تباھِگ بلوچانی قومی وراکے اِنت

تباھگ پہ خشک کنگا روچتاپءَ درتکگ اَنت۔ عکس: اے بی بلوچ

دنیاءِ دگہ قومانی ڈولا بلوچاں ھم بازیں قومی وراک ھست اِنت۔ شہ بلوچانی قومی وراکاں یکّے تباھِگ اِنت۔ تباھگ خشکیں گوشتے اِنت۔ ایشیا ترپْشیں انار ھنار جن انت و روچءِ سرا درنج اَنت۔ وھدے کہ خشک بوت، ایر ئی گیج اَنت و ایر کن اَنت۔ پدا براں برانا گراد اَنت و گوں بٹءَ ور انت ئی۔ 

زمانگا سلاجہ یا فریج نہ بیتگ کہ مردم وتی گوشتءَ تانکہ دیرا ایر کت بہ کن اَنت۔ تباھگ کنگا رند گوشت ماھاں ماہ ایر کنگ بیت کنت۔ اگر نمب ئی مہ جنت، آ گوشت ھچبر خراب نہ بیت۔

تباھگءِ دفتری پشدر: زمانگا بلوچاں رسمے بیتگ کہ ھموک سال یک پسے پہ گوشتواریءَ داشتگ اِش۔ اے پس اش گیشتر دلگوشداری کتگ تانکہ پزّور بہ بیت و کشگءِ وھدا گوشت ئی شر بہ بیت۔ اگر اے پس نرینے بیتگ، گڈا گوَھْتگ اش کتگ۔ گوَھتگ کنگ کار پسءِ گونداں گوَج اِنت۔ گوند اش گوتکگ اَنت تانکہ مست مہ بیت و مہ کِجّیت۔

اے داشتگیں پس اش ‘پابُندی‘ گشتگ۔ پابُندی گیشتر ھما دمگاں دارگ بیتگ کہ اودا برنج اش کِشتگ۔ ایشیا کُشگءِ وھد بْرنج رؤن بزاں ایرَھت بیتگ۔ ھنچوش کہ برنج اش روتگ اَنت، پابندی اش کشتگ اَنت۔ پابندیءِ گوشت اش تباھگ کتگ۔ برنج رؤنا ایشیا کشگءِ سبب ایش بیتگ کہ بْرنجاں مُشگا رند بَٹ بیتگ و تباھگ گوں بٹءَ ورگ بیت اِنت۔

البت، ھنوگیں زمانگا گوشت باز اِنت و پہ بٹءِ اڈ کنگا کَنَک ھم آسودگیا رسیت۔ نیں مردم ودار نہ کن اَنت کہ بْرنج رؤن بہ یئت۔ مرچان مزنیں عیداں قربانیءِ پشت کپتگیں گوشت ھم تباھگ کنگ بیگا اِنت۔ لھتے کس کہ وت قربانی نہ کوش اَنت، آواں باجیگ ھمنچوک باز رسیت کہ پہ پشت گیجگا تباھگ ئی کن اَنت۔

بلی توریں ھنی فریج ھست و مردم گوشتءَ تانکہ بڈے روچاں ایر کت کن اَنت۔ بلہ تباھگا وتا تام و وشیے ھست۔ پمیشا مردم انگت تباھگ اڈ کنگ کن اَنت۔

تباھگءَ اڈ کنگءِ راھبند: تْرپشیں اناردانگاں خشک کن اَنت۔ خشکیں انار دانگاں دْروش اَنت یا چوپ اَنت۔ ایشاں پہ وادوک کنگا واد ھم مان کن اَنت۔ پدا گوشتءَ تَنَک تنکا پَچبُر اَنت۔ دروشتگیں انارانی آرتءَ آپ ھوار کن اَنت تانکہ پِشتءِ وڑا نرم بہ بیت۔ نرمیں اناردانگانی پشتءَ پچبرتگیں گوشتءِ سرا مُشان کن اَنت۔ سرجمیں کوشتءِ چکا اے پشت جَنگ بیت۔ نیں گوشتءَ پیشے یا سوتلیے یا زنڈیں بندیکے بند اَنت و روچتاپءَ دْرنج اَنت۔ ھنچوش کہ ساریا گشتگ ات، خشک بیگا رند تباھگ یک پاتےءِ تھا یا پُچّی پیلکےءِ تھا ایر کنگ و نرم نرما گوں بٹءَ جوڑ کنگ بی اَنت۔

تباھگءَ گرادگءِ راھبند: تباھگءَ آپ مان کن اَنت۔ پدا آسءِ سرا گراد انت ئی۔ ھمنچو گراد انت ئی کہ تباھگ نرم بہ ترّیت و ورگءِ لایق بہ بیت۔ ایشیا پد تباھگءَ شہ آپءَ در کن اَنت۔ ھمے آپءِ تھا کنک مان کن اَنت و بٹ گراد اَنت۔ بٹ کہ ساڑی بیت، در ئی کن اَنت و تباھگ ئی سرا دی اَنت۔ پرزؤنگءِ سرا نشتگیں مردم شہ ایشیءِ ورگا سیر نہ بی اَنت۔