برطانیاءَ ایرانءِ سفارت بست و سرجمیں کارندہ ئی 48 کلاکاں شہ ملکا در کپگءِ حکم دات اَنت

لندنءَ ایرانی سفارتءِ دیما پولیس اوشوک اَنت ۔رائٹرزءِ فوٹو

چارشنبہءِ روچا برطانیاءَ ایرانءِ سفارت بست و سرجمیں کارندہ ئی 48 کلاکاں شہ ملکا در کپگءِ حکم دات اَنت۔ اے فیصلہءِ سبب ماں تھراں برطانیاءِ سفارتا ایرانیانی مانْھورّگ درشان کنگ بیتگ۔

برطانیاءِ سرکارءِ ردا تھرانءَ برطانیاءِ سفارتا بیڑ بروکیں میڑیءِ پشت ایرانی سرکار بیتگ۔

برطانیاءِ درملکی کارانی وزیر ویلیم ھیگءَ گشتگ کہ ماں تھراں برطانیاءِ سفارتءِ سرا بیڑ برگ بیگا رند سفارت بندگ بیتگ و سرجمیں کارندہ شہ اودا در کنگ بیتگ اَنت۔

تھرانءَ برطانیاءِ سفارتءِ دیما میڑیےءَ رند مردم سفارتءِ تھا پترتگ اَنت، اودا پروشت پرؤش اش کتگ و برطانیاءِ بیرق اش سوتکگ۔ شہ برطانیاءِ نیمگا ایرانءِ چکّا تجارتی بندشاں رند ایرانیاں اے کار زوالی کتگ۔

ایرانءَ بیھار داتگ کہ ایرانی سفارتءِ بندگا رند برطانیاءِ خلافا ترندتریں گام چست کنگ بی اَنت۔

برطانیاءَ گوستگیں ھفتگا وتی ملکءِ مالی بنجلانی سرا گوں ایرانءِ مرکزی بنکا دے و گرءِ سرا بندش جنگءِ کشا جار پرّینتگ ات کہ آ شہ ایرانءَ تیل زیرگءِ سرا بندشءِ پلانگریا زیریت۔ رائٹرز