کراچیءَ جاھمنندیں بلوچانی نیاما لھتے شہ بلوچستانءِ دیریں ھنداں آتکگ اَنت۔ شہ دیریں ھنداں آتکگیں بلوچ کٹمانی نیاما یکے میر سید محمد سربازیءِ کٹم ات کہ شہ بلوچستانءِ سرباز دمگا پہ کاربارءَ کراچیءَ جاھمنند بیتگ اتنت۔ 1909ءَ سید محمدءِ لوگا چکّے ودی بوت و آئیءِ نام اش خیر محمد کت۔
خیر محمد کہ ڈلگ بوت، گڈا آئی اش مولوی محمد عثمان بلوچءِ گورا پہ وانگا راہ دات۔ شہ اودا بنداتی وانگ دربرگا رند خیر محمد ماں احرار الاسلام پرائمری اسکولا وانگا شت۔ پدا لیاریءِ مدرسہ مظھر الاسلامءَ عربی و دینی درس ئی وانت۔ شہ ادا پد خیرمحمد ھندوستانءِ شھر لکنئوءَ شت و ھمودا ندوت العلما مدرسوا وتی دینی وانگ ئی سرجم کت و مولوی خیرمحمد ندوی جوڑ بوت۔ 1933ءَ آئیا کراچیءَ چھر کت۔ رندترا آئیا دنیایی درس وانگ ضروری لیک ات۔ ھمے واھگءِ پیلو کنگا آئیا شہ ممبئیءَ میٹرک گپت و پدا وانینگءِ کار ئی گپت۔ دانکہ 17 سال آئیا کراچیءِ اواریں مدرسوان زھگ وانینت اَنت۔
کراچیءَ آباد بیگا رند ھندوستانءِ دیش دروھیاں ھر جاگہ پہ وتی زھگاں اسکول و مدرسہ جوڑ کت اَنت و وتی زھگ اش وانیت اَنت۔ اے راھا بلوچ زھگانی ڈالچار کنگءِ کار اش بنا کت۔ مولوی خیرمحمدءَ بلوچ زھگانی زبھری دیست اَنت و آواں شہ اے پدمنتگیا در کنگءِ واھگا گوں وتی کٹمءِ مردماں ماں کراچیءِ دھوبی گاٹ ھندا 1950ءَ مدرسوے پاچ ئی کت۔ اے مدرسہءِ نام بلوچ پرائمری و سیکنڈری اسکول ایر کنگ بوت۔
ھمے درگتا کراچی راڈیوءَ بلوچی مراگش بندات کنائینگا سوبین بوت و وت مراگشانی پروڈیوسر جوڑ بوت۔ پدا سید ظھورشاہ ھاشمی ئی پہ مراگشانی دیما برگا کارا داشت۔ وھدے کہ آئیا پہ پروگرامانی دیما برگا ھچ نبستگیں بلوچی سیاھگ نہ دیست، گڈا فیصلہ ئی کت اومانءِ ناما تاکبندے شنگ بہ کنت۔ 1951ءَ بندات بیتگیں اومانءِ راھا مولوی خیرمحمد ندویءَ تانکہ 10 سالاں بلوچی زبانءِ ردوم دیگا کار کت۔ اے نیاما بلوچی قایدہ، کچکول، اخلاقءِ گلدان و قاضی عبدالصمد سربازیءِ رجانک کتگیں قران شریفءِ پشت کپتگیں سورت ئی رجانک و شنگ کت اَنت۔ ایشاں پد ماھتاک سوغاتءِ شنگ کنگ مولویءَ بندات کت و تانکہ وتی گڈی نفسءَ ھمے ماھتاکءِ راھا بلوچی زبانءِ ردوم دیگا کار ئی کت۔ 26 نومبر 2000ءَ مولوی خیرمحمد بیران بوت و بلوچی زبانءِ پڑا وتی نام ئی نمیران کت۔
هیچ نظری موجود نیست:
ارسال یک نظر
وتی کلوا چێرا نبیس إت