چوش بیتگ، ما شہ ایشیءِ نبیسوک و ‘بام ھال‘ءَ پھلّی لوٹیں۔

جاوید نصیر رند ۔فوٹو آرٹ: قاضی ریھان

”راج پھاز ءُ راستگوشیں حالکار جاوید نصیر رند ھم پہ وتی ڈیھءَ شھید بوت۔ شھید جاوید نصیر درکسانیءَ گوں بلوچ راجدوستیں گلاں نزیک و ھمگرنچ بیتگ۔ چہ بی این ایمءِ ھما بنکی باسکاں یکے اَت کہ شھید واجہ غلام محمدءِ توارا گوں توار اش یک کرتگ ءُ ماں سیاسی پڑا بلوچ آجوئیءِ جھدءِ دیما برگا کوپگ اش چیر داتگ۔

شھید جاوید نصیر بلوچ نیشنل موومنٹ ۔حبءِ اولی چارگزار اَت ۔آ یک نیزگاریں کھولےءِ تنگدستیں مردمے اَت۔ پمیشکا زندءِ بازیں جنجال پہ آئیا چوکہ کوھےءَ مِھلانک اِتنت۔ ھما نوبتا کہ ورنا پہ وتی وشیں بانداتءَ کار ءُ روزگار شوھاز کن اَنت، آئیا دیم پہ راجکاریءَ دات۔

پہ جاویدءَ آسراتی ھست اَت، آ ھم بنداتا چوش دگراں پہ لاپءِ کشگا گوں این جی اوزاں ھمگرنچ بوت، بلہ وھدے روتاک توارءَ شنگ کنگءِ چنلانچ بوت اَنت ءُ پہ اے کارانی دیما برگا جاوید نصیر گچین کنگ ءُ ذموار کنگ بوت۔ آئیا یک کسانیں دزمزےءِ سرا وتی روژنائیں باندات گوں راج پھازیں ھالکاریءَ ھمگرنچ کرت۔

شھید جاوید نصیر بلوچانی ھالاں شنگ کنوکیں اولی ءُ ایوکیں تاک روتاک توارءِ نیوز ایڈیٹر ٹھینگ بوت۔ شھیدءَ وتی اے ڈبو ایوکا یک انچائیں کارےءِ رنگا نہ کرت بلکیں آئیا ایشی یک راجی ذمواریے زانت۔

بنداتا پہ توارءَ نوشتہ کار ءُ وانوک نیست اَت۔ شھیدءَ اے تَکا تکانسری کش اِت۔ چَہ بلوچستانءِ کنڈ کنڈا پہ توارءَ جھگیر اَڈ کرت ءُ گوں آواں سکیں نزیکی کرت۔ چَہ اے نزیکی ءُ ھمکاریءَ چَہ آھاں انچیں کار گیپتگ کہ توارءَ یلہ دیگا پد آ کنڈ ھورک ءُ ابیتک پشت کپت اَنت۔

شھیدءَ زانتگ کہ توارءَ بندوکیں توامیں جھگیر ءُ حالکار گوں یک باوست ءُ جھدےءَ بندوک اَنت۔ آ چَہ کارا بِھ بیزار نہ اَت۔ آ توارءِ نامدار تریں نیوز ایڈیٹر پمیشا نہ اَت کہ بازیں ڈبہ ئی گون اَت، بلکیں چَہ ایشیا ابید آ یک مِھروان ءُ گوں بلوچی دود ءَ بستگیں مردمے اَت۔ آئیءِ نیوزایڈیٹری نوبتا چَہ بلوچستانءَ بازیں نامییں ھالکار گوں توارءَ ھمگرنچ بوت اَنت۔ چَہ آھاں اسماعیل بلوچ ، غوث بھار، صورت خان مری، شھید لالہ حمید ءُ قاضی داد محمد ریحان ھوار اِتنت۔

آئیا ند کار مدام سکین دات اَنت ءُ پہ نبیسگا کڈن کرت اَنت۔ سیاھگانی چاپ بیگا پد دلبڈی ءُ سکین دیگا ھم شموشکار نہ بوت۔ آئیا زباد سنگر اُورماڑہ نیول بیسءُ اُورماڑہءِ سرا پاکستانی قبضہ گیری پندلانی پدر کنگا بازیں سیاھگ نبیسائینت اَنت۔ ھمے پیما چَہ مھراللہ مھرءَ ھپتگی ڈائری ' احوال بولان 'ءِ ناما نبیسائینت کہ توارءِ وانوکاں سک باز پسند بیتگ اَت۔ اے سیاھگءِ لیکہ ءُ سِکینکار شھید جاوید نصیر اَت۔

چَہ سکینکاری ءُ شونکاریءَ ابید شھیدءَ بلوچستانءِ جاروانی سرا وت ھم جوانیں سیاھگ نبیستگ۔ وتی جندءِ نامءَ ابید آئیا یک کسانیں مدتےءَ '' مھلب ''ءِ ندنامءَ ھم نبیستگ داں بلوچ جنین آدماں ھم سکین بہ رسیت۔ مھلبءِ ناما نبیستگیں آئیءِ سیاھگ ھم وانوکاں باز دوست بوتگ اَنت۔

شھید جاویدءَ راجءِ تھا ٹکانی کسان مزن کنگءِ سرا سک باز ایراد گِپتگ۔ آئیا مدام وتا لاسی گشت۔ پرچا کہ آ لسبیلہءِ جاہ مند اَت ءُ ھمے پنامءَ ھم آئیا بازیں سیاھگ نبیستگ اَنت۔ پرے واھگا کہ بلوچستانءِ اے ٹِک ھم بلوچ راجی جھد ءُ جوزگا بندوک بہ بیت۔

شھید جاوید نصیر بلوچ نیشنل موومنٹءِ دلستکیں باسکاں یکے اَت، بلہ وھدے کہ گوں توارءَ ھمگرنچ بوت سیاسی چست ایرانی تھا بِھ بھر ئی زرت نہ کرت۔ ھمے پیما 2008ءِ بی این ایمءِ سیشنءَ ھم شھیدءَ بھر نہ زرت داں آئیءِ سرا کس اے بھتام جت مہ کنت کہ آ گوں یک گلےءَ بستگ۔

شھید جاوید جانءِ زندمانی یک دلستْک ءُ دلپاکیں مردمےءِ زندمان اَت۔ یک ھنچیں مردمےءِ کہ آئیءِ سنگت ءُ ھمکاراں آئی زندا آئیءِ شریاں اَرزش دیگا بے سوب بوت اَنت۔ شھید جاوید نصیر جان گوں توارءَ وشیں دلے نہ سست۔ (کواسیں مردم) باز برا پہ ادارھانی پھریزگا وتی جھد ءُ واھگاں ھم گٹگیر کن اَنت۔ شھیدءَ ھم انچوش کرت۔ پاکستان یک ھونواریں رسترے جوڑ بوتگ یا کہ آ نوں شر سرپد اِنت بلوچءِ اَجگیں کشار ھم پہ آئیءَ زھراپیں کنٹگ جوڑ بوتگ اَنت۔

پمیشا جاوید نصیر رند 10 ستمبر 2011 ءَ چَہ حبءَ پاکستانی ایجنسیانی کارندواں آوار جت ءُ پُریں پنجاہ ءُ شش روچاں وتی شکنجہ جاھاں دارگا پد 5 نومبر 2011ءَ کشتءُ آئی ءِ پاکیں میت خضدار ءَ چگل دات۔ شھید جاوید نصیر رند وتی ماتیں ڈیھءِ خاکانی میار کنگ بوت، بلہ آئیءِ لیکوءُ زندمان پہ آیوکیں پدریچ ءُ آئیءِ سنگتاں راھشون اَنت۔“