بلوچستانءِ خلافا ثبت کتگیں کیسا باھینگ پہ تتایان و دگہ درملکی کمپنیاں الکاپیں درسے بیت کہ گوں غیر منتخب و فوجی سرکاران قرار مہ بند اَنت

گوں بلوچستانءِ پرگنگی سرکارا جیڑہءِ ٹھینگا بے سوبیا رند بلوچستانءِ طلاہ و دگہ گرانبھاییں سنگ در کنوکیں تتایان کمپنیءَ وتی شکایت میانملکی ٹرائبیونلا برتگ و اودا بلوچستان و پاکستانءِ خلافا شکایت ثبت کنائینتگ۔ ھواریا 150ھیں کارندہ شہ کارا کشتگ اَنت و گرانبھاییں سنگ درکنگءِ ریکو ڈک کھنءِ دپ بستگ۔

اگر اے شکایتا تتایان برندہ بہ بیت، گڈا آ شہ پاکستان و بلوچستانءَ 12 بلین ڈالر لوٹوک بیت۔ البت، باھینگءِ حالتا سرجمیں دنیاءِ کمپنیاں یک الکاپیں درسے رسیت کہ چدا پد گوں ھما سرکاراں کہ تفنگءِ زور یا دوز راہ کرسی اش دستگپتگ، قرار مہ بند اَنت۔ پرچاکہ آوانی قانونی بستار ھچ نہ اِنت۔ اے شکایتءِ گوشدارگا آیوکیں شش ماھانی نیاما قاضی نندارینگ بی اَنت و دگہ شش ماہ چک تاں بیت کنت۔ شہ آئیا پد فیصلوے دیما کئیت۔

تتایان گشیت آئیا شہ 2006ءَ دیم پہ انگو 220 میلین ڈالر بلوچستانءِ ریکو ڈک پروجکٹا خرچ کتگ۔ احمر مستی خانءِ سرجم کتگیں رپورٹےءِ ردا اے زرّانی نیاما 200 میلین ڈالر مسلم لاکھانی نامیں فوجی سرکارءِ یک دوزیں تاجرےءَ دیگ بیتگ اَنت۔ پرچاکہ تتایانءِ گورا بھا کنگا ساری آئیا ریکو ڈک وتی کمپنیءِ ناما ثبت کنائینتگ۔

اے پروجکٹءِ ردا قرار بیتگ تانکہ 56 سالاں تتایان اودءِ کھنان طلاہ و دگہ گرانبھایین معدن در بہ کنت و پہ پلگار کنگا دریں ملکاں بہ بارت۔ ایشیءِ سرجمیں ارزشءِ حساب 56 بیلین ڈالر جنگ بیتگ و اے زرءِ مزنتریں بھرے پاکستان سرکارا دیگی و 12 بلین ڈالر درکنوکیں کمپنیا رسگی بیتگ۔

چدا ساری پاکستانءِ سپریم کورٹا بلوچستانءِ شکایتءِ سرا فیصلہ داتگ اَت کہ معدنءِ سرجمیں کھنانی واھند بلوچستان اِنت و بلوچستان سرکارا حق ھست اِنت کہ گوں تتایان بستگیں نارواییں قرارا باطل بہ کنت۔ بلوچستان سرکارا جار پرّینتگ کہ آ چدا پد وتی کھنانی معدناں وت در کنت و وتی حسابا بھا کنت۔

اے باروا پہ گیشتر سرپدیا چیرا داتگیں انگریزی سیاھگاں بہ چار ات

http://www.examiner.com/foreign-policy-in-baltimore/barrick-gold

http://www.nasdaq.com/aspx/stock-market-news-story.aspx?storyid=201111301431dowjonesdjonline000623&title=update-tethyan-files-arbitration-in-us,france-over-pakistan-project