لھتے امریکایی لیڈر زر دیگ بیتگ اَنت کہ وتی گشتانکانی راھا امریکاءِ سرکارا پہ ایرانءِ مجاھدین خلق گلءِ کمکا ساڑی بہ کن اَنت۔ مجاھدیں خلق امریکاءِ جوڑ کتگیں ٹرورسٹ گلانی لڑا ھوار اِنت۔
ھمے زر خریدیں لیڈر جھدا اَنت کہ مجاھدین خلق شہ ٹرورسٹ گلانی لڑا در کنگ بہ بیت۔ آوانی گشگ اِنت کہ اے گلا سلاحبندیں جنگءِ بدلا نیں جھموری راھبندےءَ جھد کنگءِ راہ گچین کتگ۔
البت، نشنل ایرانین امریکن کونسلءِ سروک تریتا پارسیءَ مجاھدین خلق یک کٹریں ٹولیے نامینت و گشت کہ ایشی یک ھنچوشیں ٹرورسٹ گلے اِنت کہ ایرانی مردم ئی پلانگریا نہ زیر اَنت۔
واجہ پارسیءَ پہ وتی گپءِ منّینگا مجاھدین خلقءِ خلافا یک ویڈوے جوڑ کتگ کہ ایشیءِ تھا پیسری گورنر ھاورڈ دین، نیویارکءِ پیسری شھردار رودولف گلیانی، پیسری صدر جورج بوش، ٹوم ریج و پٹرک ج۔ کنیڈیءِ گشتانکانی ٹکر ھوار کنگ بیتگ اَنت۔ ایشاں وتی گشتانکانی تھا مجاھدین خلق ساڑایتگ۔
اے ویڈیو گوں یک سرپدیےءَ آسر کنگ بیتگ کہ گشیت مجاھدین خلق چوش کہ درنڈیھیں پیسری عراقی لیڈر احمد جلابیءَ اِنت کہ آئیا صدام حسینءِ خلافا ھمے وڑیں تک تاچانی کمکا امریکا پہ عراقءِ گرگا ساڑی کتگ ات۔
زر خریدیں لیڈران اے گپ منّتگ کہ آواں پہ گشتانک دیگا زر زرتگ۔ ایشانی نیاما واجہ دینءَ ایرانیانی یک مچّیےءِ دیما تران کناں لوٹ کتگ ات کہ مجاھدین خلق شہ ٹرورسٹ گلانی لڑا در کنگ بہ بیت۔ آئیا وتی گشتانکا مجاھدین خلقءِ سروک مریم رجویءَ ساڑایاں گشتگ ات ” بانک رجویءِ گپ منی دیما ٹرورسٹی گپ نہ اَنت، آئی یک صدرےءِ ڈولا گپ کنت۔ ما آئیا ایرانءِ صدرءِ حسابا منّوگر بییں۔“
واشنگٹون پوسٹءِ رپورٹےءِ ردا اپریل ماھا واجہ دینءَ گشتہ بیتگ کہ آئی مجاھدین خلقءِ باروا ھچ نہ زانتگ۔ قول آئیا ”منا گشتگ اش کہ پیرسءَ بہ رواں و گوں یک ٹولیےءَ گپ بہ کناں کہ آئیءِ باروا منا ھچ سرپدی نہ بیتگ۔ من انٹرنٹءِ سرا آوانی باروا باز پولکاری کتگ و رندا شتگ گوں آواں گدار کتگ۔
آگست ماھا واجہ کنیڈیءَ گشتگ ات کہ آئیا درانڈیھیں ایرانیاں 25000 ڈالر داتگ دانکہ صدر ماڑیءِ کَنِکا سرجم کتگیں میڑیءِ دیما مجاھدین خلقءِ پلانگریا گشتانک بہ دات۔ نیویارک ٹایمز
هیچ نظری موجود نیست:
ارسال یک نظر
وتی کلوا چێرا نبیس إت