ترکیءِ جنوب مشرقی دمگا ملکءِ فوجی گرابانی بمبگواریےءَ 35 مردم کشتگ اَنت۔ مردمانی گشگ اِنت کہ فوجا گمان کتگ کہ سلاحبندیں کرد جنگول اَنت، بلہ اصلا ھنچوناین مردم بیتگ اَنت۔ دوشی شپا بیتگیں اے حملہ عراق سیمسرءِ نزیکا بیتگ۔ شہ ھمے دمگا PKKءِ سلاحبنداں براں برانا ترک فوجءِ سرا بیڑ بُرتگ۔
”مئے دیما 30 لاش ایر اَنت کہ پھک سُتکگ اَنت۔ سرکارا زانتگ کہ اے مردم شپوک بیتگ اَنت۔ ایشانی سرا بمبگواری کنگ بیتگ“ اولودیر شھرءِ شھردارا گوں رایٹرز گشتگ۔
رستِگاری واکدارےءَ گشتگ ”ما سھیگ کنگ بیتگیں کہ PKKءِ یک ٹولیے سیمسرا گوازینگا اِنت۔ دوشی سیمسرا گوازینگءِ ضبط بیتگیں ندارگ ھم مئے سرا دیم دیگ بیتگ۔ پمیشا فوجا آپریشن کتگ۔ نیں، ما زانت وا نہ کنیں کہ ایش پی کے کےءِ باسک بیتگ اَنت یا ھنچناییں شپوک۔“
دوگان نیوزءِ ردا بیست مردم کشگ بیتگ اَنت؛ البت، کردی نیوز ‘فرات‘ءِ ردا کشگ بیتگیں مردم 35 کس اَنت۔
گوستگیں آگستءَ ترکیءِ 24 فوجی پی کے کےءَ ھمے دمگا کشتگ اِتنت۔ ایشیا رند ترک فوجا زمینی آپریشن و ھوایی بمبگواری کتگ اَت۔ کردستانءِ آزادی لوٹوک و ترکیءِ نیاما بیتگیں جنگا شہ 1984ءَ دیم پہ انگو 40000 مردم کشگ بیتگ اَنت۔ گارڈین یو کے
هیچ نظری موجود نیست:
ارسال یک نظر
وتی کلوا چێرا نبیس إت