میری ٹائمز سیکورٹی ایجنسیءِ دستا فشریز ڈیپارٹمنٹ ءِ کارندھانی آوارجنی، لٹ کٹ ءُ دستگیریں ٹرالرءُ ٹرالرانی واھنداں یلہ نہ دیگءِ حلاپا فشریز ڈیپارٹمنٹ ءِ کارندھاں مروچی ھم وتی کارگساں کبل جتگءُ زھرشانی کتگ۔ فشریزءِ حکامءِ ردا گوادرءِ نزیکا درامدیں ٹرالرانی گجو کنگءِ حال ءِ پدا فشریز گوادرءِ پانزدہ باسکی پٹرولنگ ٹیم زی سھبءَ گوادرءَ در کپتگءُ فشریز ٹیمءَ کارروائی کتگ ءُ 2 ٹرالر گوں ٹرالرءِ باسکاں دزگیر کتگ۔ لھتے دگہ ٹرالر جستگ انت۔
البت، وھدے فشریزءِ کارندہ گپتگیں ٹرالراں گوادرءَ آرگءَ بوتگ انت کہ میری ٹائمز سیکورٹی ایجنسیءَ ارش کتگءُ فشریزءِ باسک گوں پٹرولنگ بوٹءَ آوار جتگءُ گپتگیں ٹرالر یلہ دیائینتگ انت۔
کساس ھشت کلاکاں لٹ کٹ کنگا رند فشریزءِ باسک گوں پٹرولنگ بوٹءَ ایم ایس اےءَ یلہ داتگ انت۔
دوشی ڈسٹرکٹ ھیڈ کوارٹر ھسپتال ءَ فشریزءِ ٹپگیں باسکاں گوں احوالکاراں تران کتگءُ گشتگ کہ میری ٹائمز ایجنسیءِ کارندھاں آ ترندیں لٹ کٹ کتگ اَنت۔ پدا گوں اے بیھارءَ یلہ کتگ انت کہ دگہ برا زرءَ ظاھر مہ بنت۔
دومی نیمگا ماھیگرانی گلاں ھم فشریزءِ کارندھانی زھرشانیءِ پلہ مرزی کتگءُ چہ بلوچستان سرکارءَ لوٹ کتگ کہ بنجاھی سرکارءِ زری ایجنسیءِ حلاپا کارروائی بہ کنت۔
ماھیگراں گشتگ کہ گوستگیں یک ھفتگےءِ تھا ایم ایس اے ءَ پیشکان ءِ نزیکا دو لانچ گوں مردماں دزگیر کتگءُ برتگ۔ انگت آ لانچانی ھچ احوال نیست۔ وش نیوز
هیچ نظری موجود نیست:
ارسال یک نظر
وتی کلوا چێرا نبیس إت