ایرانءَ گوں دوازدہ مردمانی دستگیر کنگا وتی و امریکاءِ نیاما ھستیں دشمنی انگت گیش کتگ۔ چارشنبہءَ سرکاری حالجاہ ‘ارنا‘ءَ یک کلاّنیں سرکاری مردمےءِ گپ شنگ کتگ کہ دستگیر بیتگیں مردم امریکائی چاریگ بیتگ اَنت و ایشاں ایرانءَ فوج، حساسیں جاگہ، جوھری پروگرام و دگہ رستگاری واکانی خلافا راز سرجم کتہ بیتگ۔
قومی سلامتیءِ پارلمنانی کمیٹیءِ سروک پرویز سروریءَ 12ھیں کساں دستگیر کنگءِ حالا دیاں گشتگ کہ ایشانی مزنتریں مشن فوجی، جوھری و رستگاری تکاں ایرانءِ دیمرویاں تباہ کنگ بیتگ۔ ایرانءِ چاریگی وزارتا یک پٹاسکاری جھدےءَ پد اے ٹولی درگپتگ۔
امریکا و اسرائیلءِ چاریگانی واھگ بیتگ کہ وتی دمگی چاریگانی کمکا ایرانءَ شہ ملکءِ توکا و درا زنڈیں تاوانے بہ دی اَنت۔ البت، ملکءِ چاریگ گوں وتی زیتیں جھدا دشمنانی اے واھگا بے سوب کنگا سوبین بیتگ اَنت۔
سروریءِ گپانی شنگ بیگا ساری ایرانءِ اتحادی حزب اللہءَ جار پرّینتگ ات کہ آواں ماں لبنان یک امریکاںی چاریگے دستگیر کتگ۔ حزب اللہءِ راھدربر حسن نصراللہءَ جون ماھا ھم گشتگ ات آواں وتی نیاما دو امریکی چاریگ در گپتگ اَنت، بلہ آ گپ مردماں ڈالچار کتگ اَت۔ البت، امریکاءِ پیسری واکدارےءَ ھمے ھفتگا منّتگ کہ آ ھندی مردم بیتگ اَنت، بلہ پہ امریکاءَ کار اش کتگ۔
ماں ایران دستگیر بیتگیں 12ھیں مردمانی نام و نیشنلٹی واکداراں شنگ نہ کتگ اَنت۔ اے ردا گشتگ اش کہ اے وڑیں جرمانی میاربار و آوانی دسٹگیاں پاش کنگ رواج نہ اِنت۔ گارڈین
هیچ نظری موجود نیست:
ارسال یک نظر
وتی کلوا چێرا نبیس إت