جست: واجہ عبدالستار منی اولی جست ایش اِنت کہ شما شہ بی ال افءَ پرچا دراتکگ ات؟
عبدالستار بلوچ: مئے درایگءِ سبب مختلفیں طریقہ کارانی سرا مئے شدید اختلافات بیگ اَنت۔
ما نہ تھنا بی ال افءِ حمایتی بیتگیں، ما؛ مئے ھر سنگت کہ ھست اَنت بی ال افءِ فاؤنڈریں (جوڑ کنوکیں)۔ من وت بی ال افءِ ترجمان بیتگاں و سپریم کمان کونسلءِ مردم بیتگاں۔ ایشی گلءِ مزنتر و با اختیار تریں ادارہ بیتگ، و واجہ ھم ھمے رنگا۔ مئے اختلافات ھنیگیں نہ اَنت، ایشاں پنچ شش سال اِنت۔
ما ھمے گپ جتگ کہ بی ال افءِ ھما پالیسی کہ ما ٹھینتگ و داتگ، آئیءِ سرا عمل بیگا نہ اِنت۔ مثال ایش اِنت کہ مرچی بی ال افءَ پروگرام یک کرا کتگ و وتی جماداریءِ، وتی ھیرو بیگءِ و وتی ٹیکہ داریءِ مسئلہ دیما آرتگ۔ ما گشیں کہ فیصلہ کنوک بلوچ عوام اِنت؛ بلوچ عوام فیصلہ بہ کنت کہ آوانی دیما بی ال افءِ مرچییں پروگرام شر اَنت؟
بی ال افءِ پالیسی بیتگ کہ ما وتی ھمساھگیں ملکاں ناراض نہ کنیں، اے مردکہءَ ناراض کتگ اَنت۔
بی ال افءِ پالیسی بیتگ کہ بلوچستانءِ توکا ھر طبقہ فکرے کہ ھست اِنت آئیا نزیک کنگءِ کوشش بہ بیت، اے مردکہءَ دشمن کتگ اَنت۔
مرچی منشیات فروش تئی دشمن، ساقی خانہ تئی دشمن، عام مردم کہ چاریگءِ ناما جنگ و کشگ بیگا اِنت تئی دشمن، ھمساھگیں ملک تئی دشمن؛ اے منی خیالا نہ سیاسی عملے، نےکہ گوریلا عملے اِنت، ایش دشمنی طریقہ کارے اِنت۔ ھمیش مئے اختلافاتءِ بنی سبب بیتگ اَنت۔ ما سک باز کوشش کتگ کہ ایشیءِ اصلاح بہ بیت، ما ھر وھدا گشتگ کہ بابا ادا غلطی بیتگ، اودا غلطی بیتگ؛ البت، اگر یک مردمے سرپد بہ بیت!
ما ھما جاھا سربیتگیں کہ اصلاح بیگءِ ھچ امکان نیست اِنت۔ نیں ما بی ال افءَ دو ٹکّر کنگ و اے گروپ یا آ گروپ ٹھینگءِ بدلا ھما بی ال افءِ اصلی پروگرامءِ ھمردیا جنزا دیما برگءِ مقصدا بی ان ال اف جوڑ کتگ۔ جنز ھما کوھنیں جنز اِنت، سنگت ھما سنگ اَنت؛ صرف ما نام بدل کتگ و بلوچ نشنل لبریشن فرنٹ کتگ۔ ما دگہ گناھے نہ کتگ۔
اگر یک مردمے مئے خلافا پروپگنڈا کنت اِنت کہ ‘واجہ اے ایجنسیانی مردم اَنت‘؛ ایجنسیانی مردم نہ رو اَنت کوھا وتا بد بخت نہ کن اَنت۔ ایجنسیانی مردمانی برات یک یک و دو دو شھید نہ بی اَنت۔ کمانڈر جگوءِ دو برات ھنی شھید بوت اَنت۔ یا واجہ ملا اِنت، آئیءِ قربانیا شما اعتراض کت کن اِنت؟ کئے اعتراض کت کنت؟ آیا آ سرکارءِ مردم اِنت؟ آ ایجنسیانی مردم اَنت؟ غلطیں مردم اَنت؟
آیانی قربانی و ھر چیز تانکہ روچ مرچی گوں ھمے جھدا بستگ اَنت۔ ھمے بزگی و عزابیا گون اَنت۔
کیا تصور بیتگ کہ بی ال افءِ خلافا مردمانی میڑی بیت؟ کیا گمان بیتگ کہ بی ال افءِ مردہ باد دانک دیوالانی دیما نبیسگ بیت؟ ما انگت ھچ مہ گشیں؟ انگت ایشیا تچکیں راھا مہ پرّینیں؟
تو سیاسی لیڈران چاریگءِ نامءِ سرا جنئے و پولیٹیکل پارٹیاں وتی دشمن کنئے، عام مردماں وتی دشمن کنئے، منشیات فروشاں وتی دشمن کنئے، تو ھمساھگ ملکا دشمن کنئے؛ من نہ زاناں تو کجام بلوچ قومی تحریکءِ واستا کارا ئے!؟
جست: واجہ ما سرپد بیتگیں تو بی آر اےءِ خفیہ کمانڈرے بیتگئے، تو پرچا دراتکگئے؟
عبدالستار بلوچ: واجہ اے گپ بالکل غلط اِنت، ایشی پروپگنڈائے بیگا اِنت کہ من بی آر اےءَ شتگاں۔ بی آر اےءَ سربراھیں مردم ھست اَنت، کمانڈر ھست اَنت، علاقائی کمانڈر ھست اَنت، ڈنی کمانڈر ھست اَنت؛ شما جست اش کن اِت کہ باریں من بی آر اےءَ آتکگاں، بی آر اے جوائن کتگ؟ اِنا، من نہ شتگاں۔ البت، بی آر اے والایاں گوں من رابطہ کتگ کہ آ مکرانءَ کمپین کنگ لوٹ اَنت و من آیاں کمک بہ کناں، گوں آواں تعاون بہ کناں۔ من گشتگ ‘وش آتک اِت، حاضر، بیا اِت؛ شما تحریکءِ جُز اِت، شما دشمنءِ خلافا جنگا ات۔ مئے و شمئے مقصد یکّے اِنت، مئے جنگ یکّے اِنت و مکران ایوکا منی پتءِ وا نہ اِنت یا بی ان ال افءَ ٹیکہ نہ زرتگ۔ بیا ات، شما ھر جاگہ کمپین کن ات۔ بی آر اے کئیت، بی ال اے کئیت یا دگہ تنظیم کئیت؛ ھر کس کہ دشمنءِ خلافا جنگ کنت ما آواں مدد کنیں۔ بی آر اےءَ انگت ما مدد کنیں۔
جست: واجہ منی سئمی جست ھمیش اِنت کہ اگر بی آر اے، بی ال اف و بی ال اے یکجاگہ بہ بی اَنت، گڈا شما چے کن اِت؟
عبدالستار بلوچ: باز وشیں گپے اِنت۔ باز وش بییں۔ ما ایشیءِ حمایتا کنیں۔ مئے وتی جھد ھم ھمیش اِنت کہ ما تحریکءِ جزاں گوں نزیکی بہ کنیں۔ گوں بی آر اےءَ مئے گپ بیتگ، تانکہ حدّےءَ ما کامیاب بیتگیں۔ ما وت ھم لوٹیں کہ دْروھا یکجاگہ بہ بی اَنت۔ اگر باندا بی ال اف و بی ال اے یکجاگہ بہ بی اَنت، مارا اعتراضے نیست اِنت و اگر باندا بی آر اے گوں بی ال اےءَ یکجاہ بہ بیت ھم کسا اعتراض کنگ نہ لوٹیت۔
جست: منی چارمی جست ایش اِنت کہ بی ال اف مردماں کشگا اِنت، بلہ ثبوت دیگا نہ اِنت! شما اے باروا چے گش اِت؟
عبدالستار بلوچ: من ترا یک گپے گشاں، ادا ھر مردمے کہ کشگ بیتگ، بلوچے کہ چاریگءِ نامءِ سرا آوانی لسٹ مئے کِرّا موجود اِنت۔ چنچو گناھکار اَنت و چنچو بے گناہ اَنت، ما درستاں زانیں، و دیمترا ما سرجمیا ایشانی وضاحتا کنیں۔ پریسءِ راھا دیما کا اَنت۔ مئے علاقہءَ ما ھما مردما چاریگ گشیں کہ آئی سرمچارءِ پشتا شتگ، سرمچار ئی نقصان داتگ، سرمچارءِ سلاح ئی گرائینتگ اَنت، سنگت ئی گرائینتگ اَنت و نقصان داتگ اَنت؛ آ واقعی قابل کؤش اِنت۔
البت، یکّے اگر روت ڈیزلءِ مسئلوا؛ مئے علاقہ جائو نہ اِنت، مئے علاقہ مشکے نہ اِنت، مئے علاقہ آواران نہ اِنت؛ مئے علاقہءَ 1200 کیلومیٹر بارڈرے اِنت۔ ادا مختلفیں کاربار بیگا اِنت۔ مردمانی آمدنءِ ذریعہ ھمے بارڈرءِ چونڈ اِنت۔ ادا دیزلءِ کاربار بیت، ادا پُپک و بسکوٹءِ کاربار بیت، ادا ٹائرءِ بیت، ادا کمبلءِ بیت اِنت۔ ادا تاں ھمے اف سی بہ بیت یا کوسٹ گارڈ و کسٹم بہ بی اَنت، اگر تو گوں ایشاں لین مہ کنئے، ترا کاربارا نہ اِل اَنت۔
نیں اگر یکے روت وتی ڈیزلءِ بتوا دات اِنت، تو گشئے بیا چاریگے من جناں کُشان ئی۔ ایشیءِ ما مخالفت کتگ، مخالفت کنین ئی و ما ھنی نشتہ فیصلہ کتگ کہ ایشیءِ دیما دارگا عملی جھد کنیں۔ اے ھما رولا ادا کنگا اَنت کہ سرکار و ایجنسی ئی لوٹگا اَنت۔
تو روئے پولیٹکل پارٹیءِ لیڈرا جنئے، تو روئے عام مردما جنئے کہ فلاں اف سی کمپا شتگ و آتکگ۔ ترا چے نقصان داتگ ئی؟ ۔ ۔ ۔ یکے روت پہ گاڑیءِ مسئلوا، یکے روت پہ کسٹما، یکے روت وتی زرّءِ دیگا؛ مارا چے کار اِنت کہ بہ رویں آئیا بہ کشیں؟
من ترا کسانیں مثالے دیاں۔ ھنی کوھاڑءَ دو مردم جنگ بیتگ اَنت۔ پنجگورءَ مردءِ چک ‘وارد کمپنی‘ءَ کارا بیتگ۔ پت شہ دبئیءَ آتکگ۔ چکا گشتگ پت من روگایاں کیچءَ، پتءَ گشت منی چک من ھم کایاں کیچءَ چاراں، من کیچ نہ دیستگ۔ واجہ اے پت و چک جتگ اَنت، ایشانی گڑیال برتگ اَنت،۔ ۔ ۔ ایشانی کیسگءِ زر برتگ اَنت۔ اے دگہ روچا بی ال افءِ بشام بلوچءَ قبول کتگ کہ ‘ما دو آباد کار جتگ؛ دو پنجابی جتگ‘۔ رندا معلوم بیتگ اَنت کہ اے پنجابی نہ بیتگ اَنت، بلوچ بیتگ اَنت، گڈا داتگ ئی کہ دو چاریگ ما جتگ اَنت۔ پدا سھیگ بیتگ اَنت کہ آ علاقہءِ مردم نہ بیتگ اَنت، پنجگورءِ مردم بیتگ اَنت، ترّگا آتکگ اَنت، نیں تردید کتگ۔ اے وڑیں عملا ما ایر جنیں، ایشی دوستانہ کارکردے نہ اِنت و پہ تحریکا نقصان اِنت۔ اے وڑیں کردانی دیما دارگا ما عملی جھد کنگءِ فیصلہ کتگ۔
جست: واجہ ھمے مردم کہ چست و گار کنگ بیگا اِنت و بی ال اف گشگا اِنت کہ ھمائیءِ مردم اَنت، باریں واقعی ھمائیءِ مردم اَنت؟
عبدالستار بلوچ: آئیا مردم ھست اَنت، بالکل آئیا مردم ھست اِنت۔ یک سیاستکار و مزاحمتکارےءِ حسابا ما اے گپا زانگ لوٹیں کہ ھما چیزا من نہ زاناں، سرپرستیں کمانڈر ئی نہ زانت و مردم ئی ھم نہ زان اَنت کہ آ بی ال افءِ ممبر اِنت آئیا سیاسی سنچے جنت، نہ جلسوےءَ گوں بیتگ نہ جلوسےءَ گوں بیتگ؛ سرکار چکانپیت ئی و بارت ئی آخر ایشانی گرائینوک کے اِنت؟ ما ایشیءِ جوابا شہ بی ال افءِ قیادتا لوٹیں، ھما مارا بہ گشیت کہ بابا ایشاں کے گرائینگا اِنت!
جست: واجہ عبدالستار نشنل پارٹیءَ شمئے سنگتی چے اِنت کہ آ شمئے حمایتا کنگا اَنت؟
عبدالستار بلوچ: نشنل پارٹی اگر مئے حمایتا کنت، ما آئیءِ دپا وا چپْس جت و بسْت نہ کنیں کہ مئے حمایتا مہ کنت۔ اگر ما حمایت کت، گڈا شما بہ گش اِت۔
دومی گپ ایش اِنت کہ نہ تھنا نشنل پارٹی؛ نشنل پارٹی و بی ان پی مینگلءِ قیادتءِ کشگءِ حقا ما نہ ایں۔ نے کہ مارا دشمنیے گوں آیاں ھست اِنت۔ البت، طریقہ کارءِ سرا اختلاف ھست اِنت و وڑ و پیمانی سرا اختلافات ھست اَنت۔ آیانی کشگءِ حقا ما نہ بیتگیں و نہ کہ ھستیں۔
باندا روچ نشنل پارٹی مئے حمایتا کنت یا بی ان پی مینگل مارا حمایت کنت، ایش مئے کامیابی اِنت۔ مئے حکمت عملی و پالیسیانی کامیابی بیت اِنت۔ ما گشیں سرجمیں مردم مئے حمایتا بہ کن اَنت۔ منشیات فروش ھم مئے حمایتا بہ کنت، پولیٹکل پارٹی ھم مئے حمایتا بہ کن اَنت، تاجر برادری ھم بہ کنت، شاگرد ھم بہ کن اَنت، جنیں تک ھم بہ کن اَنت؛ کل مئے حمایتا بہ کن اَنت۔
جست: واجہ گڈی جست ھمیش اِنت کہ شما بی ال افءَ دھشتگرد تنظیم گش ات، ایشیءِ باروا چے کنگ لوٹ ات؟
عبدالستار بلوچ: بہ چار ما بی ال افءَ نہ گشیں دھشتگرد! ما گشیں کہ آئیءِ اے طریقہ کار دشمنا فایدہ دیگا اِنت۔ اے کار شہ بی ال افءِ پالیسیاں درا روگ اِنت۔ بی ال اف چوناھیا وتی کارانی ذموار وت اِنت؛ البت، ھما کار کہ قومی تحریکا نقصان دیگا اِنت، سرمچاراں نقصان دیگا اِنت؛ ما آئیءِ دیما داریں۔ زبانی جھد کنیں۔ اگر نہ بیت قلما کار بندیں و اگر نہ بیت، گڈا عملی صورتا دارگءِ کوششا کنیں۔ ھما کارے کہ تحریکا برباد بہ کنت، سرجمیں قوما چاتےءَ دور بہ دات، ما ایشیا برداشت کت نہ کنیں۔ آسر
اے گالگدار یوٹیوبءِ سرا ایر کنگ بیتگ۔ ایشیءِ تھا جست کنوکءِ نام ظاھر کنگ نہ بیتگ۔
هیچ نظری موجود نیست:
ارسال یک نظر
وتی کلوا چێرا نبیس إت