دزگھار چاگردی دیمروی دیوان کیچءَ کار کنگ بنا کت

دزگھار چاگردی دیمروی دیوان کیچءَ مرچی گورنمنٹ گرلز ماڈل اسکول تربتءِ ھالا چیرپرسن شاھینہ بلوچءِ سرکشّیا مراگشے برجم داشت۔ مراگشءِ بنداتا قرآن پاکءِ آیتے وانگ بوت۔ پدا نعتے و راجی سوت وانگ بوت۔ مراگشءِ خاصیں مھمان ڈسٹرکٹ ایجوکیشن آفسر منیر کریم نودزی ات و دگہ مھمان گرلز ماڈل ھائی اسکول تربتءِ پرنسپل شبیرہ بلوچ ات۔

گوں دیوانا بی این پی مینگلءِ راھشون و ادیب یوسف عزیز گچکی، ڈیلٹا وانگجاہءِ سروک و ڈگری کالج تربتءِ پروفیسر برکت اسماعیل و سید ھاشمی اسکولءِ ڈاریکٹر زاھد حسینءَ تران کناں گشت کہ کیچ ءِ تھا دزگھار چاگردی دیمروی دیوانءِ جوڑ کنگ بیتگ۔ اے گل وتی مٹ وت انت۔ پرچاکہ 21 می کرنءَ بلوچ جنینانی کرد و صلاحیتاں دیما آرگ المی اَنت۔ دنیاءِ تھا بلوچءِ دود ربیدگ ردیں وڑےءَ پیش کنگ بیگا انت۔

تران کنوکاں دیمترا گشت کہ پہ بلوچ راجءِ دیمرویءَ راجءِ نیم آبادی بزاں جنینانی وانندہ بیگ المی انت۔ وانگ و زانگءِ پڑا پت مات وتی جنکیں چکانی سرا بیسہ بہ کن انت۔ آواں کالج و یونیورسٹیءِ کچّا وانگءِ و رندا روزگارءِ اجازت بہ دی اَنت۔

دیمترا گشگ بوت کہ مرچی اسکولءِ جنکیں نودربراں یک گلے جوڑ کتگ، مرچی زالبولانی کرد و حقءِ سرا سیمینار برجم داشتگ؛ اے کار سرکاری ادارہ و سیاسی گلاں بہ کتین اَنت، بلہ آ چہ وتی ذمواریاں شموشکار بیتگ اَنت۔

دزگھار چاگردی دیمروئی دیوانءِ راھشون شمائلہ بلوچ، امیرہ بلوچ، کیگد بلوچ، سید ھاشمی وانگجاہءِ مکتبی عائشہ بلوچ، گرلز ڈگری کالج تربتءِ مکتبی سلطانہ بلوچ، ڈیلٹا وانگجاہءِ مکتبی حفیظہ بلوچ و دگہ جنکیں نودربراں مراگشءِ بنگپا وتی خیال و لیکہ درشان کتگ انت۔

گڈ سرا دزگھار چاگردی دیمروی دیوانءِ باسکاں وانگ و زانگءِ ارزشءِ سرا کسمانکے پیش داشت۔ وش نیوز