بی بی سیءِ ردا چارشنبہءِ روچا حالرساں وزیر حیدر مصلحیءَ قم شھرا مذھبی راھشونانی دیما تران کناں گشتگ کہ گچینکاریانی تھا پترگءِ مقصدا بازیں پندل سازگ بیتگ اَنت و ایشانی نیاما یکے گچینکاریاں چاروکیں آزادیں مردمانی نندارینگءِ واھگ اِنت۔
حیدر مصلحیءَ گیش کتگ کہ پیسری صدارتی گچینکاریانی درگتا سرکار گوں گسریں ٹولیےءَ دیم پہ دیم بیتگ ات۔ ھنوں ھمے ٹولی گوں درملکیاں ھوار اِنت، و ایرانءِ تھا جیڑہ ودی کنگا دلمانگ اِنت۔ سر ظاھرا اے ٹولی گوں انقلابءِ پیشونکءِ راہ و گپاں وتا بندوک شون دیگا اِنت، بلہ باپشتا دگہ راھے پہ وت ئی گچین کتگ۔
واجہ مصلحیءَ گشتگ کہ سرکارءِ خلافا پیسری شورشیاں پدا پاد کنگءِ پڑا امریکاءَ پندل سازتگ۔ المّا امریکاءِ پندل ایش بیت کنت کہ ایرانءِ اسلامی انقلابءَ منزن تریں تاوانے بہ دات۔ ”امریکا واھوک اِنت کہ دمگا ایرانءِ کارپدانی پرؤش دیگا جیڑوانی دیما گوں ایرانءَ بہ ترّینیت۔ اگر باز ووٹ گچینکاریا ریچک بیت اَنت یا کم ھر دویں حالتاں امریکا سوب چست کنگا ساڑی اِنت۔“ مصلحیءَ مذھبی پیشونک سرکچ داتگ اَنت۔
واجہ مصلحیءِ ردا اصلاح طلب جھد کن اَنت کہ دگہ دگہ ٹولیانی ناما وتا پارلمنٹا سر بہ کن اَنت۔ پمیشا شہ پیشونکاں دستبندی ئی کتگ کہ وھدے آ محرم ماھا ایرانءِ ترتابا کن اَنت، گڈا مردماں سرپد بہ کن اَنت کہ وتی ووٹاں ھما کساں بہ دی اَنت کہ فکر، گفتار و کردار ئی گوں آیت اللہ خمینی و آیت اللہ خامنہ ایءِ سوجاں ھمرد بہ بی اَنت۔
حیدر مصلحیءَ اے گپ یک ھنچیں وھدےءَ کتگ اَنت کہ ایرانءِ خلافا مغربی ملک امریکا، کیناڈا و برطانیاءَ نوکیں بندشانی جار پرّینتگ۔ اے بندشانی جارا جناں امریکاءِ درملکی کارانی وزیر بانک ھلری کلنٹونءَ ماں ایران بیوکیں گینکاریءِ درگتا درملکی چاروکاں راہ دیگءِ گپ ظاھر کتگ اَنت۔ نوکیں بندش ایرانءَ پٹرو کیمیکل تکا نقصان دیگءِ واھگا لاگو کنگ بیتگ اَنت۔ برطانیاءَ گوں ایران وتی سفارتی رابطواں سندگءِ جار ھم جتگ۔ کنیڈا گشیت کہ آ چدا پد ایرانءِ گورا ھنچوشیں کالا بھا نہ کنت کہ آئیءِ گس و پٹرو کیمیکل تکا سیت بہ رسین اَنت۔
هیچ نظری موجود نیست:
ارسال یک نظر
وتی کلوا چێرا نبیس إت