پاکستانءَ نوکیں سیاسی چست ایرے بندات بیتگ۔ اے چست ایرا بھٹوءِ پشت پدانی ارزش کپتگ و بھٹوءِ قاتل ضیاءُالحقءِ اوبادگاں ھرید ارتگ۔ پھک یک پہ یکا یکجاہ بیگا اَنت و ھنوگیں سرکارءِ خلافا جنزے بندات اش کتگ۔ ایشانی نیاما نواز شریف ٹولیا ھوار دگہ لھتے درچتگیں مردم چؤش کہ شاہ محمود قریشی ھوار اَنت۔
ھنوگیں پاکستانی سروزیر گیلانی ھم چونائیا ضیاءُالحقءِ جوڑ کتگیں لیڈرے اِنت، بلہ رندترا ایشی توبہ کار بیتگ ات و پیپلز پارٹیءَ ھوار بیتگ ات۔ البت، آدگراں فیصلہ کتگ کہ بٹھوءِ ناما شہ پاکستانءِ سیاستا دیر بہ کن اَنت۔
ذوالفقار علی بھٹوءِ بودیگیں چک یک پہ یکّا کشگ بیتگ اَنت۔ بلاول جنیں چکّی چکّے اِنت و مردم ایشیا گیشتر زرداریءِ ناما جاہ کار اَنت۔ زرداریءَ سر ظاھرا پہ پاکستانءِ استمانءَ بودیگی کار نہ کتگ کہ دوست دارگ بہ بیت۔ پمیشا شر تریں بدل ھما ضیاءُالحقءِ اوبادگ مارگ بیگا اَنت۔
اے ردا اگر بلوچستانءِ انقلابی شاعر گلخان نصیر و ضیاءُالحقءِ سنگتیءِ گپ دیما نہ آیگا اِنت۔ ایشیءِ سبباں یکے ایش اِنت کہ آئیا ھمنچو انقلابی شعر نبیستگ کہ بلوچ استمان ئی مارشتانی چیرا بار داتگ و دومی سبب آئی بیرانی اِنت۔ اگر مرچی زندگ بیتیں ات، المّا اے چست ایرانی نیاما نام ئی گرگ بیتگ اَت۔
بابائے مزاکرات بزنجوءَ اگر سیاستءِ بدلا شعر نبیستین اَت، پہ قومءِ آجوئیا آئیءِ ایمنی توجیلانی شگان مرچی اوبادگاں جنَگ نہ بیتگ اتنت و ھر انقلابی دیوانا بزنجوءِ انقلابی شعر اش دپگال کتگ اتنت۔ پمیشا دانایاں گشتگ کہ دپا ھمنچوک جوانیں گپے کنگ بہ بیت، وھدءِ بارانی چیرا بار گریت و گار بیت اِنت۔ البت، ندءِ رسْتگیں گال ابدمان بی اَنت۔
ضیاءُالحقءِ اوبادگ وتی پندلاں سوبین بی اَنت یا نہ، زانگ مشکل اِنت۔ چوش ھم بیت کنت کہ زرداری پدا گوں اجکہ کنوکیں پندلےءَ وتی مخالفاں حیرانی تھا دور بہ دات و استمانءِ دلا وتی نیمگا بہ ترّینیت۔ ھرچے بہ بیت، آیوکیں وھدا مردم وت گند اَنت۔
البت، وانوکاں یک سوجی دیگ ضروری اِنت کہ اگر شہ مرگا پد نامدار بیگ لوٹ ات، گڈا نبیستگیں گالاں الکاپیا کما اِت۔ پرچاکہ نبیستگیں گال شمئے اصلی ترجمان اَنت۔ وتی زندا شما چے کن اِت، باندات کس زانت نہ کنت؛ میر غوثبکشءِ داستاں شمئے دیما اِنت کہ ھزار قربانیاں پد ھم قوما شموشتگ و آئیءِ بیرانیءِ سالروچءَ ھچ کس نہ داریت۔
هیچ نظری موجود نیست:
ارسال یک نظر
وتی کلوا چێرا نبیس إت