بنگلادیشءِ آزادیءِ جنگا پاکستانءِ ھوار کار بیوکیں جماعت اسلامیءِ چیردستیں امیرءِ دادگاھی بنا بیتگ۔ بنداتی بیانا سرکاری وکیلا جنگی مجرمانی دادگاہءِ دیما گشت کہ (جماعت اسلامیءِ) دلاور حسین سیدیءَ وتی فتواءِ تھا بنگلادیشی مردماں کشگ ثواب درشان کتگ۔
”فتواءَ رند مردمانی مال، دلوت و جنین آدم مالءِ غنیمتءِ حسابا پچگرگ بیتگ اَنت۔ دلاور حسین سیدی (پاکستانءِ) رضاکار کمانڈرے بیتگ۔ مردماں سیدی ماں پنجابی چرّکا دیستگ کہ آئیا مالءِ غنیمت آرتگ و وتی وسرکءِ لوگا رسینتگ اَنت“ وکیلا دیمترا گشت۔
سرکاری وکیلا گیش کت کہ آوار جتگیں جنیں آدم کہ گیشتر ھندو مذھب بیتگ اَنت، ماں پیروج پور کمپا پہ پاکستانی فوجیانی حوسءِ سارت کنگا دارگ بیتگ اَنت۔ جماعت اسلامیءِ دلاور حسین سیدیءَ پہ وتا ‘بانو ساھا‘ چکءِ بیپود ساھا داشتہ بیتگ و براں برانا آئیءِ لوگا شتگ و گوں جنکا زوراکی ئی کتگ۔
”بنگلادیشءِ آزاد بیگا رند دلاور سیدیءَ دانکہ زنڈیں وھدےءَ وتا چیر داتگ و پدا 1986 سر ئی کشتگ۔ رندترا نقلی ملایے جوڑ بیتگ و مردماں دینی درس ئی داتگ۔ البت، جنگءِ درگتا ھمے سیدیءَ رضاکار درگپتگ و زورگریں پاکستانی فوج ئی پرمایتگ کہ ماں پیروجپورءَ پہ آواں کمپے جوڑ بہ کنت“ سرکاری وکیلا جنگی مجرمانی دادگاھا سرپدی دات۔
جماعت اسلامیءِ چیردستیں امیر دلاور حسین سیدیءِ سرا میار لڈگ بیتگ کہ بنگلادیشءِ آزادیءِ جنگا آئیا جنگی جرم کتگ اَنت۔ اے جرمانی تھا نسل کُشی، گوں جنیناں ناروائی، آس ماندارگ، پل پانچ کنگ و ھندواں پہ زور مسلمان کنگءِ جرم ھوار اَنت۔ اے سرجمیں کارکرد انسانی حقانی میانملکی قانونءِ ردا ناروا اَنت۔
دادگاھیا 7 دسمبرءَ شاھدانی بیاناں گوشدارگءِ کار بنا بیگی اِنت۔ فنانشل ایکپریس ۔بنگلادیش
هیچ نظری موجود نیست:
ارسال یک نظر
وتی کلوا چێرا نبیس إت