امریکایی فوجی گرابانی بنجلا بند کنگ و پاکستانءِ راھا ماں افغانستان نندارینتگیں ناٹوءِ فوجیاں سامان رسینگءِ دگاں شنگ جنگءِ پاکستانی جارا پد دو امریکایی سنیٹراں شہ وتی سرکارا لوٹ کت کہ گوں پاکستانءَ سختی بہ کنت۔ ناٹوءِ بالگردانی بمبگواریا پاکستانءِ فوجیانی کشگ بیگا پد پاکستانءَ امریکا حکم داتگ کہ بلوچستانءَ ٹھینتگیں امریکایی گرابانی بنجلا 15 روچءِ توکا یلہ بہ دات۔ ھواریا پاکستانءَ وتی ملکءِ راھا ماں افغانستان ناٹوءِ واکاں سامان رسینگءِ دگاں بندگءِ جار جتگ۔
شنبہءِ بامگاھا ناٹوءِ بالگرداں پاکستانی فوجءِ دو سیمسری بنجلانی سرا بمبگواری کتگ ات و 24 فوجی کشتگ اتنت۔ افغان سرکارءِ ردا شہ پاکستانءِ خاکا آوانی فوجیانی سرا تیرگواریا رند ناٹوءِ بالگرداں بمبگواری کتگ۔ البت، پاکستانءَ گشتگ کہ آئیءِ فوجی بے میارا کشگ بیتگ اَنت۔
امریکایی سنیٹر جون کئیلءَ گشت کہ دپلوماسی وا برجاہ اِنت، بلہ ایشا کڑک کنگ پکار اِنت و پاکستان سرکچ دیگ بہ بیت کہ پہ آواں امریکاءِ دستکمکی گوں ھوارکاریا بندوک اِنت۔ دومی سنیٹر ڈک دربنءَ وا گشت کہ امریکا وتی فوجا شہ دمگا در بہ کنت۔
سنیٹر دربنءَ سرکچ دات ”افغانستان سرکارا ھچ خیر نیست اِنت، و بیت کنت کرپشنءِ آماچ بہ بیت۔ ایشیءِ چکّا پاکستانءِ رینگریسی اَنت۔ مئے فوجی مفتا نیامجیءَ مانگیشینگ بیتگ اَنت۔ بلّی توریں فوجی جھدا اَنت کہ دمگا ایمن بہ کن اَنت۔“
سنیٹر دربنءَ گیش کت ”مارا جیڑہ افغانستانی واکانی دستا دیگ لوٹیت۔“ ایشیءِ دیم پہ دیمیا سنیٹر کئیلءَ گشت کہ گوں پاکستانءَ رشتگ سندگ مہ بیت۔ پرچاکہ پہ آیندوا ایشیءِ ضرورت اِنت۔“ واشنگٹون پوسٹ
هیچ نظری موجود نیست:
ارسال یک نظر
وتی کلوا چێرا نبیس إت